مَسٍنيِ دْنشْي.
33.
بٍينُ عَننَبِ مُنسَ شَ لَاشِرَ، عَلَ شَ مِشِ، عَ دُبَ نّ عِسِرَيِلَكَيٍ بّ. عَ شَ دُبّ مَسٍنيِ نَن يَ؛ 
«عَلَتَلَ كٍلِ نّ تُرُ سِنِنَ فٍيَ قَرِ عَلْ سٌفٍ. عَ نَشَ تٍ سٍيِرِ بْشِ مَ عِسِرَيِلَكَيٍ نُ نَ دّننَشّ. عَ نَشَ كٍلِ ثَرَن فٍيَ يِرٍقَنيِ مَ، مَلٍكّ فبٍفبٍ بِرَشِ عَ قْشْ رَ. 
عَلَتَلَ عِسِرَيِلَ بْنسْي شَنُمَ. عَ عَ شَ مِشِيٍ كَنتَمَ، نَشٍيٍ بِرَ مَ عَ شَ سّرِيّ قْشْ رَ. 
عَننَبِ مُنسَ بَرَ عَ شَ سّرِيّ قِ وٌن مَ. نَ سّرِيّ قِندِشِ يَشُبَ بْنسْي شَ دَرِيّ مَتٍ نَن نَ. 
عَلَتَلَ قِندِشِ عِسِرَيِلَ شَ مَنفّ نَن نَ، حَمَ مَنفّيٍ شَ مَلَنيِ عٍ نُن عِسِرَيِلَ بْنسْييٍ بِرِن نَ.» 
«عَلَتَلَ شَ رُبٍن بْنسْي شَ سِمَيَ شُن مَسَ. عَ شَ مِشِيٍ شَ فبٌ.» 
عَننَبِ مُنسَ يِ مَسٍنيِ نَن تِ يُدَ بْنسْي شَ قٍ رَ، «عَلَتَلَ شَ يُدَ بْنسْي شُي رَ مّ، عَلَكٌ عَ شَ فبِلٍن عَ شَ حَمَ مَ. عَ نَ كَتَقٍ. عَلَتَلَ شَ عَ مَلِ عَ يَشُييٍ يَ رَ.» 
عَننَبِ مُنسَ يِ مَسٍنيِ نَن تِ لٍوِ بْنسْي شَ قٍ رَ، «عَلَتَلَ، عِ بَرَ عِ شَ تْنشُمَيٍ تُمِمِ نُن عُرِ مِ سٌ لٍوِ بْنسْي يِ رَ. بْنسْي تِنشِنشِ نَن عٍ رَ عِ نَشٍيٍ مَتٌ مَسَ، عِ نَشٍيٍ مَكِيتِ مٍرِبَ يٍ شَ قٍ رَ. 
عٍ مُ بِرَ مَ عٍ بَبَ نُن عٍ نفَ سَفٌي شَ قْشْ رَ، شَ نَ مُ عٍ نفَشَكٍرٍنيِيٍ نُن عٍ شَ دِيٍ، عٍ تَن بِرَ مَ عِ شَ مَسٍنيِ فبَنسَن نَن قْشْ رَ، عٍ بِرَ مَ عِ شَ سَاتّ نَن تُن قْشْ رَ. 
عٍ تَن نَن عِ شَ يَامَرِ مَسٍنمَ يَشُبَ بْنسْييٍ بّ، عٍ تَن نَن عِ شَ سّرِيّ رَشَرَنمَ عِسِرَيِلَكَيٍ بِرِن نَ. عٍ تَن نَن مَن سُرَيِ بَمَ سّرّشّ رَ، عٍ سّرّشّ فَن دَاشِ بَ عِ شَ سّرّشّبَدٍ. 
عَلَتَلَ، عِ شَ سّنبّ قِ عٍ مَ، عِ شَ بَرَكّ سَ عٍ شَ قٍ بِرِن، عِ شَ عٍ فٍرٍقَيٍ رَكٌرِ، عِ شَ عٍ يَشُييٍ رَبِرَ عَلَكٌ عٍ نَشَ فبِلٍن شَنبِ رَ قٍقٍ مَ.» 
عَننَبِ مُنسَ يِ مَسٍنيِ نَن تِ بُنيَمِن بْنسْي شَ قٍ رَ، «عَلَتَلَ شَنُنتٍنيِ نَن لَنشِ عٍ مَ. عٍ مَرِفِ عَلَ عٍ رَتَنفَمَ نّ، عَ مَن لُمَ نّ عٍ تَفِ، عَ عٍ كَنتَمَ تّمُي بِرِن.» 
عَننَبِ مُنسَ يِ مَسٍنيِ نَن تِ يُسُقُ بْنسْي شَ قٍ رَ، «عَلَتَلَ بَرَ بَرَكّ سَ عٍ شَ بْشِ. عٍ يٍ سْتْمَ نّ كٍلِ كٌورٍ مَ، عٍ يٍ سْتْ كٍلِ بْشِ بُن مَ. 
سٌفٍ سَنسِيٍ رَقَنمَ نّ، كِكٍ يٌ كِكٍ بٌفِيٍ فبٍيلِ لُمَ نّ نَا. 
عٍ دَشَمُي قَنيِ سْتْمَ نّ عٍ شَ فٍيَيٍ قَرِ، نَشٍيٍ تِشِ نَا كَبِ عَ قْلّ. 
