عَلَ شَ مَسٍنيِ قِرِن ندٍ عَننَبِ سَمُوٍلِ بّ.
1.
سْلُ قَشَ شَنبِ، دَوُدَ نَشَ فبِلٍن سِكِلَفَ كٍلِقٍ عَمَلّكِكَيٍ بْنبْدٍ. عَ نَشَ لُ نَا شِ قِرِن. 
عَ شِ سَشَن ندٍ، شّمّ ندٍ نَشَ قَ كٍلِ سْلُ يِرٍ. عَ نُ بَرَ عَ شَ دٌنمَ عِبْو عَ مَ، عَ بّندّ سٌ عَ شُنيِ مَ سُننُن قٍ مَ. عَ تٌ سٌ دَوُدَ يِرٍ، عَ نَشَ عَ شِنبِ سِن عَ بُن مَ بِنيّ كُي. 
دَوُدَ نَشَ عَ مَشْرِن، «عِ كٍلِشِ مِندٍن؟» عَ نَشَ عَ يَابِ، «ﭑ نَن ﭑ فِشِ عِسِرَيِلَ شَ فَلِ نَن يَ مَ.» 
دَوُدَ نَشَ عَ قَلَ عَ بّ، «مُنسٍ دَنفِشِ نَا؟ نَ تَفِ رَبَ ﭑ بّ.» عَ نَشَ عَ يَابِ، «عِسِرَيِلَكَيٍ بَرَ عٍ فِ فٍرٍ مَ. مِشِ فبٍفبٍ بَرَ قَشَ عٍ يَ مَ. هَلِ سْلُ نُن عَ شَ دِ شّمّ يٌنَتَن بَرَ لَاشِرَ.» 
دَوُدَ نَشَ عَ قَلَ شّمّ بّ، نَشَن نُ دّنتّفّ سَقٍ عَ بّ، عَ نَشّ، «عِ تَن عَ كٌلٌنشِ دِ، عَ سْلُ نُن عَ شَ دِ شّمّ يٌنَتَن بَرَ لَاشِرَ؟» 
عَ نَشَ عَ يَابِ، «ﭑ سْلُ لِ فِلِبٌوَ فٍيَ نَن قَرِ عَ مَشْنْشِ عَ حَاشِ رَ. عَ نُ وَ مَ عَ يّتّ قَشَقٍ تَنبّ رَ، بَرِ مَ قِلِسِتَ سْورِ سٌي رَفِيٍ نُ بَرَ عَ رَشّتّن. 
عَ تٌ ﭑ تٌ، عَ نَشَ ﭑ شِلِ. ﭑ نَشَ عَ رَتِن. 
عَ نَشّ، ‹ندٍ نَ عِ تَن نَ؟› ﭑ نَشَ عَ يَابِ، ‹عَمَلّكِكَ ندٍ نَن ﭑ نَ.› 
عَ نَشَ عَ قَلَ ﭑ بّ، ‹ﭑ مُ فّشِ قَشَدٍ، عِ شَ ﭑ مَلِ ﭑ شَ قَشَ.› 
نَ كُي ﭑ نَشَ عَ قَشَ، بَرِ مَ ﭑ نَ كٌلٌن، عَ مُ كِسِمَ قٍوٌ. ﭑ نَشَ قَ عَ شَ مَنفّ تْنشُمَ نُن عَ شَ بّلّشّ رَ سٌي رَ عِ تَن ﭑ مَرِفِ شْن مَ.» 
دَوُدَ نُن عَ شَ مِشِيٍ نَشَ عٍ شَ دٌنمَيٍ عِبْو سُننُنيِ كُي نَ دّنتّفّ شَ قٍ رَ. 
عٍ نَشَ سْلُ، عَ شَ دِ شّمّ يٌنَتَن، نُن عَلَتَلَ شَ حَمَ عِسِرَيِلَ بْنسْي شَ حْنقٍ رَبَ، نَشٍيٍ قَشَشِ فٍرٍ كُي. عٍ نَشَ وَ، عٍ نَشَ سُن هَن نُنمَرٍ نٍيٍ شَ قٍ رَ. 
