Yabura.
119.
Sɛɛwɛ na mixie bɛ naxee ɲɛrɛ ki tinxin, naxee biraxi Alatala xa sɛriyɛ fɔxɔ ra. 
Sɛɛwɛ na mixie bɛ naxee Ala xa masenyi mɛma, naxee a fenma e bɔɲɛ birin na. 
Nee mu tinxintareya rabama fefe ma, e birama Ala xa kira nan fɔxɔ ra. 
I bara i sago masen muxu bɛ, alako muxu xa muxu ɲɔxɔ sa a xɔn ma a fanyi ra. 
N wama fe birin nabafe alako n xa i xa yaamarie rabatu. 
Na kui n mu fama yaagide i waxɔnfe xa fe ra. 
N na i xa yaamarie kolon, n i batuma nɛ n bɔɲɛ fiixɛ ra. 
N i xa yaamarie ratinmɛma nɛ, i naxa mɛ n na kerenyi ra. 
Fonike ɲɛrɛma sɛniyɛnyi kui di? A bira i xa masenyi fɔxɔ ra. 
N i fenma n bɔɲɛ birin nan na. I naxa n lu n xa makuya i xa yaamarie ra. 
N i xa masenyi ragatama nɛ n bɔɲɛ ma, alako n naxa yunubi raba i ra. 
Matɔxɔɛ na i bɛ Alatala. I xa yaamarie masen n bɛ. 
N i xa sɛriyɛ durusima nɛ, i naxan masenxi i kɛrɛ ra. 
N sɛɛwaxi birafe ra i xa masenyi fɔxɔ ra, alɔ n na findi banna belebele ra. 
N n ɲɔxɔ saxi i sago xɔn ma, n i xa kira matoma nɛ. 
I xa yaamarie rafan n ma, n mu nɛɛmuma i xa masenyi ma. 
Fe fanyi raba n tan, i xa konyi di bɛ, alako n xa kisi, n xa i xa masenyi ratinmɛ. 
N ya rabi alako n xa i xa sɛriyɛ fanyi igbɛ. 
Xɔɲɛ nan lanxi n ma yi duniɲa ma, i naxa i xa yaamarie nɔxun n ma. 
N hayi na i xa tinxinyi ma. 
I i xui ratema yɛtɛ igboe xili ma, mixi dankaxi naxee i xa yaamarie rabɛɲinma. 
I xa n natanga yaagi nun maraɲaaxui ma, barima n i xa masenyi suxuxi. 
Hali mangɛe n tɔɔɲɛgɛma, i xa konyi di a ɲɔxɔ sama nɛ i xa yaamarie nan xɔn ma. 
I xa masenyi rafan n ma, e n nasima a fanyi ra. 
N na tɔɔrɛ xungbe kui. Yandi, i xa n nakisi i xa masenyi ra. 
N to n ma ɲɛrɛ ki masen i bɛ, i n yaabi nɛ. Yandi, i xa i xa yaamari masen n bɛ. 
N mali i sago fahaamufe ra, alako n xa n ɲɔxɔ sa i xa kaabanakoe xɔn ma. 
N na wafe nimisɛ ma. N xun nakeli alɔ i a laayidixi ki naxɛ. 
Wule falafe makuya n na. Hinnɛ n na i xa sɛriyɛ saabui ra. 
N bara dugutɛgɛɲa kira sugandi, n bɔɲɛ birama i xa sɛriyɛ nan fɔxɔ ra. 
Alatala, n xirixi i xa sɛriyɛ nan na, i naxa n lu yaagi kui. 
N na n ɲɛrɛfe i xa yaamarie xa kira nan xɔn ma, barima i bara a niya i waxɔnfe xa lu n bɔɲɛ ma. 
Alatala, n matinxin i xa yaamarie ra, alako n xa lu i xa kira xɔn ma n ma simaya birin kui. 
Xaxili fanyi fi n ma, alako n xa n ɲɔxɔ sa i xa sɛriyɛ xɔn ma, n man xa a rabatu n bɔɲɛ birin na 
N naɲɛrɛ i xa yaamarie xa kira xɔn ma, barima e rafan n ma 
N bɔɲɛ rafindi i xa masenyi ma, i naxa a rafindi bannaya tinxintareya ma. 
