يَبُرَ.
68.
دَوُدَ شَ بّيتِ بّيتِبَيٍ شَ مَنفّ بّ 
عَلَ شَ كٍلِ، عَ يَشُييٍ شَ يٍنسٍن يّ. نَشٍيٍ عَ شْنمَ، عٍ شَ عٍ فِ عَ يَ رَ. 
عِ عِ يَشُييٍ رَلْيمَ نّ عَلْ قٌيٍ تّ تُورِ رَلْيمَ كِ نَشّ. كَاقِرِ لْيمَ نّ عَلَ يَ عِ، عَلْ تُرٍ شُنُمَ تّ عِ كِ نَشّ. 
كْنْ مِشِ تِنشِنشِ حّلّشِنمَ نّ، عٍ عٍ سّيوّ شُي عِتٍمَ نّ عَلَ يَ عِ. عٍ تَن لُمَ نَ حّلّشِنيِ نَن كُي. 
وٌن شَ بّيتِ بَ عَلَ بّ، وٌن شَ عَ شِلِ مَتْشْ بّيتِ رَ. نَشَن حّرّ مَ نُشُي قَرِ، وٌن شَ عَ رَ سّنّ. عَ شِلِ عَلَتَلَ. وٌن شَ وٌن سّيوّ شُي رَتٍ عَ مَ. 
عَلَ، مِسِكِينّ بَبَ نَن عَ رَ. عَلَ، كَاحّ مَكَنتّ نَن عَ رَ. عَلَ شْنيِ سّنِيّن. 
عَلَ دٍنبَيَ قِمَ دٍنبَيَتَرٍ مَ، عَلَ شْرّيَ قِمَ فٍيلِمَنِيٍ مَ، عٍ حّلّشِنمَ نّ. كْنْ عَلَ مَتَندِيٍ لُمَ نّ فبٍنفبٍرٍنيِ مَ. 
عَلَ، عِ نُ نَ عِ شَ حَمَ يَ رَ وُلَ عِ تّمُي نَشّ، 
بْشِ بِرِن نُ سّرّنمَ نّ. تُنّ يٍ نُ فٌرٌ مَ عَلَ يَ عِ، عِسِرَيِلَ مَرِفِ عَلَ، نَشَن نَ سِيٌنِ. 
عَلَ نُ تُنّ يٍ رَفٌرٌ مَ بْشِ مَ، عَ شَ سّنبّ قِ عَ شَ بْشِ تَفَنشِ مَ. 
عِ بَرَ عِ شَ حَمَ رَ سَبَتِ نَا. عِ بَرَ تْورْ مِشِ مَلِ نَا. عِ نَ بِرِن نَبَشِ نّ بَرِ مَ عِ قَن. 
مَرِفِ مَسٍنيِ قَنيِ سٌمَ عَ شَ شّيرَيٍ يِ رَ. فَلِ بٍلٍبٍلٍ نَن عٍ رَ. عٍ نَشّ، 
«فٍرٍ سٌي مَنفّيٍ نَ عٍ فِقٍ، عٍ نَ عٍ فِقٍ وٌ يَ رَ. وٌ شَ فِنّيٍ نَشٍيٍ لُشِ بَنشِ، عٍ قَمَ يِ فٍرٍ نَاقُلِ عِتَشُندٍ. 
وٌ قَمَ وٌ مَلَبُدٍ وٌ شَ شُرُ سٍيٍ قّ مَ. عَلَ مّينِمَ نّ عَ شَ حَمَ مَ عَلْ عَ مّينِمَ فَنبّيٍ مَ كِ نَشّ. عٍ فَبُتٍنيِ لُمَ عَلْ فبٍتِ نُن شّيمَ نَن نَ عٍ مَ.» 
عَلَ شِلِ شُنفبٍ كَنيِ بَرَ مَنفّيٍ رَيٍنسٍن سَلَمٌن فٍيَ مَ بَلَبَلَنيِ سَابُي رَ. 
بَسَن فٍيَ، عَلَ نَشَن دَاشِ، كٌندٍ وُيَشِ نَشَن بّ، 
وٌ نَ عَلَ شَ فٍيَ سُفَندِشِ مَتٌقٍ تْونّ رَ مُنقٍ رَ، عَ بَرَ عَ شَ هْرْ مْلِنفِرَ تِ دّننَشّ؟ عَلَ لُمَ نّ مّننِ تّمُي بِرِن. 
عَلَتَلَ شَ فٍرٍ سٌي شَ فِسٍيٍ وُيَ دَنفِ وُلُ قُ رَ. عَ شَ فٍرٍ سٌي قَن دَنفِ وُلُ وُلُيٍ رَ. عَلَ نَ عٍ يَ مَ. سِنَيِ فٍيَ نَ يِرٍ سّنِيّنشِ كُي. 
