يَبُرَ.
27.
دَوُدَ فبٍ عَلَتَلَ نَن نَ ﭑ مَ نَءِيَلَنيِ رَ. ﭑ نَكِسِمَ نَ عَ رَ. ﭑ لَن ﭑ شَ فَاشُ ندٍ يَ رَ؟ ﭑ مَ دُنِحّءِفِرِ نَ عَلَتَلَ نَن مَ نِينِ بُن مَ. ﭑ لَن ﭑ شَ فَاشُ ندٍ يَ رَ؟ 
ﭑ فٍرٍقَيٍ نُن ﭑ يَشُي نَشٍيٍ قٍ حَاشِ رَبَمَ، عٍ نَ قَ ﭑ نَهَلَكِدٍ، عٍ تَن نَن بِرَ مَ. 
هَلِ سْورِ فَالِ ﭑ نَبِلِن، ﭑ بْحّ مُ سّرّنمَ. هَلِ سْورِ فَالِ قَ ﭑ فٍرٍدٍ، ﭑ بْحّ سُو سَمَ نّ. 
ﭑ قٍ كٍرٍن نَن مَشْرِن عَلَتَلَ مَ، ﭑ نَ نَ نَن قٍنقٍ. ﭑ وَ مَ لُقٍ عَلَتَلَ شَ هْرْ مْبَنشِ نَن كُي ﭑ مَ دُنِحّءِفِرِ بِرِن، عَلَكٌ ﭑ شَشِلِ شَ تِ عَلَتَلَ شَ قٍ قَنيِ رَ، ﭑ مَن شَ نْ عَ شَ هْرْ مْبَنشِ مَتٌدٍ. 
عَ ﭑ نَتَنفَمَ نّ تْورّ مَ هْرْ مْبَنشِ كُي. عَ ﭑ نْشُنمَ نّ نَ نِينِ بُن مَ. عَ ﭑ نَتٍمَ نّ فٍيَ قَرِ. 
عَ ﭑ شُن نَكٍلِمَ نّ ﭑ يَشُييٍ يَ شْرِ نَشٍيٍ ﭑ نَبِلِنشِ. ﭑ سّرّشّ بَمَ نّ عَ شَ هْرْ مْبَنشِ كُي حّلّشِنيِ رَ. ﭑ سُوكِ بَ، ﭑ بّيتِ بَ عَلَتَلَ بّ. 
عَلَتَلَ، عِ تُلِ مَتِ ﭑ شُي رَ، ﭑ نَ عِ مَشَندِقٍ. هِننّ ﭑ نَ، عِ مَن شَ ﭑ يَابِ. 
ﭑ بْحّ وَ مَ عِ قٍنقٍ. عَلَتَلَ، ﭑ عِ قٍنمَ نّ. 
عِ نَشَ عِ كٌبٍ تِ ﭑ نَ. عِ نَشَ مّي عِ شَ كٌنيِ رَ شْنّ كُي. عِ تَن نَن نَ ﭑ مَلِمَ رَ. ﭑ مَ مَرَكِسِمَ عَلَ، عِ نَشَ ﭑ نَبٌلٌ، عِ نَشَ ﭑ نَبّحِن. 
شَ ﭑ نفَ نُن ﭑ بَ ﭑ نَبٌلٌ، عَلَتَلَ تَن عَ مَكْرّ مَ نّ ﭑ نَ. 
عَلَتَلَ، عِ شَ كِرَ مَسٍن ﭑ بّ. ﭑ شُن تِ كِرَ تِنشِنشِ رَ، عَلَكٌ ﭑ يَشُييٍ نَشَ ﭑ سُشُ. 
عِ نَشَ ﭑ نَبٌلٌ ﭑ يَشُييٍ شَ عٍ سَفٌ رَبَ ﭑ نَ، بَرِ مَ عٍ بَرَ قِندِ تْوحّفّلَيٍ رَ ﭑ بّ. قٍ كٌبِ رَبَيٍ نَن لَنشِ عٍ مَ. 
ﭑ لَشِ عَ رَ ﭑ عَلَتَلَ شَ قٍ قَنيِ تٌمَ نّ يِ دُنِحَ بّندّ قُحِ قَرِ. 
عِ شَشِلِ تِ عَلَتَلَ رَ. عِ سّنبّ شُن شَ مَسَ، عِ شَ لِمَنِيَ. عِ شَشِلِ تِ عَلَتَلَ رَ.