Yabura.
57.
Dawuda xa suuki bɛɛtibae xa mangɛ bɛ. A xa ba alɔ bɛɛti naxan xili «I naxa halaki ti.» Dawuda naxa yi ba a to a gi Sɔlu ma, a sa so fɔnmɛ kui. 
Ala, hinnɛ n na, yandi i xa hinnɛ n na. N maratangɛ fenma i yire alɔ tɔxɛyɔrɛ a fenma a nga gabutenyi bun ma ki naxɛ han fe xɔrɔxɔɛ xa dangi. 
N bara Ala Xili Xungbe Kanyi maxandi naxan n ma fe birin sɔɔnɛyama. 
N xɔnmixie n ɲaxankatama tɛmui naxɛ, Ala n nakisima nɛ kelife ariyanna, Ɲɛngi rate a hinnɛ nun nɔndi ragoroma n ma. 
Yɛtɛe bara n nabilin, n saxi e tagi, e tan naxee adamadie faxama. E ɲinyie luxi alɔ tanbɛe, e nɛnyie luxi alɔ santidɛgɛma naxan baxi a tɛɛ i. 
Ala, i xa i xa binyɛ masen koore ma, i xa a masen bɔxi ma. 
E bara yɛlɛ ti n ya ra, a gbe mu luxi n xa so a ra. E bara yili ge n ya ra, kɔnɔ e tan nan biraxi a kui. Ɲɛngi rate. 
Ala, n bɔɲɛ bara limaniya, n bara limaniya sɔtɔ. N bɛɛti bama nɛ, n i tantuma nɛ. 
N bɔɲɛ bara keli n na, n xa n ma kɔrae tongo, n xa bɛɛti ba han subaxɛ. 
Marigi, n i tantuma nɛ sie tagi. N bɛɛti bama nɛ i bɛ bɔnsɔɛe tagi. 
I xa hinnɛ koore lima nɛ, i xa tinxinyi tema nɛ han nuxuie. 
Ala, i xa i xa binyɛ masen koore ma, i xa a masen bɔxi ma.