عَيُبَ شَ تَرُشُي.
1.
شّمّ ندٍ نُ نَ عُسُ بْشِ مَ نَشَن نُ شِلِ عَيُبَ. مِشِ هَفِفّ نَن نُ لَنشِ عَ مَ، عَ مَتِنشِن. عَ نُ فَاشُمَ عَلَ يَ رَ، عَ مُ نُ بِرَ مَ قٍ حَاشِ قْشْ رَ. 
دِ شّمّ سٌلٌقٍرٍ نُن دِ فِنّ سَشَن نُ نَ عَ يِ رَ. 
عَ شَ فْورّ نُ لَنشِ يّشّي وُلُ سٌلٌقٍرٍ، حْشْمّ وُلُ سَشَن، نِنفٍ وُلُ كٍرٍن، عَ نُن سٌقَلٍ كّمّ سُولِ نَن مَ. وَلِكّ فبٍفبٍ سَشِ نَ نَن قَرِ. بِنيّ نُ سَشِ يِ شّمّ مَ دَنفِ مِشِ بِرِن نَ نَ سٌفٍتٍدٍ بِرِ رَ. 
عَ شَ دِيٍ نُ شُلُنيِ تِمَ نّ عٍ بٌورٍ شْنيِيٍ، عٍ نُ عٍ مَافِنّيٍ شِلِ عَلَكٌ عٍ بِرِن شَ نُ عٍ دّفٍ يِرٍ كٍرٍن. 
شُلُنيِيٍ نَ بَ عَ رَ، عَيُبَ نُ سّرّشّ فَن دَاشِيٍ بَمَ نّ عَ شَ دِ بِرِن بّ عٍ رَ سّنِيّنقٍ رَ. عَ نُ عَ مَحْشُنمَ نّ عَ تّمُندٍ عٍ بَرَ يُنُبِ ندٍ سْتْ، شَ نَ مُ عَ رَ عٍ بَرَ عَلَ دَنكَ عٍ بْحّ كُي. نَ كُي عَيُبَ نُ لُمَ سّرّشّ بَ رَ عٍ بّ تّمُي بِرِن. 
لْشْي ندٍ عَلَ شَ مَلٍكّيٍ نَشَ قَ عَلَتَلَ يِرٍ. سٍنتَنّ قَن نُ نَ عٍ يَ مَ. 
عَلَتَلَ نَشَ سٍنتَنّ مَشْرِن، «عِ كٍلِشِ مِندٍن؟» سٍنتَنّ نَشَ عَ يَابِ، «ﭑ كٍلِشِ دُنِحَ عِحّرّدٍ.» 
عَلَتَلَ مَن نَشَ عَ مَشْرِن، «عِ بَرَ ﭑ مَ كٌنيِ عَيُبَ رَكْرْ سِ؟ عَ مَنِيّ يٌ مُ نَ دُنِحَ مَ. عَ قَن، عَ تِنشِن. عَلَ يَرَفَاشُي نَن عَ رَ، قٍ حَاشِ مُ رَقَن عَ مَ.» 
سٍنتَنّ نَشَ عَ يَابِ، «عَيُبَ شَ فَاشُي عِ يَ رَ تُن مُ عَ رَ؟ 
عِ مُ عَ كَنتَشِ شّ، عَ تَن، عَ شَ دٍنبَيَ، نُن عَ هَرِفٍ بِرِن؟ عِ بَرَ بَرَكّ سَ عَ سُشُقٍ بِرِن مَ، عَلَكٌ عَ شَ فْورّ شَ فبٌ تُن. 
كْنْ شَ عَ سَ لِ عِ نَشَ دِن عَ هَرِفٍ رَ، ﭑ شَ عَ قَلَ عِ بّ، عَ قَمَ نّ عِ دَنكَدٍ كٍرٍن نَ.» 
عَلَتَلَ نَشَ عَ قَلَ سٍنتَنّ بّ، «عَوَ يِرٍ، ﭑ بَرَ عَ هَرِفٍ بِرِن سَ عِ سَفٌي، كْنْ عِ نَشَ عَ فُندِ تْورْ دٍ.» نَ تّمُي سٍنتَنّ نَشَ كٍلِ عَلَتَلَ يِرٍ. 
