Yabura.
69.
Dawuda xa bɛɛti bɛɛtibae xa mangɛ bɛ. A xa ba alɔ bɛɛti naxan xili, «Fuge tofanyie.» 
Ala, n nakisi! Ye bara te han n kɔnyi. 
N na birife boora tilinxi kui, n sanyi mu tide yo sɔtɔfe. N na madulafe ye xɔɔra. 
N bara i xili han n bara tagan, n xui yo mu na sɔnɔn, n ya bara n xɔnɔ i fenfe ra. 
N xɔnmixie bara wuya dangi n xunsɛxɛ ra. Sɛnbɛmae nan e ra naxee wama n faxafe. E findi n yaxuie ra hali n mu fefe rabaxi e ra. N mu fe ɲaaxi yo rabaxi e ra, kɔnɔ e wama n xa sare nde fi. 
Ala, i n ma tantanyi kolon, n ma yunubie mu nɔxunxi i ma. 
Mangɛ Alatala, i naxa a lu danxaniyatɔɛe xa yaagi n ma fe ra. Isirayila Marigi Ala, i naxa a lu i fenmae xa ifu n ma fe ra. 
E n konbima i tan nan ma fe ra. N bara yaagi han. 
N xunyae mu n kolon sɔnɔn, n bara lu n taarae bɛ alɔ xɔɲɛ nde. 
N wama i waxɔnfe rabafe. I konbimae bara findi n yaxuie ra. 
N wama, n sunma. Na birin man kui, mixie n konbima. 
N sunnun donma ragoroma n ma, e n mayelema. 
Naxee dɔxɔxi taa sode dɛ ra, nee n mafalama, siisilae n mayelema sigi ra. 
Kɔnɔ Alatala, n bara i maxandi. Ala i xa hinnɛ n na barima i xa hinnɛ gbo. 
N nakisi alako n naxa biri boora xɔɔra, n natanga n xɔnmixie ma. 
I naxa tin n xa madula, ye naxa n nalɔɛ, n naxa goro aligiyama. 
Alatala, n xui ratin, i tan naxan fan, naxan xa hinnɛ gbo. I xa kinikini n ma, i xa n mali. 
I naxa i nɔxun i xa konyi ma. N na tɔɔrɛ kui, yandi n mali. 
I xa i makɔrɛ n na, i xa n xunsara, i xa n nakisi n yaxuie ma. 
I bara n ma tɔɔrɛ nun n ma yaagi kolon, n yaxuie birin na i ya i. 
Konbi bara n bɔɲɛ kana han n bara fura. N hayi na kinikini ma, kɔnɔ a mu na. N hayi na mixi madundumae ma, kɔnɔ e mu toma. 
E pɔsɔnɛ sama n ma donse, e minse xɔnɛ soma n yi ra, ye ɲɔxɔɛ ra. 
E xa teebili xa findi gantanyi ra e bɛ, e xa naafuli xa findi yɛlɛ ra naxan e suxuma. 
E ya xa ifɔɔrɔ, e xa dɔnxu. E tagi xa e xɔnɔ han e xa bira. 
I xa xɔnɔ e ma, e xa na tɛ kolon. 
E xa gɔɔrɛ xa ɲɔn, adamadie naxa lu e xɔnyi sɔnɔn, 
barima e tɔɔrɔmixie xa tɔɔrɛ xun masama, i naxee ɲaxankata. E mixie mayelema, i naxee halaki. 
I xa e xa yunubi birin to, alako e naxa i xa kisi sɔtɔ sɔnɔn. 
E xilie xa ba simaya sɛbɛli kui, e naxa lu tinxintɔɛe ya ma. 
N tan na tɔɔrɔfe yi tɛmui, Ala, i xa n nakisi, i xa n nakeli. 
N fama Ala xili matɔxɔde bɛɛti ra, n fama tantui rasigade a ma. 
Na rafan Alatala ma dangife sɛrɛxɛ ra, hali ninge kamalixi na a ra, hali tuura feri kanyi na a ra, toree na naxan bɛ. 
Tɔɔrɔmixie sɛɛwama nɛ na tofe ra. Naxee Ala fenma, e simaya xɔnkuye sɔtɔma nɛ. 
Alatala a tuli matima setaree ra, a mu nɛɛmuma a xa mixie ma e xa tɔɔrɛ kui. 
Koore nun bɔxi xa a matɔxɔ, baa nun yɛxɛɛe xa a binya. 
Ala fama Siyoni rakiside, a Yuda taae tima nɛ. A man ɲama sabati naa, naa xa findi e gbe ra. 
Na findima a xa konyie xa mamadie kɛ nan na. Ala xanuntenyie fama nɛ lude naa.