دَوُدَ نَشَ نَ شّمّ مَشْرِن، نَشَن قَ دّنتّفّ سَ عَ بّ، «عِ كٍلِ مِندٍن؟» عَ نَشَ عَ يَابِ، «شْحّ عَمَلّكِكَ شَ دِ نَن ﭑ نَ.» 
دَوُدَ نَشَ عَ مَشْرِن، «عِ تَن مُ فَاشُ عَلَ شَ مِشِ سُفَندِشِ قَشَدٍ؟» 
دَوُدَ نَشَ عَ شَ سْورِ ندٍ شِلِ، عَ عَ يَمَرِ، «يِ شّمّ قَشَ!» عَ نَشَ نَ رَبَ. 
دَوُدَ نَشَ عَ قَلَ نَ عَمَلّكِكَ بّ، «عِ تٌ عَ قَلَ عَ عِ بَرَ عَلَ شَ مِشِ سُفَندِشِ قَشَ، عِ بَرَ عِ يّتّ شُن نَكَنَ. عَ لَنمَ عِ شَ قَشَ.» 
دَوُدَ نَشَ يِ سُوكِ سّبّ سْلُ نُن عَ شَ دِ شّمّ يٌنَتَن شَ قٍ رَ، 
عَ قَ يَمَرِ قِ يُدَيَكَيٍ شَ عَ شَرَن. عَ شِلِ نّ «شَلِ شَ سُوكِ.» عَ سّبّشِ يَسَرِ شَ بُكِ كُي. 
«عِسِرَيِلَ، وٌ شَ مَنفّ شُنفبٍ بَرَ لَاشِرَ فٍيَ قَرِ، سْورِ قَنيِيٍ بَرَ قَشَ. 
وٌ نَشَ نَ قَلَ فَتِ تَا كُي، وٌ نَشَ نَ شِبَارُ مَسٍن عَسِكَلْن تَا كُي، عَلَكٌ قِلِسِتَ دِ فِنّيٍ نَشَ قَ سّيوَ، عَلَكٌ عٍ تَن سُننَتَرٍيٍ شَ دِ فِنّيٍ نَشَ قَ حّلّشِن. 
فِلِبٌوَ فٍيَيٍ، تُنّ نُن شِنِ نَشَ بِرَ وٌ مَ، وٌ شَ شّيٍ نَشَ قَن، بَرِ مَ مَنفّ سْلُ شَ كَنكٍ مَكَنتَسٍ بَرَ يَافِ سْتْ نَا، تُرٍ يٌ مُ سٌمَ عَ مَ سْنْن!» 
«يٌنَتَن شَ شَلِ بَرَ سْورِ شُنفبٍيٍ قَشَ، سْلُ شَ تَنبّ شَ وَلِ بَرَ سْونّيَ. 
سْلُ نُن يٌنَتَن نَشٍيٍ نُ رَقَنشِ مِشِيٍ مَ عٍ شَ سِمَيَ كُي، عٍ بِرِن قَ قَشَ لْشْي كٍرٍن. عٍ نُ شُلُن دَنفِ سّفّيٍ رَ. عٍ سّنبّ نُ فبٌ دَنفِ يّتّيٍ رَ. 
عِسِرَيِلَ دِ فِنّيٍ، وٌ شَ وَ سْلُ شَ قٍ رَ، نَشَن نُ دُفِ قَنيِيٍ رَفٌرٌ مَ وٌ مَ، نَشَن نُ شّيمَ قِمَ وٌ مَ شُنمَسٍيٍ رَ.» 
«كٌرٌفبَيٍ بَرَ قَشَ فٍرٍ كُي. يٌنَتَن بَرَ لَاشِرَ وٌ شَ فٍيَيٍ قَرِ. 
يٌنَتَن نفَشَكٍرٍنيِ، ﭑ سُننُنشِ عِ شَ قٍ رَ. عِ شَ قٍ نُ شْرْشْ ﭑ مَ! عِ شَ شَنُنتٍيَ نُ نَ ﭑ بّ دَنفِ فِنّيٍ شَ شَنُنتٍيَ رَ. 
كٌرٌفبَيٍ بَرَ قَشَ فٍرٍ كُي. فٍرٍ سٌسٍيٍ بَرَ كَنَ.»