ﭑ مَرِفِ عَلَتَلَ، عِ بَرَ تٍ كٌورٍ مَ. عِ بَرَ فٍيلِمَنِيٍ شَنِن. عَدَ مَدِيٍ بَرَ عِ بُحَ، مَتَندِلَيٍ قَن بَرَ وَ سٌقٍ عِ شْنيِ. 
تَنتُي نَ عِ بّ لْشْي بِرِن، عَ وٌن مَ كٌتٍ شَنِنقٍ لْشْ يٌ لْشْ. وٌن مَ مَرَكِسِمَ نَ عَلَ نَن نَ. 
وٌن مَرِفِ عَلَتَلَ وٌن نَكٍلِمَ نّ قَشّ مَ. وٌن مَ مَرَكِسِمَ نَ عَلَ نَن نَ. 
عَلَ عَ يَشُييٍ شُنيِ كَنَمَ نّ. نَشٍيٍ حّرّ كِرَ حَاشِ شْن مَ، عَ نٍيٍ قَن شُن شْرِ بْو مَ نّ. 
مَرِفِ نَشّ، «ﭑ قَمَ نّ عٍ رَ كٍلِقٍ بَسَن، ﭑ قَ عٍ رَ كٍلِقٍ بَا مَ، 
عَلَكٌ وٌ شَ قَ عٍ وُلِ تٌ وٌ سَنلَابٍ رَ. وٌ شَ بَرٍيٍ قَن عٍ دٌنمَ نّ.» 
عَلَ، مُشُ بَرَ عِ تٌ قَ رَ حَمَ يَ مَ. عَلَ نُن عَ شَ مَنفّ سُفَندِشِ نَ سٌقٍ هْرْ مْلِنفِرَ كُي. 
بّيتِبَيٍ نَ يَرٍ، كْرَ بْنبْييٍ نَ عٍ قْشْ رَ، فِنّيٍ نَ مَشَسٍ رَ مَشَقٍ عٍ رَبِلِنيِ. 
وٌ شَ عَلَ تَنتُ مَلَنيِيٍ، عِسِرَيِلَ شَ دِيٍ، وٌ شَ عَلَتَلَ تَنتُ. 
بُنيَمِن نَن يَ، نَشَن بَرِشِ دْنشْي رَ. عَ تَن نَن قِندِشِ عٍ شَ مَنفّ رَ. يُدَيَ مَنفّيٍ نَن يَ، عٍ نُن عٍ شَ مِشِيٍ. سَبُلٌن مَنفّيٍ نَن يَ، نَقَتَلِ مَنفّيٍ نَن يَ. 
عَلَ، عِ شَ مَسٍنيِ تِ سّنبّ رَ. عِ شَ عِ سّنبّ مَسٍن عَلْ تّمُي دَنفِشِ. 
عِ شَ بَنشِ نَ دَرِ سَلَمُ. مَنفّيٍ قَمَ عِ بُحَدٍ نَا. 
عِ شَ شَاحّ مِسِرَ مَ، نَشَن مَنِيّ مَلِ شُنفبٍ رَ نَشَن نَ يٍ شْورَ. عَ لُمَ عَلْ تُورَ فَلِ، نِنفٍ يْرّيٍ بِرَشِ نَشٍيٍ قْشْ رَ. نَ نِنفٍ يْرّيٍ لُمَ عَلْ سِ فبّتّيٍ نَشٍيٍ دُوتِ قِمَ مِسِرَ مَ. سِ فبّتّيٍ نَشٍيٍ وَ مَ فٍرٍ شْن، عِ شَ عٍ رَيٍنسٍن يّ. 
مِسِرَ شّيرَيٍ، عَ نُن كُسِ شّيرَيٍ، شَ قَ دُوتِ رَ عَلَ بّ. 
مَنفّ نَشٍيٍ بِرِن نَ دُنِحَ، نُن عَ رَبِلِنيِ، وٌ شَ بّيتِ بَ عَلَ بّ، وٌ شَ عَلَتَلَ تَنتُ، 
نَشَن حّرّ مَ نُشُي قَرِ كٌورٍ مَ كَبِ عَ رَكُيَ، نَشَن فَلَنيِ شُي رَ مِنِمَ سّنبّ رَ. 
وٌ شَ عَ كٌلٌن، عَلَ سّنبّ فبٌ. عَ عِسِرَيِلَ يَمَرِ مَ عَ سّنبّ رَ، سّنبّ نَشَن كٍلِمَ كٌورٍ مَ. 
عَلَ، عِ نَ عِ شَ هْرْ مْلِنفِرَ كُي. عَلَ، عِ مَفَاشُ. عِسِرَيِلَ مَرِفِ عَلَ سّنبّ قِمَ نّ عَ شَ حَمَ مَ. عَلَ تَنتُ!