عَلَ شَ يِ بْشِ دَشَمُي سٍ قَن. نَشَن وْيّن وُرِ بِلِ رَدّشّشِ كُي، عَ شَ هِننّ يُسُقُ رَ، عَ نَشَن سُفَندِشِ مَنفّ رَ عَ نفَشَكٍرٍنيِيٍ تَفِ. 
شُننَكٍلِ نَ يُسُقُ بّ. عَ سّنبّ فبٌ عَلْ نِنفٍ تُورَ، قٍرِ قِرِن نَن نَ عَ شَ فٍرٍ سٌسٍ رَ عَلْ سّشّ نِنفٍ. عَ سِيٍ بِرِن بْنبْمَ نٍيٍ نَن نَ هَن يِرٍ مَكُيٍ. عٍقِرَ مِ شَ دِ وُيَشِيٍ نَن عَ قٍرِ سِنفٍ رَ. مَنَسِ شَ دِ وُيَشِيٍ نَن عَ قٍرِ قِرِن ندٍ رَ.» 
عَننَبِ مُنسَ يِ مَسٍنيِ نَن تِ سَبُلٌن بْنسْي شَ قٍ رَ، «سَبُلٌن بْنسْي، وٌ شَ سّيوَ يُلّيَ نَن كُي. عِسَكَرِ بْنسْي، وٌ شَ سّيوَ وٌ شَ كِرِ بَنشِ نَن كُي. 
وٌ وٌ دْشْبٌورٍيٍ شِلِمَ نّ، وٌ سّرّشّ بَ فٍيَ قَرِ عَلَ وَ شْن كِ مَ، بَرِ مَ وٌ وٌ بَلٌي سْتْمَ قْشْ يٍ نّ، عَ نُن هّيرِ نَشَن نَ مّيّنيِ كُي.» 
عَننَبِ مُنسَ يِ مَسٍنيِ نَن تِ فَدِ شَ قٍ رَ، «عَلَ شَ بَرَكّ سَ مِشِ شَ قٍ، نَشَن فَدِ شَ قٍ فبٌمَ. فَدِ مَلَبُمَ نّ، عَلْ يّتّ نَشَن عَ شَ سُبٍ عِبْوشِ دٌنمَ. 
فَدِ بَرَ بْشِ قَنيِ قِندِ عَ فبٍ رَ، عَلْ مَنفّ نَشَن عَ حّرّ مَ حَمَ يَ رَ. عَ بَرَ عَلَتَلَ شَ نَتّ رَكَمَلِ، عَ مَن بَرَ عَلَ شَ كِيتِ سَ عِسِرَيِلَ مَ.» 
عَننَبِ مُنسَ يِ مَسٍنيِ نَن تِ دَنَ بْنسْي شَ قٍ رَ، «دَنَ لُشِ نّ عَلْ يّتّ يْرّ، نَشَن تُفَنمَ بَسَن بْشِ مَ.» 
عَننَبِ مُنسَ يِ مَسٍنيِ نَن تِ نَقَتَلِ بْنسْي شَ قٍ رَ، «شُننَقَنيِ فبٍفبٍ نَ نَقَتَلِ نَن بّ. عَلَتَلَ عَ رَكَمَلِشِ قٍ قَنيِ رَ. عَ شَ بْشِ شَ فبٌ يّ سٌفٍفٌرٌدٍ نُن يِرٍقَنيِ.» 
عَننَبِ مُنسَ يِ مَسٍنيِ نَن تِ عَسٍرِ بْنسْي شَ قٍ رَ، «عَلَتَلَ شَ بَرَكّ سَ عَسٍرِ، يَشُبَ شَ دِيٍ تَفِ. عَ نفَشَكٍرٍنيِيٍ شَ هِننّ عَ رَ. عَ شَ تُرٍ شَ فبٌ هَن. 
عَ شَ نَادّيٍ شَ يَءِلَن وُرٍ نُن وُرٍ فبٍيلِ رَ. عَ سّنبّ شَ بُ عَلْ عَ شَ سِمَيَ.» 
«عِسِرَيِلَ، عَلَ مَنِيّ يٌ مُ نَ. عَ عَ حّرّ مَ كٌورٍ مَ قَقٍ رَ عِ مَلِدٍ. عَ نُشُي عِفِرِ مَ نْرّ رَ. 
عَلَ، قْلّ مُ نَشَن بّ، نَ نَن عِ كَنتَمَ رَ، عَ بّلّشّ نَ عِ بُن كَبِ قٍ قْلْ قْلّ. عَ تَن نَن عِ يَشُييٍ كٍرِ مَ عِ يَ رَ، عَ مَن قَ عَ مَسٍن عِ بّ عِ شَ عٍ هَلَكِ. 
عِسِرَيِلَ سَبَتِمَ كَنتَرِ نَن كُي. يَشُبَ بْنسْي لُمَ عَلَ نِينِ نَن بُن مَ. مّنفِ نُن وّنِ فبٌمَ نّ نَ بْشِ كُي، يٍ قَن كٍلِمَ نّ كٌورٍ مَ. 
سّيوّ نَ وٌ بّ، عِسِرَيِلَكَيٍ. وٌ مَنِيّ يٌ مُ نَ سِيٍ تَفِ، عَلَتَلَ نَشَن كِسِشِ، عَ نَشَن كَنتَشِ، عَ نَشَن شُن نَكٍلِشِ. وٌ يَشُييٍ قَمَ نّ عٍ مَفٌرٌدٍ وٌ يَ رَ، وٌ قَن عٍ شَ بَتُدٍيٍ كَنَمَ نّ.»