كْنتِ تِقٍ.
23.
بَلَمِ نَشَ عَ قَلَ بَلَكِ بّ، «عِ شَ سّرّشّبَدٍ سٌلٌقٍرٍ يَءِلَن بٍ. عِ مَن شَ قَ تُورَ سٌلٌقٍرٍ نُن يّشّي كٌنتٌنيِ سٌلٌقٍرٍ رَ.» 
بَلَمِ نَشَن مَشْرِن، بَلَكِ نَشَ عَ بِرِن نَبَ. عٍ نَشَ تُورَ كٍرٍن نُن يّشّي كٌنتٌنيِ كٍرٍن بَ سّرّشّ رَ نَ سّرّشّبَدٍ كٍرٍن كٍرٍن مَ. 
بَلَمِ نَشَ عَ قَلَ بَلَكِ بّ، «عِ شَ لُ بٍ سّرّشّ قّ مَ، ﭑ تَن شَ ﭑ مَكُيَ دٌندٌرٌنتِ. تّمُندٍ عَلَتَلَ قَمَ مِنِدٍ ﭑ مَ. عَ نَشَن يٌ مَسٍن ﭑ بّ، ﭑ عَ قَلَمَ عِ بّ.» بَلَمِ تٌ تٍ فٍيَ ندٍ قَرِ، 
عَلَتَلَ نَشَ مِنِ عَ مَ. بَلَمِ نَشَ عَ قَلَ عَ بّ، «ﭑ بَرَ سّرّشّبَدٍ سٌلٌقٍرٍ يَءِلَن، ﭑ يّشّي كٌنتٌنيِ كٍرٍن نُن تُورَ كٍرٍن نَن بَشِ عَ بِرِن كٍرٍن كٍرٍن قَرِ.» 
عَلَتَلَ نَشَ مَسٍنيِ قِ بَلَمِ مَ عَ نَشَن مَسٍنمَ. عَ نَشَ عَ يِتَ عَ بّ، «سِفَ بَلَكِ يِرٍ، عِ شَ يِ مَسٍنيِ تِ عَ بّ.» 
بَلَمِ نَشَ فبِلٍن بَلَكِ يِرٍ، عَ عَ لِ عَ تِشِ عَ شَ سّرّشّ قّ مَ، عَ تَن نُن مٌوَبَ كُنتِفِيٍ. 
بَلَمِ نَشَ عَ شَ مَسٍنيِ تِ يِ كِ، «بَلَكِ نَن قَشِ ﭑ نَ كٍلِقٍ سِرِيَ. مٌوَبَ مَنفّ نَن ﭑ شِلِشِ، كٍلِقٍ سٌفٍتٍدٍ فٍيَيٍ كْن نَ. ‹قَ، يَشُبَ بْنسْي دَنكَ ﭑ بّ! عِ شَ شْنّ رَدِن عِسِرَيِلَ مَ!› 
ﭑ نْمَ مِشِ دَنكَدٍ دِ، عَلَتَلَ مُ نَشَن دَنكَشِ؟ ﭑ نْمَ شْنْدٍ مِشِ مَ دِ، عَلَ مُ شْنْشِ نَشَن مَ؟ 
ﭑ عٍ تٌمَ كٍلِقٍ فٍيَ كْن نَ، كٍلِ يِرٍ عِتٍشِ. حَمَ نَن عَ رَ، نَشَن لُمَ عَ شَتِ مَ، نَشَن تَفِ رَ سَمَ عٍ نُن سِ فبّتّيٍ رَ. 
ندٍ نْمَ يَشُبَ بْنسْي كْنتِدٍ، كْنتِ نَشَن دَنفِمَ مّيّنيِ كْنتِ رَ؟ عٍ نُ عِسِرَيِلَ حَمَ عِتَشُن دْشْدٍ نَانِ رَ، ندٍ نْمَ عَ سّيتِ كٍرٍن يَتِ كْنتِدٍ؟ عَلَ شَ ﭑ مَلِ ﭑ شَ عَلِفِيَمَ لِ تِنشِنيِ كُي. عَلَ شَ ﭑ مَلِ ﭑ شَ مَنِيَ عٍ رَ ﭑ مَ سَيَ كُي.» 
بَلَكِ نَشَ عَ قَلَ بَلَمِ بّ، «عِ مُنسٍ رَبَشِ ﭑ نَ يِ كِ؟ ﭑ عِ رَقَشِ نّ ﭑ يَشُييٍ دَنكَدٍ، كْنْ عِ تَن نَ دُبَقٍ عٍ بّ.» 
بَلَمِ نَشَ عَ يَابِ، «عَلَتَلَ نَ مَسٍنيِ نَشَن سَ ﭑ دّ عِ، ﭑ مُ لَن ﭑ شَ نَ قَلَ؟» 
بَلَكِ مَن نَشَ عَ قَلَ عَ بّ، «وٌن شَ سِفَ يِرٍ فبّتّ، عِ نْمَ عٍ تٌدٍ دّننَشّ. عِ سّيتِ كٍرٍن نَن فبَنسَن تٌمَ بٍ، عِ مُ عٍ بِرِن تٌمَ. مّننِ عِ نْمَ عٍ بِرِن تٌدٍ، عِ قَ عٍ دَنكَ.» 
