Ayuba.
22.
Elifasi Temanka naxa a fala, 
«Adama tide na Ala bɛ? Ade, adama lɔnnixi nɔma a yɛtɛ gbansan nan malide. 
I xa tinxinyi findima geeni mundun na Ala Sɛnbɛ Kanyi bɛ? I lufe nɔndi kui, na Ala malima di? 
Ala na i ɲaxankatafe i xa tinxinyi nan xa fe ra? A na kiiti ɲaaxi safe i ma na nan ma? 
I xa fe ɲaaxi mu gboxi xɛ? I xa yunubie mu wuyaxi xɛ han a dangi a i? 
I bara see rasuxu sɛɛkɛ ra i ngaxakerenyie yi ra. I bara e xa sosee yati ba e ma, i e mageli ti. 
I mu nu mixi kima ye ra, ye xɔli nu naxan ma, i mu nu kaamɛtɔɛ kima donse ra. 
I nu bɔxi soma sɛnbɛma nan yi ra, naa findi yɛtɛ igboe sabatide ra. 
I nu kaaɲɛ ginɛe nun kiridie keri nɛ e bɛlɛxɛ igeli ra. 
Na nan a toxi i rabilinxi gantanyie ra, fe magaaxuxie i sɔtɔxi. 
I mu na dimi ɲaaxi tofe? I mu na ye tofe i madulafe naxan xɔɔra?» 
«Ala mu na koore ma? Tunbuie mato, e itexi ki naxɛ. 
I fa a falama munfe ra, ‹Ala munse kolon? Ala naxan na nuxuie fari ma, na nɔma kiiti sade be? 
Nuxuie na Ala nun adamae nan tagi. Ala a ɲɛrɛma koore ma, kɔnɔ a mu nɔma adamae tode.› 
I wama lufe na kira fori nan xɔn ma, tinxintaree na dɛnnaxɛ kabi tɛmui xɔnnakuye? 
E faxa nɛ e xa simaya kɔnti mu kamali, alɔ ye banbaranxi se xaninma ki naxɛ. 
E a fala nɛ Ala bɛ, ‹Gbilen muxu fɔxɔ ra. Ala Sɛnbɛ Kanyi nɔma munse rabade muxu bɛ?› 
Kɔnɔ Ala nan harige gbegbe fi e ma. Na nan a toma n mu n tuli matima mixi ɲaaxie xa marasi ra. 
Tinxintɔɛe mixi ɲaaxie xa halaki toma nɛ, a findi e bɛ ɲɛlɛxinyi ra. Mixi fanyie yoma nɛ e ma, e a fala, 
‹Muxu yaxuie bara sɔntɔ, tɛ bara e xa naafuli gan.› 
Na kui, i tan xa i xa fe yailan i tan nun Ala tagi, alako i xa bɔɲɛsa sɔtɔ, i man xa hɛɛri kolon. 
I xa tin a xa marasi ra, i xa a xa masenyi masɔtɔ i bɔɲɛ kui. 
Xa i man gbilenma Ala Sɛnbɛ Kanyi ma, a fama i xun nakelide. I xa fe ɲaaxi makuya i xɔnyi ra, 
i xa xɛɛma woli xure ma, na xɛɛma naxan kelixi Ofiri bɔxi ma. 
Na tɛmui Ala Sɛnbɛ Kanyi nan findima i harige ra, a findi i xa xɛɛma nun gbeti ɲɔxɔɛ ra. 
Ala Sɛnbɛ Kanyi nan fama rafande i ma dangife fe birin na. I fama i xaxili tide a tan nan na. 
I na a maxandi, a i xa dubɛ suxuma nɛ. Na tɛmui i xa i gbe laayidi rakamali a mabiri. 
A i xa natɛe sɔɔnɛyama nɛ, a tɛ yanbama i bɛ i xa kirae birin xɔn ma. 
Ala a niyama nɛ i xa mixi magoroxi rakeli, barima a luma na mixi mɔɔli mali ra. 
A nɔma yunubitɔɛ yati rakiside, i xa sɛniyɛnyi saabui ra.»