N yae ba see ra naxee ɲɔnma, n nakisi i xa kira xɔn ma. 
I xa laayidi rakamali i xa konyi di bɛ, i naxan nagataxi i yaragaaxuie ya ra. 
N ba yaagi kui n gaaxuxi naxan ya ra, barima i xa sɛriyɛ fan. 
N wama birafe i xa masenyi fɔxɔ ra a fanyi ra. N nakisi i xa tinxinyi kui. 
Alatala, fa i xa xanunteya nun i xa kisi ra n bɛ, alɔ i a laayidi ki naxɛ. 
Na tɛmui, n nɔma nɛ n maberema yaabide, barima n tan laxi i xa masenyi ra. 
I naxa nɔndi masenyi ba n dɛ i, barima n xaxili tixi i xa kiiti ra. 
N i xa sɛriyɛ rabatuma nɛ abadan. 
N luma xɔrɛya nan kui, barima n na i sago nan fenfe. 
N i xa masenyi falama nɛ mangɛe bɛ, n mu fama lude yaagi kui. 
Birafe i xa yaamarie fɔxɔ ra, na rafan n ma. 
N na n bɛlɛxɛe itema tantui ra i xa yaamarie xa fe ra, naxee rafan n ma. N wama n ɲɔxɔ safe i xa sɛriyɛe xɔn ma. 
I xa ratu i xa masenyi ma, i naxan masen i xa konyi di bɛ, naxan xaxili sa fima n ma yare. 
N madunduma n ma tɔɔrɛ kui i xa laayidi nan saabui ra. 
Yɛtɛ igboe n mayelema nɛ, kɔnɔ n mu i xa sɛriyɛ kira bɛɲinma. 
Alatala, n to n natu i xa kiiti tinxinxie ma i naxan saxi tɛmui dangixi, n bɔɲɛ limaniyama nɛ. 
N bɔɲɛ texi a ɲaaxi ra tinxintaree xili ma naxee i xa sɛriyɛ raboloma. 
N sabati dɛdɛ, n bɛɛti bama nɛ i xa yaamarie xa fe ra. 
Kɔɛ ra n na n natuma nɛ i xili ma. Alatala, n fama nɛ i xa sɛriyɛe ratinmɛde. 
N darixi i sago rabatufe nan na. 
Alatala, i tide gbo n bɛ. N bara laayidi tongo i xa masenyi rabatufe ra. 
N wama lufe i sɛɛti ma n bɔɲɛ birin na. Hinnɛ n na alɔ i a masen ki naxɛ. 
N to n ɲɛrɛ ki mato, n bara gbilen i xa masenyi ma. 
N gbatama nɛ, n mu dugundima i xa yaamarie rabatufe ra. 
Hali mixi ɲaaxie kankan n ma, n mu nɛɛmuma i xa sɛriyɛe ma. 
Kɔɛ tagi, n kelima nɛ, n i matɔxɔ i xa kiiti tinxinxi xa fe ra. 
I yaragaaxui birin findixi n ɲɛrɛboore nan na, nun naxee i sago rabatuma. 
Alatala i xa xanunteya na duniɲa birin ma, n xaran i xa yaamarie ra. 
Alatala, i bara fe fanyi raba n tan i xa konyi bɛ, alɔ i a laayidixi ki naxɛ. 
N xaran fe tagi rasade nun fe kolonyi ra, barima n laxi i xa yaamarie ra. 
N nu bara lɔɛ beemanu i xa n ma fe magoro, kɔnɔ yakɔsi fa n na i xa masenyi nan nabatufe. 
I fan, i fe fanyi rabama, n xaran i xa yaamarie ra. 
Hali yɛtɛ igboe wule sama n xun, n i xa yaamarie rabatuma nɛ n bɔɲɛ birin na. 
E bɔɲɛ xɔrɔxɔ alɔ gɛmɛ, kɔnɔ i xa sɛriyɛ ɲɔxun n bɛ. 
N ma tɔɔrɛ bara n mali i xa yaamarie kolonfe ra. 
