Yabura.
61.
Dawuda xa bɛɛti bɛɛtibae xa mangɛ bɛ. A xa ba kɔra xui ra. 
Ala, i tuli mati n ma maxandi ra. N ma maxandi ramɛ. 
N i maxandima kelife ra bɔxi makuye. N bɔɲɛ mu saxi. N xanin geya fari naxan ite dangife n na. 
I findixi n bɛ yire nan na n kantaxi dɛnnaxɛ n yaxuie ya i. 
N wama lufe i xɔnyi tɛmui birin. N wama lufe i xa kantari kui, alɔ xɔni yɔrɛ luma a nga gabutenyi bun ma ki naxɛ. 
N Marigi Ala, i bara i tuli mati n ma maxandi ra. I bara kɛ fi n ma, nun mixi birin ma naxee gaaxuxi i xili ya ra. 
Mangɛ xa simaya xunmasa, alako a xa bu a gbegbe ra. 
A xa mangɛya xa bu i ya i tɛmui birin, I xa hinnɛ a ra, i xa findi a dugutɛgɛ ra. 
Iyo, n mu taganma bɛɛti bafe ra i xili binye bɛ, barima i n ma maxandi yaabima tɛmui birin.