يُدَيَ مَنفّيٍ ١.
11.
عِسِرَيِلَكَيٍ بِرِن نَشَ عَ مَسٍن دَوُدَ بّ شٍبِرٌن، «وٌن وُلِ كٍرٍن، قَسّ كٍرٍن. 
هَلِ مَنفّ سْلُ شَ وَشَتِ عِ تَن نَن نُ عِسِرَيِلَ رَحّرّ مَ. عِ مَرِفِ عَلَتَلَ نَشَ عَ مَسٍن عِ بّ، ‹عِ شَ ﭑ مَ حَمَ عِسِرَيِلَ رَحّرّ، عِ شَ قِندِ عٍ شَ يَرٍرَتِ رَ.›» 
عِسِرَيِلَ قٌرِيٍ بِرِن نَشَ سِفَ عَ قْشْ رَ شٍبِرٌن. دَوُدَ نَشَ سَاتّ شِرِ عٍ تَفِ عَلَتَلَ يَ عِ. عٍ نَشَ تُرٍ سَ عَ شُنيِ مَ عِسِرَيِلَ مَنفّ كِ مَ، عَلْ عَلَتَلَ نُ بَرَ عَ مَسٍن عَننَبِ سَمُوٍلِ بّ كِ نَشّ. 
مَنفّ دَوُدَ نُن عِسِرَيِلَكَيٍ نَشَ سِفَ دَرِ سَلَمُ، نَشَن مَن نُ شِلِ يٍبُسُ، بَرِ مَ يٍبُسُ بْنسْي نُ سَبَتِشِ نَا. 
عٍ نَشَ عَ قَلَ دَوُدَ بّ، «عِ مُ سٌمَ بٍ قٍوٌ.» كْنْ دَوُدَ نَشَ نْ سِيٌن يِرٍ مَكَنتَشِ مَسْتْدٍ. نَ كُي عٍ مّننِ شِلِ قَلَ دَوُدَ شَ تَا. 
دَوُدَ نُ بَرَ عَ قَلَ، «نَشَن سِنفٍ نَ يٍبُسُ فٍرٍ، ﭑ نَ كَنيِ قِندِ مَ نّ مَنفّ رَ.» سٍرُيَ شَ دِ يٌوَبَ سِنفٍ نَن فٍرٍ سٌ، عَ قَ قِندِ سْورِيٍ شَ مَنفّ رَ. 
دَوُدَ نَشَ سَبَتِ نَ يِرٍ مَكَنتَشِ كُي، نَ نَ عَ رَ نَا شِلِ نَشَ قَلَ دَوُدَ شَ تَا. 
دَوُدَ نَشَ مّننِ نُن عَ رَبِلِنيِ يَءِلَن. يٌوَبَ قَن نَشَ وَلِ فبّتّ رَبَ دَرِ سَلَمُ عَلَكٌ نَا شَ قَن. 
دَوُدَ سّنبّ نُ لُمَ فبٌ رَ، بَرِ مَ عَ نُن مَنفّ عَلَتَلَ نَن نُ عَ رَ. 
دَوُدَ شَ سْورِ شُنيِ، نَشٍيٍ بَرَ عَ مَلِ عِسِرَيِلَ مَنفّيَ سْتْدٍ، عَلْ عَلَتَلَ نُ بَرَ عَ مَسٍن كِ نَشّ، 
نَ سْورِ فبَنفبَلَنيِيٍ شِلِيٍ نَن يَ؛ شَكِمٌنِ شَ دِ يَسٌبٍيَمِ، نَشَن قِندِ عٍ شُنيِ رَ. عَ نُ بَرَ مِشِ كّمّ سَشَن قَشَ تَنبّ رَ فٍرٍ كٍرٍن كُي. 
عَ قِرِن ندٍ قِندِ دٌدَيِ شَ دِ عٍلٍيَسَرِ نَن نَ، عَشٌوَكَ. عَ نُ نَ دَوُدَ شَ سّنبّمَ سَشَنيِيٍ يَ مَ. 