I xa masenyi fan n bɛ xɛɛma nun gbeti ra. 
I tan nan n daaxi, i tan nan n nafalaxi i xɔnyɛ ra. Fahaamui fi n ma i xa yaamarie kolonfe ra. 
I yaragaaxuie xa sɛɛwa n tofe ra, barima n xaxili tixi i xa masenyi ra. 
Alatala, n a kolon i xa kiiti tinxinxi ra, n a kolon i n ma fe magoroxi xanunteya nan ma. 
Yandi, i xa xanunteya xa n madundu, alɔ i a laayidi n tan, i xa konyi bɛ ki naxɛ. 
I xa kinikini n ma alako n xa kisi, barima i xa sɛriyɛ rafan n ma. 
Yɛtɛ igboe xa yaagi sɔtɔ, barima n mu fe yo rabaxi e ra e n tɔɔrɔma naxan ma. N tan ɲɔxɔ sama i sago nan xɔn ma. 
I yaragaaxuie xa gbilen n ma, a nun naxee i xa masenyi kolon. 
N bɔɲɛ xa i xa yaamarie suxu, alako yaagi naxa fa dusu n xun na. 
A xɔli n ma n xa i xa kisi sɔtɔ, kɔnɔ n xaxili tixi i xa masenyi nan na. 
N i xa laayidi rakamalixi mamɛfe. N a falama n bɔɲɛ kui, «I n madunduma mun tɛmui?» 
N luxi alɔ kundi naxan na raxarafe, kɔnɔ n mu nɛɛmuma i xa yaamarie ra. 
N xa mamɛ ti han mun tɛmui, beenun i xa n yaxuie ɲaxankata? 
Yɛtɛ igboe gantanyi tima n ya ra. Sɛriyɛ mu na ki. 
I xa yaamari birin tinxin. N natanga tɔɔɲɛgɛ ma. 
A gbe mu luxi e xa n ma fe kana, kɔnɔ n tondi nɛ i xa yaamarie rabolode. 
N nakisi i xa xanunteya ra, alako n xa i xa masenyi suxu. 
Alatala, i xa masenyi na koore ma abadan. 
I xa xanunteya buma nɛ kelife to bɔnsɔɛ ma han bɔnsɔɛ naxee sa fama. I duniɲa xanxi nan daa. 
I xa sɛriyɛ buma han to, birin na i xa mangɛya nan bun ma. 
Xa n mu sɛɛwa i xa sɛriyɛ ra nu, n bara bɔnɔ n ma tɔɔrɛ kui nu. 
N mu nɛɛmuma i xa masenyi ra feo, barima i n kisixi e tan nan saabui ra. 
N bara n yɛtɛ fi i ma, n nakisi. N tinma i sago suxufe ra. 
Mixi ɲaaxie wama n faxafe, kɔnɔ n tan ɲɔxɔ saxi i xa masenyi xɔn ma. 
N a kolon duniɲa fe birin ɲɔnma nɛ, kɔnɔ i xa sɛriyɛ mu kanama abadan. 
I xa sɛriyɛ rafan n ma. N na n ɲɔxɔ saxi a xɔn ma kudɛ. 
I xa yaamarie n findima fahaamula nan na dangi n yaxuie ra, barima e na n bɔɲɛ kui tɛmui birin. 
N xaxili fan n karamɔxɔe xaxili bɛ, barima n na n ɲɔxɔ saxi i xa masenyi nan xɔn ma. 
N fe kolon dangife forie ra, barima n i sago rabatuxi. 
N bara n sanyi ba kira ɲaaxie xɔn ma, n xa bira i xa masenyi fɔxɔ ra. 
N mu i xa sɛriyɛ bɛɲin, barima i tan nan yati n xaran na ra. 
I xa masenyi ɲɔxun n dɛ kui dangi kumi ra. 
N xaxili fanyi sɔtɔ i sago nan na. Na kui n bara kira ɲaaxie tan xɔn. 
I xa masenyi findixi lanpui nan na n san tide, a findi naiyalanyi ra n ma kira xɔn ma. 
