Masenyi Dɔnxɔɛ.
32.
«Koore, i tuli mati n ma wɔyɛnyi ra. Bɔxi, i tuli mati n fala xui ra. 
N ma xaranyi xa yensen yɛ alɔ tunɛ ye. N ma masenyi xa lu alɔ xini, naxan dɔxɔma burɛxɛe ma. 
N fa na Alatala xili nan masenfe. Wo xa won Marigi Ala tantu.» 
«Alatala maniyaxi fanye nan na, naxan mixi kantama. A walima tinxinyi nan na. A xa natɛe birin fan. A xa wɔyɛnyi mu kanama, wule yo mu na a dɛ kui. A tinxin.» 
«Kɔnɔ wo tan, ɲama ɲaaxi, wo bara geregiri Alatala ma. Yaagi na wo bɛ. Wo bara findi ɲama kobi ra. 
Ɲama daxui, ɲama xaxilitare, mixi lan a xa na fe mɔɔli raba a ra? Wo baba mu lanxi a tan xa ma, wo daa Marigi, naxan wo findixi a xa ɲama ra? 
Wo wo maɲɔxun lɔxɔɛ dangixie ma, wo ɲɛe mato, wo wo babae nun forie maxɔrin, e xa fe dangixie tagi raba wo bɛ. 
Ala Xili Xungbe Kanyi naxa bɔxi itaxun adamadie ma. A naxa bɔxie naaninyi sa Isirayila xa die xasabi ma. 
Isirayila ɲama naxa findi a gbe ra. Alatala naxa Yaxuba xa die findi a yɛtɛ gbe ra.» 
«A Isirayila toxi gbengberen yire nɛ. A naxa a ɲɛngi sa a xɔn ma, a naxa mɛɛni a ma alɔ a ya di firinyie. 
A luxi nɛ alɔ sɛgɛ, naxan luma a xa die xun ma, a a gabutenyi itala, a die xanin. 
Alatala keren peti nan a xa ɲama kantaxi. Ala gbɛtɛ yo mu kafu a ma.» 
«A naxa wo rasabati geya fari. A naxa wo rabalo xɛ sansie xun na. A naxa kumi nun ture ramini wo bɛ gɛmɛ longori ra. 
A naxa ninge nun yɛxɛɛ xiɲɛ fi wo ma. A naxa yɛxɛe, sie, nun si kontonyie fi wo ma sube ra kelife Basan bɔxi ma. A naxa mɛngi fi wo ma wo naxan donma, a naxa wɛni fi wo ma wo naxan minma.» 
«Isirayila tinxinxi naxa belebele, a naxa findi di fanyi ra, kɔnɔ a bara gbilen Ala fɔxɔ ra, a daa Marigi, a bara a kantama, a rakisima rayaagi. 
Isirayila naxa Ala raxɔnɔ barima a bira nɛ ala gbɛtɛe fɔxɔ ra, e fe ɲaaxi raba. 
E naxa sɛrɛxɛ ba ɲinnɛe bɛ, naxee mu na Ala ra, e mu naxee kolon sinden, e babae mu naxee kolon. 
Isirayilakae, wo bara nɛɛmu wo kantama ma naxan wo raminixi duniɲa ma, naxan simaya fima wo ma.» 
«Alatala to bara a xa die kɛɲa to, a naxa xɔnɔ e ma. 
A naxa a masen, ‹N xa gbilen e kantafe fɔxɔ ra, n fa a mato fe naxan fama e lide.› E mu fan. Yanfante nan e ra. 
E bara n naxɔnɔ ala wulee ra. E bara n bɔɲɛ rate kuyee ra. N tan fan e raxɔnɔma nɛ mixie ra, ɲama fanyi mu na naxee ra. N e bɔɲɛ rate si xaxilitare ma.» 
«Iyo, n ma xɔnɛ bara gbo yɛ, han a bara mixi faxaxie ramaxa. A luma alɔ tɛ naxan bɔxi nun a daxamui ganma, han a sa dɔxɔ geyae sanke ra. 
N fe ɲaaxi ragboma nɛ e fari, n nan n ma xalie birin wolima nɛ. 
N kaamɛ rasoma bɔxi ma, n fure ɲaaxi rasanbama nɛ e ma, n wulai sube magaaxuxie raminima nɛ e ma, a nun bɔximase xɔnɛ kanyie. 
Naxee na tande, fanfore nan e faxama. Naxee na banxi kui, gaaxui nan e faxama. E birin faxama nɛ, xɛmɛ nun ginɛ, dimɛdi nun fori.» 
«N nu wama nɛ e birin halakife, e xili xa lɔɛ duniɲa ma. 