عَ نَشَ بَلَمِ شَنِن سٌقِمِ، ثِسِفَ فٍيَ قَرِ. عَ نَشَ سّرّشّبَدٍ سٌلٌقٍرٍ يَءِلَن مّننِ، عَ تُورَ كٍرٍن نُن يّشّي كٌنتٌنيِ كٍرٍن بَ سّرّشّ رَ نَ سّرّشّبَدٍ كٍرٍن كٍرٍن مَ قَرِ. 
بَلَمِ نَشَ عَ قَلَ بَلَكِ بّ، «عِ شَ لُ بٍ عِ شَ سّرّشّ قّ مَ، ﭑ تَن شَ ﭑ مَكُيَ دٌندٌرٌنتِ، ﭑ نُن عَلَتَلَ شَ لُ يِرٍ كٍرٍن.» 
عَلَتَلَ نَشَ مِنِ بَلَمِ مَ، عَ مَسٍنيِ ندٍ قِ عَ مَ، عَ قَ عَ قَلَ عَ بّ، «سِفَ بَلَكِ يِرٍ، عِ شَ يِ مَسٍنيِ تِ عَ بّ.» 
بَلَمِ نَشَ فبِلٍن بَلَكِ يِرٍ، عَ عَ لِ عَ تِشِ عَ شَ سّرّشّ قّ مَ، عَ تَن نُن مٌوَبَ كُنتِفِيٍ. بَلَكِ نَشَ عَ مَشْرِن، «عَلَتَلَ مُنسٍ مَسٍنشِ؟» 
بَلَمِ نَشَ يِ مَسٍنيِ تِ عَ بّ، «بَلَكِ، كٍلِ. سِثٌرٌ شَ دِ شّمّ، عِ تُلِ مَتِ. 
عَلَ مِشِ مُ عَ رَ، عَ مُ وُلٍ قَلَمَ. عَدَ مَدِ مُ عَ رَ، عَ شَ عَ شَشِلِ مَسَرَ. عَ مُ عَ شُي مَسَرَ مَ. عَ مُ نّيمُمَ عَ شَ سَاتّ مَ. عَ مُ لَايِدِ كَنَمَ. 
عَلَ بَرَ ﭑ يَمَرِ ﭑ شَ دُبَ يِ حَمَ بّ. عَلَتَلَ بَرَ بَرَكَ سَ عٍ مَ. ﭑ مُ نْمَ نَ مَسَرَدٍ. 
تْورّ مُ لُمَ يَشُبَ بْنسْي يَ مَ. سٍتَرٍحَ مُ تٌمَ عِسِرَيِلَ. عٍ مَرِفِ عَلَتَلَ نَ عٍ قْشْ رَ. مَنفّ شُي مّمَ نّ عٍ تَفِ. 
عَلَتَلَ عٍ رَ مِنِشِ مِسِرَ بْشِ رَ، سّنبّ نَ عٍ يِ رَ عَلْ سّشّ نِنفٍ. 
كَرَ مْشْ وَلِ مُ نْمَ يَشُبَ بْنسْي تْورْدٍ. سٍمَتٌي مُ نْمَ سٍسٍ رَبَدٍ عِسِرَيِلَ شِلِ مَ. عَ قَمَ قَلَدٍ يَشُبَ نُن عِسِرَيِلَ شَ قٍ رَ، عَلَ شَ وَلِ مَتٌ! 
يِ حَمَ كٍلِمَ عَلْ يّتّ فِنّ، عٍ تِمَ عَلْ يّتّ شّمّ، نَشَن مُ عَ سَمَ قٌ عَ شَ سُبٍ دٌن، عَ نَشَن قَشَ، قٌ عَ شَ عَ وُلِ مِن.» 
بَلَكِ نَشَ عَ قَلَ بَلَمِ بّ، «شَ عِ مُ وَ مَ عٍ دَنكَقٍ، هَلِ عِ مُ دُبَ عٍ بّ.» 
بَلَمِ نَشَ عَ يَابِ، «ﭑ مُ عَ قَلَ عِ بّ، عَلَتَلَ نَ نَشَن يٌ مَسٍن ﭑ بّ، ﭑ نَ نَن قَلَمَ؟» 
بَلَكِ نَشَ عَ قَلَ بَلَمِ بّ، «عَوَ، وٌن شَ سِفَ يِرٍ فبّتّ. تّمُندٍ عَلَتَلَ تِنمَ عِ شَ يِ حَمَ دَنكَ ﭑ بّ مّننِ.» 
بَلَكِ نَشَ بَلَمِ شَنِن ثٍيٌرِ فٍيَ قَرِ، فبٍنفبٍرٍنيِ تٌمَ دّننَشّ. 
بَلَمِ نَشَ عَ قَلَ بَلَكِ بّ، «سّرّشّبَدٍ سٌلٌقٍرٍ تِ بٍ، عِ مَن شَ قَ تُورَ سٌلٌقٍرٍ نُن يّشّي كٌنتٌنيِ سٌلٌقٍرٍ رَ.» 
بَلَمِ نَشَن مَشْرِن، بَلَكِ نَشَ عَ بِرِن نَبَ. عَ نَشَ تُورَ كٍرٍن نُن يّشّي كٌنتٌنيِ كٍرٍن بَ سّرّشّ رَ نَ سّرّشّبَدٍ كٍرٍن كٍرٍن مَ قَرِ.