N bara laayidi tongo naxan mu kanama, n fama nɛ birade i xa sɛriyɛ tinxinxi fɔxɔ ra. 
N bara tɔɔrɔ a gbe ra. Alatala, n nakisi i xa masenyi ra. 
Alatala, n bara i maxandi, i xa n ma matɔxɔɛ suxu sɛrɛxɛ ra, i xa n xaran i sago ra. 
N nii na faxɛ ya i tɛmui birin, kɔnɔ n mu nɛɛmuma i xa sɛriyɛ ma. 
Mixi ɲaaxie gantanyi tema n bɛ, kɔnɔ n mu n makuyama i sago ra. 
I xa masenyi findixi n kɛ nan na abadan, a n bɔɲɛ rasɛɛwama nɛ. 
N bɔɲɛ birama nɛ i xa yaamarie fɔxɔ ra abadan. 
N filankafui xɔnma, kɔnɔ i xa sɛriyɛ rafan n ma. 
N kantari nun n makantama na i tan nan na, n xaxili tixi i xa masenyi ra. 
Wo wo masiga n na, wo tan mixi kobie, alako n xa Ala xa yaamarie ratinmɛ. 
N dɛmɛn alɔ i a laayidi ki naxɛ, alako n xa kisi. I naxa fe kana n xaxili tixi naxan na. 
I xa ti n fanga ra, alako n xa kisi. N ya tixi i xa yaamarie ra. 
I xa tondi mixie ra naxee e makuyama i xa sɛriyɛ ra, barima madaxuɲa nun wule na e xa fe birin kui. 
I mixi kobie ɲɔnma nɛ yi duniɲa ma, alɔ xabui gbeti gbi bama ki naxɛ. Na nan a ra i xa masenyi rafan n ma. 
N fate sɛrɛnma i xa magaaxui ra, n hanmɛxi i xa kiiti ra. 
N walima nɔndi nun tinxinyi nan na. I naxa n lu n yaxuie yi ra. 
I xa n ma fe sɔɔnɛya i sɛnbɛ ra, I naxa lu yɛtɛ igboe xa nɔ n na. 
N ya tixi i xa kisi ra tɛmui birin, a nun i xa masenyi tinxinxi. 
Hinnɛ i xa konyi ra i xa xanunteya kui. N xaran i xa yaamarie ra. 
Fahaamui fi n tan, i xa konyi ma, alako n xa i xa masenyi kui kolon. 
Mixie na i xa sɛriyɛ matandife. Alatala, a lanma i xa ti e ya ra yakɔsi. 
I xa yaamarie rafanxi n ma dangife xɛɛma fanyi ra, 
n to a maɲɔxun i sago tinxin, n kira birin xɔnma nɛ naxan mu findi nɔndi ra. 
I xa masenyi n dɛ ixarama, n a rabatuma na nan ma. 
I xa masenyi kui matofe, a xaxili fima nɛ xaxilitaree ma. 
A na n nii ra n xa i sago kolon. 
I ya rafindi n ma, i xa hinnɛ n na, alɔ i darixi a raba ra ki naxɛ i xanuntenyie bɛ. 
I xa n ti i xa masenyi fari, i naxa lu fe ɲaaxi yo xa nɔ n na. 
N ba adamadie xa nɔɛ bun ma, alako n xa i xa yaamarie ratinmɛ. 
I yatagi nɔrɛ rayanba i xa konyi ma, i xa n xaran i xa yaamarie ra. 
N luma wa ra a gbe ra, barima n a kolon mixie mu i xa sɛriyɛ ratinmɛma. 
Alatala i tinxin, i xa kiitie fan tinxin. 
I xa masenyi tinxin, a man findixi nɔndi yati nan na. 
N bɔɲɛ raɲaaxuma nɛ n ma, barima n yaxuie mu e tuli matima i xa masenyi ra. 
I xa masenyi bara a yɛtɛ xa nɔndi masen, a rafan n tan i xa konyi ma. 
Hali n xurun, mixie yoma n ma, n mu nɛɛmuma i sago ma. 
I xa tinxinyi buma abadan. I xa sɛriyɛ nɔndi na a ra. 
