Yɛtɛ sɔtɔɛ.
15.
Na dangi xanbi Munsa nun Isirayilakae naxa yi bɛɛti ba Alatala bɛ. «N xa yi bɛɛti ba Alatala bɛ, naxan xili gbo. A bara soe nun a ragima madula baa ma. 
N sɛnbɛ na Alatala nan na. N a matɔxɔma bɛɛti ra. A bara findi n Nakisima nun n Marigi ra. N tantui rasigama n benbae Marigi ma. 
Sɛnbɛma nan Ala ra. A xili nɛ Alatala. 
A naxa Firawuna xa sɔɔrie nun e ragisee rasin baa ma. Firawuna xa kuntigie naxa madula Xulunyumi Baa ma. 
Mɔrɔnyie naxa e makoto, e naxa goro a bɔtini ma alɔ gɛmɛ. 
Alatala, i sɛnbɛ magaaxu. I bara nɔ i yaxuie ra, i bara nɔ i matandimae ra. 
I xa mangɛya sɛnbɛ magaaxu. I bɔɲɛ na te, e ganma nɛ alɔ sɛxɛ tɛ soxi naxan na. 
I xa foye naxa Xulunyumi baa rabi, kira xaraxi naxa lu a tagi. Mɔrɔnyie naxa te alɔ banxi xalɛ. Ye naxa ti, a xɔrɔxɔ. 
Isirayila yaxui a fala nɛ, ‹N birama nɛ e fɔxɔ ra, han n e li, n e harige tongoma nɛ, han n wasa. N e sɔntɔma nɛ n ma santidɛgɛma ra.› 
Kɔnɔ i tan naxa foye ramini, baa naxa e radula. E naxa goro ye xɔɔra alɔ yɔxui. 
Alatala, i maniyɛ mu na adama xa alae ya ma. I xa sɛniyɛnyi fiixɛ, i xa nɔrɛ gbo, i xa kaabanakoe wuya. I maniyɛ na minden? 
I to i sɛnbɛ ramini, bɔxi naxa e gerun. 
I xa ɲama naxan xun saraxi, i fama e xun tide i xa xanunteya ra, naxan mu ɲɔnma abadan. I fama e xun tide i xa lingira sɛniyɛnxi yire i sɛnbɛ ra. 
Ɲamanɛ gbɛtɛe na na mɛ, e gaaxuma nɛ. Filisitakae bɔɲɛ minima nɛ. 
Edon yareratie ifuma nɛ, Mowaba mangɛe sɛrɛnma nɛ. Limaniya birin bama nɛ Kanaan ɲamanɛ yi ra. 
Alatala, gaaxui nun kɔntɔfili e suxuma nɛ, e dɛ balanma nɛ i sɛnbɛ ra, han i xa ɲama dangi, i naxan xun saraxi. 
I fama nɛ i xa ɲama rasabatide i xa geya fari, i dɛnnaxɛ sugandixi i xa lingira sɛniyɛnxi ra. 
Alatala xa mangɛya buma abadan.» 
Firawuna xa soe, a xa sɔɔri ragisee, nun a xa soe ragimae to goro baa ma, Alatala naxa baa radin e xun ma, kɔnɔ Isirayilakae naxa dangi kira xaraxi ra baa tagi. 
Haruna maaginɛ Mariyama, naxan findixi namiɲɔnmɛ ginɛ ra, a naxa boote maxa. Ginɛ gbɛtɛe naxa fare boron. 
Mariyama naxa yi bɛɛti ba, «Wo bɛɛti ba Alatala bɛ, barima a xili gbo. A bara soe nun e ragimae radula baa ma.» 
Munsa naxa Isirayilakae xun ti Suru gbengberenyi rakelife Xulunyumi Baa dɛ ra. E naxa e ɲɛrɛ xi saxan gbengberenyi ma, e mu ye sɔtɔ. 
E naxa Mara li, kɔnɔ e mu nɔ Mara ye minde barima na ye nu xɔnɔ. «Mara» wama «xɔnɛ» nan falafe. 
Ɲama naxa sɔnxɔ Munsa ma, «Won ye sɔtɔma minden?» 
Munsa naxa a dɛ rawa Alatala xɔn ma. Alatala naxa wuri mɔɔli nde masen Munsa bɛ, a fa na woli ye xɔɔra, ye xɔnɛ naxa ba. Alatala to gɛ e xaxili matode mɛnni, a naxa yi saatɛ tongo e bɛ, 
«Xa wo wo tuli mati n xui ra a fanyi ra, xa wo bira n ma tinxinyi fɔxɔ ra, xa wo n ma yaamari birin suxu, wo n ma sɛriyɛ birin binya, n tan, wo Marigi Alatala, n mu fure ɲaaxi yo ragoroma wo ma, alɔ n naxan nagoro Misirakae ma. N tan nan Alatala ra, naxan wo rayalanma.» 
E to dulonyi fu nun firin nun tugi bili tongo solofere li Elimi, e naxa yonkin mɛnni.