سَمُوٍلِ ١.
13.
سْلُ نُ بَرَ حّ تٌنفٌ سَشَن سْتْ عَ تٌ قِندِ مَنفّ رَ. عَ شَ مَنفّيَ بُ نّ حّ تٌنفٌ نَانِ نُن قِرِن. 
سْلُ نَشَ شّمّ وُلُ سَشَن سُفَندِ سْورِيٍ رَ عِسِرَيِلَ. شّمّ وُلُ قِرِن نُ نَ عَ سّيتِ مَ مِكِمَسِ نُن بٍتٍلِ فٍيَ قَرِ، شّمّ وُلُ كٍرٍن نُ نَ عَ شَ دِ يٌنَتَن سّيتِ مَ فِبٍيَ، بُنيَمِن شْنيِ. عَ نَشَ حَمَ دْنشْييٍ رَفبِلٍن عٍ شْنيِ. 
لْشْي ندٍ يٌنَتَن نَشَ قِلِسِتَكَيٍ شَ سْورِيٍ بْنبْ، نَشٍيٍ نُ نَ فٍبَ. قِلِسِتَكَ بٌورٍيٍ نَشَ نَ قٍ مّ. سْلُ نَشَ يَامَرِ قِ قٍرِ شَ قٍ بْشِ بِرِن كُي، عِسِرَيِلَكَيٍ شَ عَ رَ مّ. 
عِسِرَيِلَ بِرِن نَشَ عَ مّ عَ سْلُ بَرَ قِلِسِتَكَيٍ شَ سْورِيٍ بْنبْ، عِسِرَيِلَ نَشَ رَحَاشُ قِلِسِتَكَيٍ مَ. عِسِرَيِلَ حَمَ نَشَ مَلَن سْلُ قّ مَ فِلِفَلِ. 
قِلِسِتَكَيٍ قَن نَشَ عٍ مَلَن عِسِرَيِلَ فٍرٍ شِلِ مَ. سْورِ رَفِسٍ وُلُ تٌنفٌ سَشَن نَن نُ نَ عٍ يِ رَ، عَ نُن سٌي رَفِيٍ وُلُ سٍننِ. نَ حَمَ نُ وُيَ عَلْ مّيّنيِ نَشَن نَ بَا دّ رَ. عٍ نَشَ يٌنكِن مِكِمَسِ، بٍتِ عَوٍنِ سٌفٍتٍدٍ. 
عِسِرَيِلَ مِشِيٍ بْحّ نَشَ رَحَاشُ عٍ مَ، بَرِ مَ قِلِسِتَكَيٍ نُ بَرَ عٍ رَشّتّن. عٍ نَشَ سِفَ عٍ نْشُن قْنمّيٍ نُن يِلِيٍ كُي فّمّ يِرٍ. 
ندٍيٍ نَشَ يُرُدّن شُرٍ عِفِرِ، عٍ سِفَ فَدِ نُن فَلَدِ بْشِ مَ. سْلُ نُ نَ فِلِفَلِ. حَمَ نَشَن نُ نَ عَ قّ مَ، نٍيٍ بِرِن نُ بَرَ فَاشُ كِ قَنيِ رَ. 
سْلُ نَشَ سَمُوٍلِ مَمّ شِ سٌلٌقٍرٍ عَلْ عٍ نُ لَنشِ عَ مَ كِ نَشّ، كْنْ سَمُوٍلِ مُ قَ، حَمَ نَشَ يٍنسٍن قْلْ. 
نَ كُي سْلُ نَشَ يَامَرِ قِ، «وٌ قَ سّرّشّ فَن دَاشِ رَ، عَ نُن شَنُنتٍيَ سّرّشّ.» عَ نَشَ نَ سّرّشّ فَن دَاشِ بَ. 
عَ تٌ فّ نَ رَ، سَمُوٍلِ نَشَ سٌ. سْلُ نَشَ سِفَ عَ شّيبُدٍ. 
