يَبُرَ.
73.
عَسَقِ شَ بّيتِ نْندِ هَفِفّ نَن يَ؛ عَلَ قَن عِسِرَيِلَ بّ، عَ قَن مِشِيٍ بّ نَشٍيٍ سٌندٌنيِ سّنِيّنشِ. 
عَ فبٍ مُ نُ لُشِ ﭑ تَن يَتِ شَ بَ كِرَ مَ، ﭑ سَنيِيٍ شَ بِرَ كِرَ فبّتّ قْشْ رَ. 
ﭑ نُ يّتّ عِفبٌي تْونّمَ، ﭑ تٌ عَ تٌ مِشِ حَاشِيٍ قِندِشِ نَاقُلِ كَنيِيٍ رَ. 
سٍسٍ مُ عٍ عِقُمَ هَن عٍ شَ قَشّ، عٍ قَتٍ يَلَنشِ تُن. 
عٍ مُ عَدَ مَدِيٍ شَ تْورّ كٌلٌن، عٍ مُ حَشَنكَتَشِ عَلْ بٌورٍيٍ. 
يّتّ عِفبٌحَ قِندِشِ شُنمَسٍ نَن نَ عٍ بّ، عٍ مِشِ تْورْ مَ لْشْ يٌ لْشْ. 
عٍ عٍ يَ تِمَ سٍ بِرِن نَ، عٍ وَشْنقٍ بَرَ دَنفِ عَ عِ. 
عٍ يٌمَ مِشِ مَ، عٍ قٍ حَاشِ حَنِفٍمَ يّتّ عِفبٌحَ كُي. 
عٍ عَلَ قٍ مَبٍرٍ مَ، عٍ دّ مُ دِكِمَ سٍسٍ قَلَقٍ رَ دُنِحَ مَ. 
نَ نَن عَ رَ، عَلَ شَ حَمَ عَ شُن تِمَ عٍ رَ، عٍ لَ عٍ شَ وْيّنيِيٍ رَ. 
عٍ نَشّ، «عَلَ تَن وٌن حّرّ كِ كٌلٌنمَ دِ؟ قَهَامُي مُندُن نَ عَ بّ؟» 
مِشِ حَاشِيٍ نَ نَ كِ نّ. عٍ بْحّ سَشِ نَاقُلِ يِرِوَقٍ كُي. 
ﭑ حْشْ عَ مَ، «ﭑ نَن ﭑ بْحّ رَ سّنِيّنشِ نّ قُ. ﭑ فبِلٍنقٍ قٍ كٌبِيٍ قْشْ رَ، نَ مُ قَنشِ ﭑ بّ. 
ﭑ حَشَنكَتَشِ تّمُي بِرِن، لْشْ يٌ لْشْ ندٍ سَمَ ﭑ مَ كٌتٍ شُن.» 
شَ ﭑ سَ نَ مْولِ قَلَ نُ، ﭑ بَرَ يَنقَنتٍيَ رَبَ عِ شَ دِيٍ رَ نُ. 
عَوَ، ﭑ نَشَ قَهَامُي قٍن يِ قٍ مَ. نَ نُ شْرْشْ ﭑ بّ، 
هَن ﭑ سٌ لْشْي عَلَ شَ هْرْ مْلِنفِرَ كُي، ﭑ قَ عَ مَحْشُن قٍ نَشَن قٍ كٌبِ رَبَيٍ لِمَ. 
عِ عٍ تِمَ كِرَ سَلَشُنشِ نَن شْن مَ، عِ قَ عٍ شُن نَكَنَ. 
عٍ شَ قٍ حْنمَ كٍرٍنيِ نَن نَ، قٍ مَفَاشُشِ عٍ شَنِنمَ نّ. 
مَرِفِ، عَلْ شِيٍ دَنفِمَ كِ نَشّ مِشِ شُنُ تّمُي، عِ نَ كٍلِ، عٍ قَن شَ قٍ بَمَ عِ يَ عِ نَ كِ نّ. 
ﭑ بْحّ تٌ نُ مَحَاشُمَ، عَ نُ لُشِ نّ ﭑ بّ عَلْ تَنبّ نَن ﭑ سْشْمَ. 
دَشُي نَن نُ ﭑ نَ، ﭑ مُ نُ سٍسٍ قَهَامُشِ. ﭑ نُ لُشِ نّ عَلْ شُرُ سٍ شَشِلِتَرٍ عِ يَ عِ. 
كْنْ هَن يَ ﭑ نَ عِ سّيتِ مَ، ﭑ يِرٍقَنيِ بّلّشّ سُشُشِ عِ يِ رَ. 
عِ ﭑ نَحّرّ مَ عِ شَ مَرَ سِ رَ، عِ مَن ﭑ نَسّنّمَ نّ عِ شَ نْرّ كُي. 
ندٍ فبّتّ نَ ﭑ يِ رَ كٌورٍ مَ؟ بَ عِ تَن نَ، سٍسٍ فبّتّ شْلِ مُ ﭑ مَ يِ دُنِحَ مَ. 
ﭑ قَتٍ نُن ﭑ شَشِلِ تَفَنمَ نّ، كْنْ عَلَ ﭑ بْحّ سَمَ نّ عَبَدَن. 
نَشٍيٍ عٍ مَكُيَمَ عِ رَ، بْنْ مِشِ نَن عٍ رَ. عِ مِشِيٍ دّ بَلَنمَ، نَشٍيٍ بِرِن عِ قِنسِرِوَلِمَ. 
كْنْ ﭑ مَ هّيرِ قِندِشِ ﭑ مَسٌقٍ نَن نَ عَلَ رَ. ﭑ بَرَ مَرِفِ عَلَتَلَ سُفَندِ ﭑ شُن تَشُدٍ رَ، عَلَكٌ ﭑ شَ عِ شَ وَلِ قَنيِيٍ بِرِن مَسٍن دُنِحَ بّ.