لْشْي ندٍ عَيُبَ شَ دِيٍ نُ نَ شُلُنيِ تِقٍ عٍ تَارَ شْنيِ. 
شّيرَ ندٍ نَشَ قَ عَيُبَ يِرٍ، عَ عَ قَلَ عَ بّ، «عِ شَ وَلِكّيٍ نُ نَ نِنفٍيٍ رَوَلِقٍ شّ مَ، سٌقَلٍيٍ قَن نُ نَ عٍ دّ مَدٌنقٍ نَ لٌنفٌرِ. 
سٍبَكَ ندٍيٍ نَشَ دِن عِ شَ وَلِكّيٍ رَ، عٍ عٍ قَشَ سَنتِدّفّمَ رَ. عٍ مَن نِنفٍيٍ قَن شَنِن. ﭑ كٍرٍن ثٍتِ نَن نْ ﭑ يّتّ بَدٍ عٍ يِ. ﭑ قَشِ نَ قٍ نَن دّنتّفّدٍ عِ بّ.» 
نَ مُ فّ نَ مَسٍنيِ رَ، شّيرَ فبّتّ نَشَ قَ، عَ عَ قَلَ عَيُبَ بّ، «عَلَ بَرَ عَ رَفِرِ فَلَنيِ شَ فٌرٌ عِ شَ يّشّييٍ نُن عٍ مَكَنتَمَيٍ مَ. عَ بَرَ عٍ بِرِن قَشَ. ﭑ كٍرٍن ثٍتِ نَن نْ ﭑ يّتّ بَدٍ عٍ يِ. ﭑ قَشِ نَ قٍ نَن دّنتّفّدٍ عِ بّ.» 
نَ قَن مُ فّ عَ شَ مَسٍنيِ رَ، شّيرَ فبّتّ نَشَ قَ، عَ عَ قَلَ عَيُبَ بّ، «كَلِدِكَ، فَالِ دْشْ سَشَن بَرَ بَفَن عِ شَ حْشْمّيٍ مَ، عٍ عٍ مَكَنتَمَيٍ قَشَ سَنتِدّفّمَ رَ، عٍ حْشْمّيٍ شَنِن. ﭑ كٍرٍن ثٍتِ نَن نْ ﭑ بَدٍ عٍ يِ. ﭑ قَشِ نَ قٍ نَن دّنتّفّدٍ عِ بّ.» 
نَ قَن مُ فّ عَ شَ مَسٍنيِ رَ، شّيرَ فبّتّ نَشَ قَ، عَ عَ قَلَ عَيُبَ بّ، «عِ شَ دِيٍ تٌ نُ نَ شُلُنيِ تِقٍ عٍ تَارَ شْنيِ. 
قٌيٍ بٍلٍبٍلٍ قَشِ نَ تّمُي نّ كٍلِ فبٍنفبٍرٍنيِ مَ، عَ بَنشِ رَبِرَ عِ شَ دِيٍ مَ. عٍ بِرِن بَرَ قَشَ. ﭑ كٍرٍن ثٍتِ نَن كِسِشِ. ﭑ قَشِ نَ نَن دّنتّفّدٍ عِ بّ.» 
نَ كُي عَيُبَ نَشَ كٍلِ، عَ عَ شَ دٌنمَ عِبْو عَ مَ، عَ عَ شُنيِ بِ سُننُنيِ مَ، عَ قَ عَ رَقٍلٍن بْشِ مَ. 
عَ نَشَ عَ قَلَ، «ﭑ قَشِ دُنِحَ ﭑ مَفٍلِ نَن نَ ﭑ بَرِ تّمُي، ﭑ مَن فبِلٍنمَ ﭑ مَفٍلِ نَن نَ ﭑ سِفَ تّمُي. عَلَتَلَ بَرَ ﭑ كِ هَرِفٍ رَ، عَلَتَلَ مَن بَرَ نَ هَرِفٍ بَ ﭑ يِ. تَنتُي نَ عَلَ بّ.» 
نَ بِرِن كُي، عَيُبَ مُ يُنُبِ يٌ رَبَ، عَ مُ قٍ كٌبِ يٌ قَلَ عَلَ بّ.