Kɔnɔ n mu tin yaxuie xa n mayele. N mu wa e xa a maɲɔxun a e tan nan yi wali rabaxi, Ala xa fɔxi mu a ra. 
Xaxili kanyi mu na e ra, lɔnni mu e yi. 
Xa lɔnni kanyi nan e ra nu, e e sigade kolonma nɛ nu. 
Yaxui keren tan nɔma Isirayilaka wulu keren nagide di? Yaxui firin nɔma birade mixi wulu fu fɔxɔ ra di? Iyo, xa e Marigi, e Kantama sa e lu e yaxuie sagoe, na nɔma nɛ rabade. 
Yaxuie yati a kolon, e xa ala e kantama mu dangi Isirayila Marigi Alatala ra. 
E xa fe mu dangi Sodoma nun Gomora ra. E birin maniyaxi wɛni bili nan na naxan bogi xɔnɛe raminima, 
naxan ye luxi alɔ bɔximase xɔnɛ. 
Na birin nagataxi gundo nan na n xɔnyi. 
E na bira, n nan n gbeɲɔxɔma nɛ. A gbegbe mu luxi. E yigi tɛgɛ lɔxɔɛ bara makɔrɛ.» 
«Alatala fama a xa ɲama makiitide, kɔnɔ a man kinikinima nɛ e ma, barima e sɛnbɛ yo mu na. Mixi yo mu na naxan nɔma e malide. 
Ala e maxɔrinma nɛ fa, ‹Wo xa alae na minden, naxee nu wo kantama, 
wo naxee rabaloxi sube ture ra, wo nu wɛni soma naxee yi ra? E xa e yɛtɛ masen wo bɛ, e xa wo rakisi, e xa wo ratanga. 
Yakɔsi wo xa a kolon, n tan nan keren peti nɔma mixi rakiside. Ala gbɛtɛ mu na fo n keren. N tan nan mixi faxama, n a rakeli. N tan nan mixi maxɔnɔma, n a rayalan. Nde gbɛtɛ nɔma mixi nde bade n bɛlɛxɛ? 
N kali naxan ti, n bɛlɛxɛ tixi koore ma na nan yi ki: N ɲiɲɛ. N mu faxama abadan! 
Xa n fanfore ralugan, xa n a suxu n bɛlɛxɛ kui, n nan n gbeɲɔxɔma nɛ n gerefae ma, n sare fima nɛ n xɔnmae ma. 
N nan n ma xalie rasiisima nɛ wuli ra, n ma fanfore sube donma nɛ. Geresoe yo mu kisima.›» 
«Si birin xa sɛɛwa Alatala xa ɲama ra. Alatala a xa konyie xa faxɛ ɲɔxɔma nɛ. A tɔɔrɛ dɔxɔma nɛ a gerefae ma. A a xa ɲama nun a xa bɔxi xun sarama nɛ.» 
Annabi Munsa nun Annabi Yosuwe, Nunu xa di, naxa yi bɛɛti masenyi birin xaran ɲama bɛ e xui itexi ra. 
Annabi Munsa to gɛ Alatala xa masenyi tide Isirayilakae bɛ, 
a naxa a fala e bɛ, «Wo xa yi masenyi suxu sɛnbɛ ra n naxan xaranxi wo bɛ to lɔxɔɛ. Wo xa a xaran wo xa die bɛ, alako e xa nɔ Alatala xa sɛriyɛ rabatude a fanyi ra. 
Masenyi tilinxi nan yi masenyi ra, a naxa lu wo bɛ alɔ masenyi fufafui. A simaya nan fima wo ma bɔxi ma wo fama dɛnnaxɛ sɔtɔde Yurudɛn naakiri ma.» 
Na lɔxɔɛ kerenyi kui, Alatala naxa a masen Annabi Munsa bɛ, 
«Siga Abarimi geya longori, Nebo geya fari Mowaba bɔxi ma, Yeriko ya tagi. Mɛnni i xa Kanaan bɔxi mato, n naxan fima Isirayilakae ma. 
I na te geya fari, i fama saya sɔtɔde naa, i i benbae li aligiyama, alɔ i taara Haruna xa fe rabaxi ki naxɛ Horo geya fari. 
Wo na sɔtɔxi nɛ, barima wo mu wo xaxili ti n na Isirayilakae ya xɔri Meriba ye yire, Kadesi biri ra, Sini gbengberenyi ma. Na kui wo mu tin n binyade ɲama ya xɔri. 
Na fe na a niyaxi a i nɔma bɔxi tode yire makuye gbansan nɛ, n naxan fixi Isirayilakae ma, kɔnɔ i tan gundi mu soma naa.»