Annabi Yeremi.
16.
Alatala bara yi masenyi ti n bɛ, 
«I naxa ginɛ dɔxɔ, i naxa die sɔtɔ, 
barima Alatala bara a masen die xa fe ra naxee fama baride yi bɔxi ma, a nun e nga naxee e barixi, a nun e baba naxee e sɔtɔxi, 
e fama nɛ faxade fure ma, kɔnɔ ɲɔnfe mu rabama e bɛ, e mu ragatama bɔxi ma. E findima ɲaɲɛ nan na bɛndɛ fuɲi fari. E na faxa santidɛgɛma nun kaamɛ ra, xɔnie nun wulai subee fa e binbie donde.» 
Alatala bara a masen n bɛ, «I naxa so banxi kui mixi na sunnunyi kui dɛnnaxɛ, i naxa siga ɲɔn yire, i naxa mixi kunfa ba, barima n bara bɔɲɛsa ba n ma ɲama yi ra, n bara tondi hinnɛ nun kinikini ma e bɛ.» Alatala xa masenyi nan na ki. 
«Mixi xungbee nun mixi lanmae faxama nɛ yi bɔxi ma. E mu ragatama, e ɲɔnfe mu rabama. E xa mixie mu e yɛtɛ maxabama sunnunyi kui, e mu e xunyi bima faxa mixie bɛ. 
E mu taami dɔxɔma sunnun mixie bɛ alako e xa madundu. E mu minse dɔxɔma sunnun mixie bɛ, naxee baba xa na mu a ra e nga bara faxa. 
I naxa ɲɔn fe bande don, i naxa lu sunnun mixie fɛ ma e madundufe ra, 
barima Isirayila Mangɛ Alatala bara a masen, ‹N bara fa yi waxati wo tagi alako ɲɛlɛxinyi sigie xa dan, xulunyie xa ɲɔn futi xirimae tagi.›» 
«N na gɛ yi masenyi tide ɲama bɛ, e fama nɛ n maxɔrinde, ‹Munfe ra Alatala bara a masen a xa muxu ɲaxankata? Munse findixi muxu xa yunubi ra? Muxu fe ɲaaxi mundun nabaxi muxu Marigi Alatala ra?›» 
«I xa e yaabi, ‹Alatala xa masenyi nan ya: Wo babae bara n nabolo, e bara bira ala gbɛtɛe fɔxɔ ra, e bara e batu, e bara tuubi e bɛ. E bara n tan nabɛɲin, e mu n ma sɛriyɛ suxu. 
Wo tan bara fe ɲaaxi raba dangife wo babae ra. Wo bara bira wo sondonyi ɲaaxi waxɔnfe fɔxɔ ra, wo mu wo tuli mati n na. 
N xa wo keri yi bɔxi ma, wo xa siga yire nde wo nun wo babae mu dɛnnaxɛ kolon. Mɛnni wo nɔma nɛ ala gbɛtɛe batude kɔɛ nun yanyi ra, barima n mu kinikinima wo ma sɔnɔn.›» 
Alatala xa masenyi nan ya: «Lɔxɔɛ fama fade, mixi mu a falama sɔnɔn, ‹Alatala ɲiɲɛ bara Isirayilakae ramini Misira bɔxi ra.› 
Mixie fama nɛ a falade, ‹Alatala ɲiɲɛ bara Isirayilakae ramini kɔɔla bɔxi ma, a nun bɔxi birin ma e rayensenxi dɛnnaxɛ. N fama nɛ e ragbilende e xa bɔxi ma, n naxan fi e babae ma.›» 
Alatala xa masenyi nan ya: «N fama nɛ mixi suxuie xɛɛde e yire, e xa e suxu. N fama nɛ koyinmae xɛɛde e yire, e xa e fen geyae fari gɛmɛe longori ra, 
barima n bara e ɲɛrɛ ki to. E rabafe mu nɔxunxi n ma, n e xa yunubie birin toma. 
N fama nɛ e xa yunubi sare ragbilende e ma dɔxɔ firin, barima e bara n ma bɔxi findi bɔxi sɛniyɛntare ra, n naxan fixi e ma kɛ ra. E bara na bɔxi rafe fe ɲaaxi nun fe ratɔnxi ra.» 
«Alatala findixi n sɛnbɛ nan na, a findixi n kantama nan na, a findixi n ma kantari nan na n ma tɔɔrɛ kui. Sie fama nɛ fade i yire kelife duniɲa tuxui birin. E fama nɛ a falade, ‹Muxu babae biraxi wule nan fɔxɔ ra, wule naxan mu findixi munafanyi ra e bɛ.› 
Adamadi nɔma alae yailande? E naxan yailanma, Ala mu a ra.» 
«Na nan a ra, yi biyaasi n fama nɛ n sɛnbɛ magaaxuxi masende e bɛ, alako e xa a kolon Alatala nan n na.»