عَيُبَ.
30.
«كْنْ يَكْسِ تَن، قٌنِكٍيٍ ﭑ مَيٍلٍمَ، نَشٍيٍ بَبَيٍ نُ قِندِشِ ﭑ بّ قُيَنتٍيٍ رَ، ﭑ نُ يٌمَ نَشٍيٍ مَ. 
عٍ يُسِ مُ نُ نَ ﭑ بّ، بَرِ مَ سّنبّ يٌ مُ نُ عٍ بّ. 
كَامّتْي نَن نُ عٍ رَ، نَشٍيٍ نُ سِفَمَ فبٍنفبٍرٍن يِرٍ بَلٌي قٍندٍ. 
عٍ نُ حٌوفٍيٍ مَتَلَمَ قْتْنيِيٍ كُي، وُرِ سَنكٍيٍ فبَنسَن نَن نُ قِندِ مَ عٍ شَ دٌنيِ رَ. 
مِشِيٍ نُ عٍ كٍرِ مَ حَمَ يَ مَ، عَلْ مُحّتِ كٍرِ مَ كِ نَشّ. 
عٍ نُ يِفِيَمَ فّمّ لٌنفٌرِيٍ نَن نَ فٍيَيٍ كْن نَ، 
شَ نَ مُ عَ رَ كُنسِيٍ بُن مَ. 
قُيَنتٍيٍ نَن نُ عٍ رَ، نَشٍيٍ نُ بَرَ كٍرِ بْشِ كُي.» 
«كْنْ يَكْسِ قَ، نٍيٍ نَن ﭑ مَيٍلٍمَ عٍ شَ سِفِيٍ نُن عٍ شَ مَسٍنيِيٍ رَ يِ كِ. 
ﭑ مَ قٍ مُ رَقَن عٍ مَ. عٍ دّ يٍ بْشُنمَ ﭑ يَتَفِ مَ، عٍ نُ قَ عٍ مَكُيَ ﭑ نَ. 
كَبِ عَلَ ﭑ نَبٌلٌ ﭑ مَ تْورّ كُي، عٍ شَ مَيٍلٍ مُ حْنمَ. 
يِ مِشِ يَ مَحْشُنشِيٍ كٍلِمَ ﭑ شِلِ مَ، عٍ نُ فَنتَنيِ حَاشِيٍ تٍ ﭑ بّ. 
عٍ ﭑ مَ كِرَ عِبٌلٌنمَ ﭑ يَ رَ. 
عٍ لُمَ عَلْ سْورِ حَاشِيٍ، نَشٍيٍ سٌمَ تَا كُي تّتّ يَلٍ رَ. 
فَاشُي بَرَ ﭑ سُشُ، ﭑ مَ قٍ شُن بَرَ رَكَنَ، ﭑ مَ كِسِ بَرَ دَنفِ ﭑ نَ عَلْ نُشُي دَنفِمَ كِ نَشّ.» 
«يَكْسِ، عَ فبٍ مُ لُشِ ﭑ مَ سِمَيَ شَ حْن، ﭑ مَ تْورّ بَرَ كَمَلِ. 
ﭑ مَ تْورّ بَرَ فبٌ يّ، ﭑ مُ شِمَ كْي رَ سْنْن. 
عَ لُمَ عَلْ دُفِ ندٍ نَن شِرِشِ ﭑ كْنيِ مَ، عَ شَ ﭑ قَشَ. 
عَلَ بَرَ ﭑ نَفٌرٌ هَن ﭑ بَرَ لُ عَلْ بٌورَ، شَ نَ مُ عَ رَ تّ شُبٍ.» 
«عَلَ، ﭑ بَرَ عِ شِلِ، كْنْ عِ مُ عَ رَتِنشِ. ﭑ بَرَ تِ عِ يَ عِ، عَلَكٌ عِ شَ ﭑ تٌ. 
عِ بَرَ تْورّ حَاشِ دْشْ ﭑ مَ، عِ سّنبّ بَرَ نْ ﭑ نَ. 
عَ لُشِ عَلْ تُرُننَادّ بَرَ ﭑ نَتٍ كٌورٍ مَ. 
ﭑ عَ كٌلٌن عِ نَ ﭑ شَنِنقٍ عَلِفِيَمَ نّ، دُنِحَ مِشِ بِرِن سِفَمَ دّننَشّ.» 
«كْنْ مِشِ نَشَن نَ سَيَ كِرَ شْن مَ، نَ مُ عَلَ مَشَندِ مَ شّ؟ مِشِ نَشَن نَ تْورّ كُي، نَ مُ عَلَ مَكُلَمَ شّ؟ 
ﭑ مُ ﭑ يَ يٍ رَ مِنِ تْورْ مِشِ بّ نُ؟ ﭑ مُ كِنِكِنِ سٍتَرٍ مَ نُ؟ 
ﭑ وَ هّيرِ نَن شْن مَ، كْنْ حَشَنكَتّ نَن ﭑ لِشِ. ﭑ وَ لُقٍ نَءِيَلَنيِ نَن كُي، كْنْ دِ مِ نَن دُ سُشِ ﭑ شُن نَ. 
ﭑ بْحّ نَ تْورْقٍ لْشْي بِرِن. 
ﭑ نَ دِ مِ كُي، نَءِيَلَنيِ يٌ مُ نَ. ﭑ تِشِ حَمَ تَفِ، ﭑ نُ قَ وَ ﭑ شُي عِتٍشِ رَ. 
ﭑ بَرَ لُ عَلْ وُلَ عِ بَرٍيٍ نُن بُرُنيِ شْنِ حَاشِيٍ. 
ﭑ كِرِ بَرَ قْورْ ﭑ مَ، ﭑ قَتٍ بِرِن كُي نَ عِفَنقٍ. 
ﭑ مَ كْرَ سُننُنيِ شُي تِمَ، ﭑ مَ شُلٍ حْن قٍ وَ شُي رَ مِنِمَ.»