يَبُرَ.
18.
عَلَتَلَ شَ كٌنيِ دَوُدَ شَ بّيتِ بّيتِبَيٍ شَ مَنفّ بّ. عَ يِ بّيتِ نَن بَ عَلَتَلَ بّ عَ تٌ عَ رَتَنفَ سْلُ نُن عَ يَشُي بِرِن مَ. 
عَلَتَلَ، ﭑ سّنبّ نُن ﭑ شَنُنتٍنيِ نَن عِ رَ. 
ﭑ نَكِسِمَ عَلَتَلَ لُمَ عَلْ قَنيٍ، عَ قِندِ ﭑ بّ تّتّ رَ. ﭑ مَرِفِ عَلَ لُمَ عَلْ فّمّ شُنفبٍ، ﭑ يِفِيَمَ دّننَشّ. سّنبّمَ نَن عَ رَ نَشَن ﭑ نَكِسِمَ، نَشَن ﭑ مَكَنتَمَ. 
ﭑ شَ عَ قَلَ ﭑ شُي عِتٍشِ رَ؛ عَلَ تَنتُ! عَلَ بَرَ ﭑ نَكِسِ ﭑ يَشُييٍ مَ. 
سَيَ نُ بَرَ ﭑ نَبِلِن، قَشّ نُ بَرَ فبَكُ ﭑ شُن مَ. 
لَاشِرَ نُ بَرَ مَكْرّ ﭑ نَ، فَبُرِ نُ بَرَ عَ دّ رَبِ ﭑ يَ رَ. 
ﭑ عَلَتَلَ مَشَندِ مَ ﭑ مَ تْورّ كُي، ﭑ نَن ﭑ مَرِفِ عَلَ شِلِمَ ﭑ شُي عِتٍشِ رَ. عَ ﭑ شُي مّمَ عَ شَ هْرْ مْبَنشِ كُي، عَ عَ تُلِ مَتِمَ ﭑ وَ شُي رَ. 
بْشِ نَشَ سّرّن، فٍيَ نَشَ رَ مَشَ عَلَ شَ شْنّ شَ قٍ رَ. 
عَ شَ شْنّ نَشَ لُ عَلْ تُورِ نَشَن تٍمَ، عَلْ تّ نَشَن مِنِمَ عَ دّ عِ، عَلْ تّ وٌلٍ دّشّشِ. 
عَلَ نَشَ كُيٍ عِبْو قِرِن نَ، عَ فٌرٌ، عَ سَنيِيٍ تِشِ نُشُي عِقْورْشِ قَرِ. 
عَ تِ مَلٍكّ شُن مَ، عَ حّرّ كٌورٍ مَ قٌيٍ قَرِ. 
عَ عَ نْشُن دِ مِ كُي، تُنّ نُن نُشُي عِقْورْشِيٍ تَفِ. 
سٍيَمَكْنيِ نَشَ مِنِ عَ يَ رَ نُشُييٍ كُي. بَلَبَلَنيِ نُن تّ نَشَ فٌرٌ. 
عَلَتَلَ شُي نَشَ لُ عَلْ فَلَنيِ كٍلِقٍ كٌورٍ، عَلَ شِلِ شُنفبٍ كَنيِ نَشَ عَ شُي رَ مِنِ، بَلَبَلَنيِ نُن تّ قَن نَشَ فٌرٌ. 
عَ نَشَ عَ شَ تَنبّيٍ وٌلِ، عَ عَ يَشُييٍ رَيٍنسٍن سٍيَمَكْنيِ يَ رَ. 
بَا نُن بْشِ نَشَ رَبِ عَلَتَلَ شَ شْنّ يَ رَ. 
عَلَتَلَ نَشَ ﭑ سُشُ كٍلِقٍ كٌورٍ مَ، عَ ﭑ بَ يٍ شْورَ. 
عَ نَشَ ﭑ نَتَنفَ ﭑ يَشُي سّنبّمَيٍ مَ، ﭑ شْنمِشِ نَشٍيٍ سّنبّ فبٌ ﭑ بّ. 
عٍ نَشَ ﭑ فٍرٍ ﭑ مَ تْورّ كُي، كْنْ عَلَتَلَ نَشَ ﭑ نَتَنفَ. 
عَ نَشَ ﭑ نَمِنِ فبَلٌي كُي عَ شَ شَنُنتٍيَ سَابُي رَ. 
عَلَتَلَ بَرَ ﭑ مَ تِنشِنيِ سَرٍ رَفبِلٍن ﭑ مَ، عَ بَرَ ﭑ مَلِ ﭑ مَ كّوَلِ سّنِيّنشِ شَ قٍ رَ. 
ﭑ بَرَ لُ عَلَتَلَ شَ كِرَ شْن، ﭑ مُ ﭑ مَرِفِ عَلَ بّحِن كٌبِحَ رَ. 
ﭑ بَرَ عَ شَ سّرِيّ بِرِن سُشُ، ﭑ مُ تٌندِشِ عَ شَ يَامَرِيٍ رَبَتُدٍ. 
ﭑ بَرَ تِنشِن عَ يَ رَ، ﭑ مُ تِن بِرَدٍ يُنُبِ قْشْ رَ. 
عَلَتَلَ بَرَ ﭑ مَ تِنشِنيِ سَرٍ رَفبِلٍن ﭑ مَ، عَ بَرَ ﭑ مَلِ ﭑ مَ كّوَلِ سّنِيّنشِ شَ قٍ رَ. 