عَ نُ بَرَ دَوُدَ مَلِ قِلِسِتَكَيٍ فٍرٍدٍ ثَسِ دَ مِمِ. عَ شَ سْورِيٍ نَشَ عٍ فِ قِلِسِتَكَيٍ مَ، مّنفِ شّ نُ دّننَشّ. 
كْنْ عٍلٍيَسَرِ نَشَ لُ نَا هَن عَ قِلِسِتَكَيٍ بْنبْ عَلَتَلَ شَ مَلِ رَ. 
يَرٍرَتِ سَشَن، دَوُدَ شَ يَرٍرَتِ تٌنفٌ سَشَنيِيٍ يَ مَ، نَشَ سِفَ دَوُدَ يِرٍ عَدُلَمَ قْنمّ رَ. قِلِسِتَكَيٍ نُ تِشِ رٍقَ فُلُنبَ كُي. 
نَ وَشَتِ دَوُدَ نُ سَبَتِشِ يِرٍ مَكَنتَشِ، قِلِسِتَكَيٍ نُ سَبَتِشِ بّتّلّيمُ مَبِرِ. 
دَوُدَ نَشَ عَ سَفٌ ندٍ قَلَ، «عَ شْلِ ﭑ مَ ﭑ شَ بّتّلّيمُ كْلْنيِ يٍ مِن.» 
نَ سْورِ يَرٍرَتِ سَشَنيِيٍ نَشَ قِلِسِتَكَيٍ شَ نَانِنيِ عِفِرِ، عٍ سَ يٍ بَ كْلْنيِ رَ نَشَن نَ بّتّلّيمُ نَادّ رَ. عٍ تٌ قَ نَ يٍ رَ دَوُدَ بّ، عَ نَشَ تٌندِ عَ مِندٍ. عَ نَشَ عَ عِقِلِ بْشِ مَ سّرّشّ رَ عَلَتَلَ بّ. 
عَ نَشَ عَ قَلَ، «عَلَ شَ ﭑ نَتَنفَ نَ مَ. ﭑ مُ نْمَ يِ يٍ مِندٍ، ﭑ مَ شّمّيٍ نَشَن سْتْشِ ﭑ بّ عٍ نِي سَرٍ رَ. نَ لُمَ عَلْ عٍ نِي تِدٍ مُ فبٌ ﭑ بّ.» نَ كُي عَ نَشَ تٌندِ نَ يٍ مِندٍ عَ شَ سّنبّمَ سَشَنيِيٍ نَشَن سْتْ عَ بّ. 
يٌوَبَ نفَشَكٍرٍنيِ عَبِسَيِ نَن نُ قِندِشِ نَ سّنبّمَ سَشَنيِيٍ شُنيِ رَ. عَ نُ بَرَ شّمّ كّمّ سَشَن قَشَ عَ شَ تَنبّ رَ. عَ نَشَ شِلِ شُنفبٍ سْتْ نَ شّمّ سَشَنيِيٍ يَ مَ. 
عٍ نَشَ عَ بِنيَ، عٍ عَ قِندِ عٍ شَ مَنفّ رَ، كْنْ عَ مُ لُ عٍ يَ مَ. 
يٍهٌيَدَ شَ دِ بّنَيَ كَبَسٍيلِكَ نُ قِندِشِ سْورِ مَفَاشُشِ نَن نَ. عَ نُ بَرَ قٍ شُنفبٍ فبٍفبٍ رَبَ، عَلْ عَرِيّلِ مٌوَبَكَ قِرِنيِ قَشَقٍ. عَ مَن نَشَ يّتّ ندٍ قَشَ كْلْنيِ كُي بَلَبَلَنيِ تّمُي. 
لْشْي ندٍ عَ نَشَ مِسِرَكَ فبَنفبَلَنيِ ندٍ قَشَ، نَشَن شَ مَءِتٍيَ كَنكٍ يَ قِرِن لِمَ. تَنبّ بٍلٍبٍلٍ نُ نَ نَ مِسِرَكَ يِ رَ، نَشَن فبٌ عَلْ دُفِ سْشْ وُرِ. بّنَيَ نَشَ نَ بَ عَ يِ رَ، عَ عَ قَشَ عَ يّتّ شَ تَنبّ رَ. 
