Ayuba.
33.
«Yakɔsi Ayuba, i i tuli mati n ma masenyi ra, i xa n ma wɔyɛnyi ramɛ. 
N bara n dɛ rabi, n nɛnyi bara keli. 
N ma masenyi kelixi n bɔɲɛ fiixɛ nan kui, nɔndi nan minima n dɛ i. 
Ala Xaxili bara n daa, Ala Sɛnbɛ kanyi ɲɛngi bara n findi mixi ɲiɲɛ ra. 
Xa i nɔma n yaabide, i xa na raba. 
Won firin birin lan Ala ya i. N fan yailanxi bɛndɛ nan na. 
Na kui i naxa gaaxu n ya ra. 
Kɔnɔ i bara wɔyɛnyi nde fala, n naxan mɛxi n tuli ra. 
I bara a fala, ‹N sɛniyɛn, n mu yunubi rabaxi, 
kɔnɔ Ala man na fe nde tofe n na, n findixi a yaxui ra naxan ma. 
A bara n sanyi mabalan yɔlɔnxɔnyi kui, a nu fa n fɔxi birin igbɛ.› 
Kɔnɔ n xa a fala i bɛ, nɔndi mu i bɛ na fe kui, barima Ala gbo mixi bɛ. 
I wama Ala rakiitife munfe ra? A mu yaabi fima a xa fe rabaxi birin ma. 
Ala fe masenma won bɛ ki nde ra, kɔnɔ won mu won ɲɔxɔ sama na xɔn ma. 
A nɔma wɔyɛnde xiye ra kɔɛ ra, mixi xima tɛmui naxɛ e xa sade ma. 
A nɔma adamadie tuli rabide na tɛmui, a e rakolon fee ra naxee kelixi a tan ma, 
alako e xa kira ɲaaxi bɛɲin, a man xa e ratanga e yɛtɛ kan igbofe ma. 
Na kui, a e ratangama nɛ gaburi gbaloe ma, a e ratanga santidɛgɛma ma. 
Ala man nɔma masenyi tide adamadi bɛ a xa tɔɔrɛ nde ra, naxan xɔnɛ soma han a xɔrie kui a xa fure dagi tagi. 
Donse yati fa raɲaaxu a ma, a mu nɔ a dɛgede. 
A fate ba a ma, a xɔrie birin sa kɛnɛ ma. 
A makɔrɛ aligiyama ra, Sayamalekɛ fa a fɔxɔ ra.» 
«Kɔnɔ xa xɛɛra xunmafalama nde sa lu a bɛ malekɛ galie ya ma, naxan fama tinxin ki masende na kanyi bɛ, 
Na kui, xɛɛra xunmafalama findima saabui fanyi ra a bɛ, Ala hinnɛ a ra, a a masen Ala bɛ, ‹A rakisi faxɛ ma, n bara a xunsare ba.› 
Na kui, a fate man gbilenma dimɛdiɲa, a man fonike sɛnbɛ sɔtɔ. 
Adamadi na Ala hinnɛnte maxandi, a Ala yatagi toma nɛ sɛɛwɛ kui, Ala fa tinxinyi fi a ma. 
Na kanyi bɛɛti bama nɛ mixie ya i, a a fala, ‹N yunubi rabaxi nɛ, n tinxinyi madalin, kɔnɔ na sare mu ragbilenxi n ma a ki ma. 
Ala bara n xɔrɛya, n tan naxan xun nu tixi aligiyama ra. A man bara gbilen naiyalanyi masen na n bɛ.› 
Ala nan na rabama adama bɛ, keren, firin, han saxan, 
alako a xa a ba faxɛ yi, a xa a lu naiyalanyi kui.» 
«Ayuba, i tuli mati n na, i xa i sabari, i xa n ma masenyi ramɛ. 
Xa yaabi nde na i bɛ, i xa na fala, barima n wama nɔndi fife i ma. 
Kɔnɔ xa na mu a ra, i tuli mati n na, i xa i sabari alako i xa xaxili sɔtɔ n na.»