سَمُوٍلِ نَشَ عَ مَشْرِن، «عِ مُنسٍ رَبَشِ؟» سْلُ نَشَ عَ يَابِ، «ﭑ تٌ عَ تٌ حَمَ نَ يٍنسٍنقٍ، عِ تَن مُ قَشِ عَ وَشَتِ، عَ نُن مَن قِلِسِتَكَيٍ بَرَ مَلَن مِكِمَسِ، 
ﭑ نَشَ عَ مَحْشُن، ‹قِلِسِتَكَيٍ فٌرٌ مَ نّ ﭑ قْشْ رَ فِلِفَلِ، بٍينُن ﭑ شَ عَلَتَلَ مَشَندِ.› نَ نَن عَ رَ، قّيرّ تٌ مُ نَ ﭑ يِ، ﭑ بَرَ سّرّشّ فَن دَاشِ بَ.» 
سَمُوٍلِ نَشَ عَ قَلَ سْلُ بّ، «عِ بَرَ شَشِلِتَرٍحَ رَبَ عِ مَرِفِ عَلَتَلَ شَ سّرِيّ مَتَندِقٍ رَ. عَلَتَلَ نُ وَ مَ عِ شَ مَنفّيَ رَ سَبَتِقٍ عِسِرَيِلَ شُن مَ عَبَدَن، 
كْنْ يَكْسِ عِ شَ مَنفّيَ بَرَ كَنَ. عَلَتَلَ بَرَ مِشِ فبّتّ قٍن نَشَن بْحّ لَنشِ عَلَ بْحّ مَ. عَ بَرَ نَ كَنيِ تِ مَنفّ رَ عَ شَ حَمَ شُن مَ، بَرِ مَ عِ تَن مُ عَلَتَلَ شَ يَامَرِ رَبَتُشِ.» 
نَ تّمُي سَمُوٍلِ نَشَ كٍلِ فِلِفَلِ، عَ سِفَ فِبٍيَ، بُنيَمِن بْنسْي شَ بْشِ. سْلُ نَشَ عَ شَ سْورِيٍ كْنتِ، عَ قَ لِ شّمّ مِشِ كّمّ سٍننِ نُ نَ عَ يِ رَ. 
سْلُ نُن عَ شَ دِ شّمّ يٌنَتَن نَشَ عٍ شَ سْورِيٍ تِ عَ فٍرٍ كِ مَ فٍبَ بُنيَمِن شْنيِ. قِلِسِتَكَيٍ نُ تِشِ مِكِمَسِ. 
سْورِ فَلِ سَشَن نَشَ مِنِ قِلِسِتَكَيٍ شَ يٌنكِندٍ. كٍرٍن نَشَ عٍ شُن تِ عٌقَرَ كِرَ رَ، سُوَلِ بْشِ مَبِرِ. 
كٍرٍن نَشَ عٍ شُن تِ بٍتِ شٌرٌن كِرَ رَ. كٍرٍن نَشَ عٍ شُن تِ نَانِنيِ كِرَ رَ، نَشَن فٌرٌ مَ سٍبٌيِمَ فُلُنبَ فبٍنفبٍرٍنيِ قّ مَ. 
شَبُي يٌ مُ نُ تٌمَ عِسِرَيِلَ بْشِ بِرِن مَ، بَرِ مَ قِلِسِتَكَيٍ نُ بَرَ يِ تْنيِ دْشْ، «عٍبُرُ مِشِيٍ نَشَ سَنتِدّفّمَ نُن تَنبّ يٌ يَءِلَن.» 
عِسِرَيِلَكَيٍ بِرِن نُ سِفَمَ قِلِسِتَكَيٍ نَن شْن مَ، عٍ شَ وَلِسٍيٍ رَلُفَندٍ عَلْ كٍرِيٍ، بْشِ بُشَ سٍيٍ، نُن بٍيرَيٍ. 
بْشِ بُشَ سٍ نُن كٍرِ رَلُفَن سَرٍ قِندِشِ فبٍتِ فِرَ مُ سٌلٌمَسَشَن نَن نَ. بٍيرَ نُن سْشْسٍ رَلُفَن سَرٍ قِندِشِ فبٍتِ فِرَ مُ نَانِ نَن نَ. 
نَ نَن عَ نِيَ فٍرٍ لْشْي سَنتِدّفّمَ نُن تَنبّ مُ نُ نَ عِسِرَيِلَكَ يٌ يِ رَ، هَلِ سْلُ نُن عَ شَ دِ يٌنَتَن. 
قِلِسِتَكَيٍ شَ سْورِ فَلِ ندٍ نَشَ قَ يٌنكِن مِكِمَسِ يَتَفِ.