يٍهٌيَدَ شَ دِ بّنَيَ شَ قٍ شُنفبٍ نَن نَ كِ. عَ شِلِ فبٌ نَ سّنبّمَ سَشَنيِ يَ مَ. 
عَ نَشَ بِنيّ سْتْ دَنفِ نَ شّمّ تٌنفٌ سَشَن نَ، كْنْ عَ سّنبّ مُ نُ فبٌ نَ سّنبّمَ سَشَنيِيٍ بّ. دَوُدَ شَ فُندٌ سْورِ نَن نُ عَ رَ. 
سّنبّمَ فبّتّيٍ نَن يَ؛ يٌوَبَ شُنيَ عَسَهّلِ، دٌدٌ شَ دِ عٍلٍشَنَن بّتّلّيمُكَ، 
سَمٌتِ هَرٌرِكَ، شّلّسِ ثٍلٌنكَ، 
عِكٍسِ شَ دِ عِرَ تٍكٌوَكَ، عَبِيٍسٍرِ عَنَتْتِكَ، 
سِبٍكَيِ شُسَكَ، عِلَيِ عَشٌوَكَ، 
مَهَرَيِ نٍتٌقَكَ، بَاننَ شَ دِ شٍلٍدَ نٍتٌقَكَ، 
رِبَيِ شَ دِ عِتَيِ، نَشَن كٍلِ فِبِيَ بُنيَمِن بْنسْي شَ بْشِ مَ، بّنَيَ ثِرَتٌنكَ، 
شُرَيِ نَشَن كٍلِ فَاسِ فُلُنبَ يِرٍ، عَبِيّلِ عَرَبَكَ، 
عَسَمَقٍتِ بَشُرِ مِكَ، عٍلِيَبَ سَالَبٌنكَ، 
هَسٍمِ شَ دِيٍ فِسٌنكَيٍ، سَافٍ شَ دِ يٌنَتَن هَرَرَكَ، 
سَكَرَ شَ دِ عَشِيَمَ هَرَرَكَ، عُرُ شَ دِ عٍلِقَلَ، 
شٍقٍرِ مٍكٍرَكَ، عَهِيَ ثٍلٌنكَ، 
شٍسٍرٌ كَرٍ مٍلٍكَ، عٍسِبَيِ شَ دِ نَارَيِ، 
نَتَن نفَشَكٍرٍنيِ يٌوٍلِ، هَفَرِ شَ دِ مِبِشَرِ، 
سّلّكِ عَمٌنِكَ، نَشَرَيِ بٍرٌتِكَ، سٍرُيَ شَ دِ يٌوَبَ شَ فٍرٍ سٌسٍ شَنِنمَ، 
عِرَ نُن فَرٍبٍ يَتِرِكَيٍ، 
عُرِيَ شِتِكَ، عَشَلَيِ شَ دِ سَبَدِ، 
سِيسَ شَ دِ عَدِنَ رُبٍنكَيٍ شَ مَنفّ نُن عَ شَ مِشِ تٌنفٌ سَشَن، 
مَاكَ شَ دِ شَنَن، يٌسَقَتِ مِتِنِكَ، 
عُسِيَ عَسَتَرٌتِكَ، شٌتَمَ شَ دِيٍ سَامَ نُن يٍيِيٍلِ عَرٌوٍرِكَيٍ، 
سِمِرِ شَ دِيٍ يٍدِيَيٍلِ، يٌشَ شُنيَ تِسِكَ، 
عٍلِيٍلِ مَشَوِكَ، عٍلِيٍلِ شَ دِيٍ يٍرِبَيِ نُن يٌسَوِيَ، عِتِمَ مٌوَبَكَ، 
عٍلِيٍلِ، عٌبٍدٌ، نُن يَاسِيّلِ مٍسٌبَكَ.