يَبُرَ.
25.
دَوُدَ فبٍ ﭑ شَشِلِ تِشِ عِ تَن عَلَتَلَ نَن نَ. 
ﭑ مَرِفِ عَلَ، ﭑ بَرَ ﭑ يّتّ تَشُ عِ رَ عَلَكٌ يَافِ نَشَ ﭑ سْتْ، عَلَكٌ ﭑ يَشُييٍ نَشَ ﭑ مَيٍلٍ. 
نَشَن يٌ لَ عِ رَ، نَ كَنيِ مُ يَافِ سْتْمَ، كْنْ يَنقَنتٍ تَن، يَافِ سْتْمَ نّ عَ قَنيِ رَ. 
عَلَتَلَ، عِ شَ كِرَ مَسٍن ﭑ بّ، ﭑ شَرَن عِ شَ كِرَ رَ. 
ﭑ نَحّرّ عِ شَ نْندِ كِرَ شْن، عِ مَن شَ ﭑ مَتِنكَن عِ شَ كِرَ رَ، بَرِ مَ عِ تَن عَلَ نَن ﭑ نَكِسِمَ. ﭑ شَشِلِ تِشِ عِ رَ لْشْي بِرِن. 
عَلَتَلَ، عِ مَحْشُن عِ شَ مَرَقَنيِ نُن عِ شَ قٌنِسِرٍيَ مَ، بَرِ مَ عٍ نَ نَ كَبِ دُنِحَ قْلّ. 
عِ نَشَ عِ مَحْشُن ﭑ مَ يُنُبِ مَ، ﭑ نَشَن نَبَشِ ﭑ مَ سّفّتَلَيَ كُي، ﭑ عِ رَشْنْشِ تّمُي نَشّ. عَلَتَلَ، عِ مَحْشُن ﭑ مَ عِ شَ قٌنِسِرٍيَ كُي، بَرِ مَ عِ قَن. 
عَلَتَلَ قَن، عَ تِنشِن. نَ نَن عَ تٌشِ عَ كِرَ مَسٍنمَ يُنُبِتْييٍ بّ. 
عَ تَن نَن مِشِ مَفٌرٌشِ رَحّرّ مَ تِنشِنيِ كُي. عَ عٍ مَتِنكَنمَ عَ شَ كِرَ رَ. 
عَلَتَلَ شَ قٌنِسِرٍيَ نُن تِنشِنيِ نَ مِشِيٍ بّ، نَشٍيٍ عَ شَ سَاتّ نُن عَ شَ يَامَرِ مَبَنبَنمَ. 
عَلَتَلَ، ﭑ مَ يُنُبِيٍ شَقَرِ عِ شِلِ شَ قٍ رَ، بَرِ مَ عٍ مُ شُرُن. 
ندٍ فَاشُمَ عَلَتَلَ يَ رَ؟ عَلَتَلَ كِرَ مَسٍنمَ نَ كَنيِ بّ عَ لَنمَ عَ شَ حّرّ نَشَن مَ. 
عَ عَلِفِيَمَ لِمَ نّ سّيوّ كُي. عَ بْنسْي قَن قَمَ سَبَتِدٍ يِ بْشِ مَ. 
عَلَتَلَ عَ شَ فُندٌ مَسٍنمَ مِشِيٍ بّ، نَشٍيٍ فَاشُ عَ يَ رَ. عَ عَ شَ سَاتّ مَسٍنمَ نّ عٍ بّ. 
ﭑ شَشِلِ تِشِ عَلَتَلَ رَ لْشْي بِرِن بَرِ مَ عَ تَن نَن ﭑ نَتَنفَمَ قٍ حَاشِ مَ. 
عَلَتَلَ، يَندِ، هِننّ ﭑ نَ، بَرِ مَ تْورْ مِشِ نَن ﭑ نَ، ﭑ مَلِمَ قَن مُ نَ. 
ﭑ بْحّ بَرَ تْورْ. ﭑ نَمِنِ نَ تْورّ كُي. 
عِ يَ رَ سِفَ ﭑ مَ سُننُنيِ نُن ﭑ مَ حَشَنكَتّ مَ، عِ شَ دِحّ ﭑ مَ يُنُبِ بِرِن مَ. 
عِ شَ عَ مَتٌ ﭑ يَشُييٍ وُيَشِ كِ نَشّ. عٍ ﭑ شْنشِ عَ حَاشِ رَ. 
ﭑ نِي مَكَنتَ، عِ شَ ﭑ نَتَنفَ، عَلَكٌ يَافِ نَشَ ﭑ سْتْ عِ شَ نِينِ بُن مَ. 
سّرِيّ نُن تِنشِنيِ شَ ﭑ كَنتَ بَرِ مَ ﭑ شَشِلِ تِشِ عِ تَن نَ. 
عَلَ، عِسِرَيِلَ شُنسَرَ عَ شَ تْورّ بِرِن مَ.