Annabi Esayi.
44.
«N ma konyi Yaxuba bɔnsɔɛ, wo xa wo tuli mati, n ma ɲama sugandixi Isirayila, wo xa n xui ramɛ. 
Alatala xa masenyi nan ya, naxan wo daaxi wo nga tɛɛgɛ i, naxan wo bun tima. N ma konyi Yaxuba, hali i mu hanmɛ, wo tan Yesurun n naxan sugandixi, 
barima n ye ragoroma nɛ wo xa bɔxi maxaraxi ma, n xure raminima nɛ gbengberen yire ma. N nan n Xaxili ragoroma nɛ wo bɔnsɔɛ ma, n barakɛ sama nɛ wo xa die ma. 
E fanma nɛ alɔ ɲooge naxan toma fiili tagi, alɔ wuri naxee sixi xure dɛ i. 
Nde a falama nɛ, ‹Alatala gbe nan n na,› a Yaxuba xili sa a xun ma. Nde a sɛbɛma nɛ a bɛlɛxɛ ma, ‹Alatala gbe,› a Isirayila xili sa a xun ma.» 
«Alatala xa masenyi nan ya, Alatala Sɛnbɛma naxan findixi Isirayila mangɛ nun a rakisima ra. N tan nan na fe fɔlɛ ra, n tan nan na fe raɲɔnyi ra. Ala gbɛtɛ yo mu na bafe n tan na. 
Nde maniyaxi n tan na? A xa na fala. Na kanyi xa wɔyɛn ba, a xa fe dangixi masen kabi n ma ɲama daa tɛmui. A xa fe masen naxan fama rabade, iyo a xa na fala kɛnɛ ma. 
Wo naxa gaaxu, wo naxa sɛrɛn. N mu na masenxi wo bɛ xɛ, beenu na fee xa raba? N ma seedee nan wo ra. Ala gbɛtɛ na na, ba n tan na? Ade, fanye gbɛtɛ mu na hali keren.» 
Fuyantee nan kuye yailanmae ra. E xa wali tide yo mu na. E xa seedee ya mu na, e xaxili ifuxi. E fama lude na yaagi nan kui. 
Nde kuye yailanma, naxan mu nɔma a malide fefe ra? 
Na kanyie yaagima nɛ. Adamadi nan tun na e ra. E birin xa e malan, e xa ti n ya ra. N e birin nagoroma nɛ gaaxui nun ɲaxankatɛ ra. 
Kuye yailanma wure xabuma tɛ xɔɔra, a kuyee yailan dɛrɛma ra, a a rawali a yɛtɛ sɛnbɛ ra. Kaamɛ nun ye xɔli luma nɛ a suxu ra, a fa tagan. 
Kamudɛri luuti italama nɛ a maniyafe ra, a a kɔɔrin. A wali fɔlɔ wali see ra, a a yailan han a lu alɔ mixi tofanyi naxan tima a xa banxi kui. 
A nu wuri ndee si fɔtɔnyi yire, a mamɛ ti han tunɛ ye a ramɔ, a fa a sɛgɛ. 
A nde findi yege ra, alako xinbeli naxa a suxu, a nde rawali taami ganfe ra. Kɔnɔ naxan luxi, a na findi ala ra a naxan batuma, a kuye rafala, a suyidi a bɛ. 
A sɛɛti findi yege ra, a sube ganma naxan na, a fa a dɛge, a a fala, «Yi tɛ fan. Xinbeli mu n suxuma be.» 
A wuri dɔnxɔɛ nan findima a xa kuye ala ra, a suyidi naxan bɛ a batufe ra. A maxandi ti a bɛ, a falafe ra, «N nakisi, barima i tan nan n ma ala ra.» 
Kɔnɔ na mixi mu gɛxi fahaamui sɔtɔde. A luxi alɔ dɔnxui naxan mu se toma, a xaxili mu fata fee tagi rabade. 
Sese mu a a bɔɲɛ ratima sɔnɔn, a xa a maɲɔxun, «N bara wuri sɛɛti sa tɛ i, alako n xa taami nun sube gan a tɛ wole ra n naxan donma. A lanma n xa na wuri dɔnxɔɛ rafala kuye ra Ala naxan xɔnma? N xa n suyidi wuri xuntunyi bɛ?» 
Na kuye yailanma birama se nan fɔxɔ ra naxan findima tɛ xube ra. A bɔɲɛ bara a yɛtɛ yanfa. A mu fata a yɛtɛ rakiside, a man mu xaxili sɔtɔ a falafe ra, «N naxan tixi n bɛlɛxɛ ra wule ala nan a ra.» 
«Yaxuba bɔnsɔɛ, wo xa ratu yi fee ma, wo tan Isirayila ɲama naxan findixi n ma konyi ra. N wo daa nɛ, alako wo xa findi n ma konyi ra. Isirayila, n mu nɛɛmuma wo ma. 
N bara wo xa yunubie xafari, wo naxan sɔtɔ wo xa murutɛ kui, n bara nee ba naa alɔ nuxui bama koore ma ki naxɛ. Wo xa gbilen n ma, barima n bara wo xun sara.» 
Koore xa sɛɛwa Alatala xa wali xa fe ra. Bɔxi bunyi xa a xui ramini. Geyae xa e xui ite alɔ wuri naxee na fɔtɔnyi kui, barima Alatala bara Yaxuba xun sara, a bara a nɔrɛ masen Isirayila ya ma. 
Wo Rakisima Alatala xa masenyi nan ya naxan wo rafalaxi wo nga tɛɛgɛ, «N tan, Alatala nan n na, naxan fe birin daaxi, naxan koore itala, naxan bɔxi rafala a bɛlɛxɛ ra, 
naxan namiɲɔnmɛ wule falɛe xa tɔnxumae kana, naxan sematoe rayaagi, naxan lɔnnilae xa marasi mafindi lɔnnitareɲa ra, 
naxan a xa namiɲɔnmɛ konyie xa masenyie rakamali, naxan a xa xɛɛrae xui findi nɔndi ra, naxan a masenma Darisalamu xa fe ra, ‹Ɲama fama sabatide naa,› naxan a masenma Yudaya taae xa fe ra, ‹E man fama nɛ tide,› 
naxan a falama baa bɛ, ‹Xara, n i xa ye raxɔrima nɛ,› 
naxan mangɛ Sirusi xɛɛma a sago rabade, alɔ xuruse madonyi a rabama ki naxɛ, naxan a masenma Darisalamu xa fe ra, ‹A man xa ti,› naxan a masenma hɔrɔmɔbanxi xa fe ra, ‹A man xa ti!›»