يَبُرَ.
33.
تِنشِنتْييٍ، وٌ شَ عَلَتَلَ مَتْشْ وٌ شُي عِتٍشِ رَ. تِنشِنتْييٍ لَن عٍ شَ عَلَ مَتْشْ. 
وٌ شَ عَلَتَلَ تَنتُ كْرَ رَ، وٌ شَ بّيتِ بَ كْرَ رَ لُوتِ قُ دَاشِ. 
وٌ شَ بّيتِ نّينّ بَ عَ بّ، وٌ شَ نَ رَبَ مَشَسٍيٍ رَ وٌ شُي عِتٍشِ رَ. 
عَلَتَلَ شَ مَسٍنيِ تِنشِن، عَ عَ شَ وَلِ بِرِن نَبَمَ سْوبّ رَ. 
تِنشِنيِ نُن سّرِيّ رَقَن عَ مَ، دُنِحَ بِرِن نَقٍشِ عَلَتَلَ شَ هِننّ رَ. 
عَلَتَلَ نَشَ كٌورٍ دَا عَ شَ وْيّنيِ رَ. عَ تٌ وْيّن كٍرٍن قَلَ، تُنبُييٍ نَشَ مِنِ كٍرٍن نَ. 
عَ نَشَ بَا قَن مَلَن يِرٍ كٍرٍن، عَ شَ يٍ رَفَتَ. 
بْشِ بِرِن شَ فَاشُ عَلَتَلَ يَ رَ. دُنِحَ مِشِ بِرِن شَ عَ بِنيَ. 
عَ نَ وْيّن، عَ قٍ رَفِرِ مَ نّ. عَ نَ يَامَرِ قِ، عَ رَبَمَ نّ. 
عَلَتَلَ سِيٍ شَ نَتّيٍ كَنَمَ نّ. عَ مُ عٍ شَ وَلِ سْونّيَمَ. 
كْنْ عَلَتَلَ شَ قٍ رَفِرِشِيٍ بُمَ عَبَدَن. عَ وَشْنقٍ سْونّيَمَ نّ وَشَتِ بِرِن. 
حّلّشِنيِ نَ سِ بّ نَشَن مَرِفِ قِندِشِ عَلَتَلَ رَ. حّلّشِنيِ نَ بْنسْي بّ عَلَتَلَ نَشَن سُفَندِشِ. 
عَلَتَلَ عَ يَ رَفٌرٌ مَ دُنِحَ مَ كٍلِقٍ عَرِيَننَ، عَ مِشِ بِرِن مَتٌ. 
كٍلِقٍ عَ شْنيِ، عَ دُنِحَ مِشِ بِرِن مَتٌمَ نّ. 
نَشَن عَدَ مَدِيٍ بْحّ دَاشِ، عَ عَ حّنفِ سَمَ عٍ شَ وَلِيٍ شْن. 
مَنفّ يٌ مُ كِسِمَ عَ شَ سْورِيٍ سَابُي رَ. سْورِ قَن مُ كِسِمَ عَ يّتّ سّنبّ رَ. 
سْورِ حْشْ عَ مَ عَ شَ سٌي نْمَ عَ رَكِسِدٍ، كْنْ نَ تَن مُ قِندِ مَ كِسِ رَ عَ بّ. 
عَلَتَلَ نَن مّينِمَ مِشِيٍ مَ نَشٍيٍ فَاشُمَ عَ يَ رَ، نَشٍيٍ عٍ شَشِلِ تِمَ عَ شَ هِننّ رَ، 
عَلَكٌ عٍ نِي نَشَ لَاشِرَ، عَلَكٌ عٍ شَ بَلٌ كَامّ وَشَتِ. 
وٌن شَشِلِ تِشِ عَلَتَلَ نَن نَ. عَ تَن نَن وٌن مَلِمَ رَ، عَ تَن نَن وٌن كَنتَمَ رَ. 
وٌن بْحّيٍ سّيوَشِ عَ تَن نَن مَ قٍ رَ، بَرِ مَ وٌن بَرَ لَ عَ شِلِ سّنِيّنشِ رَ. 
عَلَتَلَ، عِ شَ هِننّ مُشُ رَ، بَرِ مَ مُشُ شَشِلِ تِشِ عِ تَن نَن نَ.