عِ دُفُتّفّحَ مَسٍنمَ دُفُتّفّحَ كَنيِ بّ. عِ تِنشِنيِ مَسٍنمَ تِنشِنتْي بّ. 
عِ سّنِيّنيِ مَسٍنمَ سّنِيّنتْي بّ، كْنْ عِ كْوتَ ندٍ رَبَمَ مِشِ حَاشِ رَ. 
عِ يّتّ مَفٌرٌي رَكِسِمَ نّ، كْنْ عِ يّتّ عِفبٌي تَن مَفٌرٌ مَ نّ. 
عَلَتَلَ، عِ تَن نَن نَءِيَلَنيِ رَ ﭑ بّ. ﭑ مَرِفِ عَلَ، ﭑ بَ دِ مِ كُي. 
شَ وٌن بِرِن نَ عَ رَ، ﭑ مُ فَاشُمَ فَلِ شُنفبٍ فٍرٍدٍ. ﭑ نْمَ فٍرٍ شْرْشْي رَ عَلَ شَ مَلِ سَابُي رَ. 
عَلَ شَ كِرَ قَن. عَلَتَلَ شَ مَسٍنيِ تِنشِن. عَ مِشِيٍ كَنتَمَ نَشٍيٍ يِفِيَ قٍنمَ عَ رَ. 
عَلَ فبّتّ مُ نَ، قٌ عَلَتَلَ. سّنبّمَ مُ نَ، قٌ وٌن مَرِفِ عَلَ. 
عَلَ نَن سّنبّ قِمَ ﭑ مَ، عَ ﭑ نَحّرّ سّنِيّنيِ كُي. 
عَ ﭑ مَلِمَ ﭑ شَ لُ عَلْ شٍلِ، نَشَن قَتَ حّرّدٍ يِرٍ شْرْشْي. 
عَ بَرَ ﭑ نَقَلَ فٍرٍ كُي، عَ ﭑ مَلِمَ شَلِ قَنيِ رَوَلِدٍ. 
عِ بَرَ ﭑ شُن نَكٍلِ، عِ بَرَ ﭑ تٌنفٌ عِ شْنيّ عِ، عِ بَرَ عِ حّنفِ سَ ﭑ شْن مَ. نَ نَن عَ نِيَشِ ﭑ دَرِيّ سْتْشِ، 
ﭑ سّنبّ سْتْشِ، عَلَكٌ ﭑ نَشَ بِرَ. 
ﭑ بِرَ مَ ﭑ يَشُييٍ قْشْ رَ هَن ﭑ عٍ سُشُ. ﭑ مُ فبِلٍنمَ عٍ قْشْ رَ قٌ ﭑ نْ عٍ رَ. 
ﭑ نٍيٍ رَبِرَ مَ نّ هَن عٍ مُ نْ كٍلِدٍ سْنْن، عٍ قَ لُ ﭑ سَنيِ بُن. 
عِ سّنبّ سٌمَ ﭑ يِ رَ ﭑ مَ فٍرٍ كُي. عِ ﭑ يَشُييٍ رَفٌرٌ مَ ﭑ بُن مَ، 
عِ عَ نِيَ ﭑ شَ نْ عٍ رَ. ﭑ شْنمِشِيٍ مُ وْيّنمَ سْنْن. 
عٍ مِشِيٍ شِلِمَ عٍ شَ قَ عٍ مَلِ، كْنْ مِشِ يٌ مُ عٍ رَكِسِمَ. عٍ عَلَتَلَ شِلِمَ، كْنْ عَ قَن مُ عٍ يَابِمَ. 
ﭑ عٍ لُشُتَمَ نّ عٍ قَ لُ عَلْ شُبٍ، قٌيٍ نَشَن شَنِنمَ. ﭑ عٍ بٌرٌنمَ عَلْ بّندّ. 
عِ بَرَ ﭑ نَتَنفَ حَمَ مُرُتَشِ مَ، عِ قَ ﭑ قِندِ سِيٍ شُنيِ رَ. ﭑ مُ نَشَن كٌلٌن نَ بَرَ لُ ﭑ بُن مَ. 
عٍ ﭑ شُي رَبَتُمَ، شْحّيٍ وْيّن حْشُنمّ قَلَمَ ﭑ بّ. 
عٍ مُ سُو سَمَ ﭑ يَ رَ. عٍ مِنِمَ عٍ شَ تّتّ مَكَنتَشِ كُي فَاشُي رَ. 
عَلَتَلَ سّنبّ مُ حْنمَ عَبَدَن. تَنتُي نَ ﭑ مَ كَنتَمَ بّ. تَنتُي نَ ﭑ مَرِفِ عَلَ مَرَكِسِمَ بّ. 
عَلَ نَن ﭑ فبٍحْشْمَ. عَلَ نَن سِيٍ رَبِرَ مَ ﭑ مَ نْي بُن مَ. 
عَلَ نَن ﭑ نَتَنفَمَ ﭑ يَشُييٍ مَ. عِ تَن نَن ﭑ عِتٍمَ ﭑ يَشُييٍ شُن مَ. عِ تَن نَن ﭑ نَتَنفَمَ سُوتٍيٍ مَ. 
عَلَتَلَ، ﭑ عِ تَنتُمَ سِيٍ تَفِ نَ بِرِن نَن مَ، ﭑ بّيتِ بَمَ نّ عِ بّ. 
عَ شُننَكٍلِ نُن هِننّ قِمَ نّ عَ شَ مِشِ سُفَندِشِ مَ، نَشَن قِندِ مَنفّ دَوُدَ نُن عَ شَ دِيٍ رَ عَبَدَن.