Sunnunyi nun tɔɔrɛ n suxuxi, kɔnɔ i xa yaamarie nɔxun n bɛ. 
I xa sɛriyɛe tinxin abadan. Fahaamui fi n ma alako n xa kisi. 
Alatala, n na n dɛ rawafe i bɛ n bɔɲɛ birin na. N yaabi, alako n xa nɔ i xa yaamarie ratinmɛde. 
N na n dɛ rawafe i bɛ. N nakisi, alako n xa nɔ i sago rabade. 
N kelima beemanu subaxɛ xa a li, n i maxandi i xa n dɛmɛn. N xaxili tixi i xa masenyi nan na. 
N mu xima kɔɛ ra, n na n maɲɔxunma i xa masenyi nan tun ma. 
I i tuli mati n xui ra i xa xanunteya xa fe ra. Alatala, n nakisi i xa kiiti bɛrɛ ra. 
Mixie bara maso n na, naxee wama fe ɲaaxie xɔn. E makuya i xa sɛriyɛ ra. 
Kɔnɔ i tan Alatala, i makɔrɛ n na, i xa yaamarie findixi nɔndi nan na. 
N a kolon kabi a rakuya, i bara i xa masenyi mabanban alako a xa bu abadan. 
N ma tɔɔrɛ mato, i xa n nakisi, barima n mu nɛɛmuxi i xa sɛriyɛ ma. 
I xa n xun mafala, i xa n xun sara. N nakisi alɔ i a laayidi ki naxɛ. 
Kisi makuya mixi ɲaaxie ra, barima e mu birama i xa yaamarie fɔxɔ ra. 
Alatala, i xa kinikini gbo. N nakisi i xa kiiti bɛrɛ ra. 
N gerefae wuya, kɔnɔ n mu gbilen i sago fɔxɔ ra. 
I yanfamae tofe raɲaaxu n ma, barima e mu i xa masenyi suxuma. 
A mato, i xa yaamarie rafan n ma. Alatala, n nakisi i xa xanunteya xa fe ra. 
I xa masenyi nɔndi na a ra, i xa kiiti tinxinxi buma nɛ abadan. 
Mangɛe n tɔɔrɔma hali n mu fe ɲaaxi yo rabaxi e ra, kɔnɔ n gaaxuma i xa masenyi ya ra n bɔɲɛ birin na. 
N sɛɛwaxi i xa laayidi ra, alɔ mixi naxan geeni xungbe sɔtɔxi. 
N wule xɔnxi, a raɲaaxu n ma, kɔnɔ i xa sɛriyɛ n xanuntenyi na a ra. 
N i matɔxɔma sanmaya solofere lɔxɔ yo lɔxɔ i xa kiiti tinxinxi xa fe ra. 
Bɔɲɛsa gbegbe nan na mixie bɛ, i xa sɛriyɛ rafanxi naxee ma. Fefe mu e rabirama. 
Alatala, n xaxili tixi i xa kisi ra, n birama nɛ i xa yaamarie fɔxɔ ra. 
N i xa masenyi suxuma nɛ, barima e rafan n ma ki fanyi ra. 
N birama nɛ i sago nun i xa masenyi fɔxɔ ra. I n ɲɛrɛ ki birin kolon. 
Alatala, i xa n ma duba suxu. Fahaamui fi n ma i xa masenyi saabui ra. 
N ma maxandi xa i li. N nakisi alɔ i a laayidi ki naxɛ. 
I matɔxɔɛ xa mini n dɛ i, barima i n xaranfe i xa yaamarie nan na. 
N dɛ xa bɛɛti nde ba i xa masenyi xa fe ra, barima i xa yaamarie birin tinxin. 
I xa fa n dɛmɛn, barima n i sago nan sugandixi. 
Alatala, n nii na i xa kisi ma, i xa sɛriyɛ n nasɛɛwama nɛ. 
I xa n nakisi alako n xa nɔ i matɔxɔde. I xa kiitie xa n dɛmɛn. 
N nabɛɲinxi nɛ alɔ yɛxɛ lɔɛxi. I xa n tan i xa konyi fen, barima n mu nɛɛmuxi i xa yaamarie ma.