يَبُرَ.
78.
عَسَقِ شَ لْننِ بّيتِ ﭑ مَ حَمَ، وٌ وٌ تُلِ مَتِ ﭑ مَ شَرَنيِ رَ، وٌ وٌ، تُلِ مَتِ ﭑ مَ مَسٍنيِ رَ. 
ﭑ مِسَالِ ندٍ قَلَمَ وٌ بّ، ﭑ قٍ دَنفِشِيٍ مَدْشْ، 
مُشُ قٍ نَشٍيٍ مّ، مُشُ قٍ نَشٍيٍ كٌلٌن، مُشُ بَبَيٍ سَابُي رَ. 
مُشُ مُ نٍيٍ نْشُنمَ عٍ بْنسْييٍ مَ، مُشُ عَلَتَلَ شَ مَتْشْي قَلَمَ نّ عٍ شَنبِرَتِيٍ بّ، مُشُ عَ سّنبّ نُن عَ شَ كَابَنَكٌي مَسٍنمَ نّ عٍ بّ. 
عَلَ بَرَ يَامَرِيٍ مَسٍن يَشُبَ بّ، عَ سّرِيّ سَ عِسِرَيِلَ بْشِ كُي، عَ وٌن بٍنبَيٍ يَمَرِ عٍ شَ نَ مَسٍن عٍ شَ دِيٍ بّ، 
عَلَكٌ دِ نَشٍيٍ قَمَ تِنَ، نٍيٍ شَ نْ عَ كٌلٌندٍ، عٍ قَن شَ عَ مَسٍن عٍ فبٍ دِيٍ بّ عٍ قَمَ نَشٍيٍ بَرِدٍ. 
نَ كُي عٍ قَمَ عٍ شَ لَنلَنتٍيَ سَدٍ عَلَ مَ، عٍ مُ نّيمُمَ عَ شَ وَلِ شُنفبٍيٍ مَ، عٍ عٍ حْشْ سَمَ نّ عَ شَ يَامَرِيٍ شْن مَ. 
عٍ مُ لُمَ عَلْ عٍ بٍنبَيٍ، نَشٍيٍ تُلِ شْرْشْ، نَشٍيٍ قِندِ مَتَندِلَيٍ رَ، نَشٍيٍ تُن مُ رَبّشِ، نَشٍيٍ شَشِلِ مُ تِشِ عَلَ كٍرٍن نَ. 
عٍقِرَ مِكَيٍ شَلِ كَنيِيٍ نَشَ عٍ كٌبٍ سٌ فٍرٍ رَ، 
عٍ مُ عَلَ شَ سَاتّ رَكَمَلِ، عٍ مُ بِرَ عَ شَ سّرِيّ قْشْ رَ. 
عٍ نَشَ نّيمُ عَ شَ وَلِ مَفَاشُشِيٍ رَ، عَ نُن عَ شَ كَابَنَكٌي رَ عَ نَشٍيٍ مَسٍن عٍ بّ. 
عَ كَابَنَكٌ رَبَ نّ عٍ بٍنبَيٍ يَ شْرِ مِسِرَ، سٌوَن قِيلِ مَ. 
عَ نَشَ بَا عِبْو، عَ عٍ رَفِرِ، عَ يٍ رَتِ عَلْ بِلِشِ. 
عَ نَشَ عٍ رَحّرّ نُشُي سَابُي رَ يَنيِ رَ، عَ نَشَ عٍ رَحّرّ تّ يَنبّ رَ كْي رَ. 
عَ نَشَ قَنيٍ عِبْو فبٍنفبٍرٍنيِ مَ، عَ يٍ فبٍفبٍ رَ مِنِ نَ كُي عَلْ دَبٌنيِ. 
عَ نَشَ يٍ رَ مِنِ فّمّ لٌنفٌرِ رَ، عَ لُ عَلْ شُرٍ. 
كْنْ عٍ مُ فبِلٍن عٍ شَ يُنُبِ رَبَقٍ قْشْ رَ، عٍ قَ عَلَ مَتَندِ فبٍنفبٍرٍنيِ مَ. 
عٍ نَشَ عَلَ مَتٌ دٌنسٍيٍ مَشْرِنقٍ رَ. 
عٍ نَشَ عَلَ مَبٍرٍ عَ قَلَقٍ رَ، «عَلَ نْمَ وٌن نَبَلٌدٍ يِ فبٍنفبٍرٍنيِ كُي؟ 
عَ بَرَ يٍ رَ مِنِ قَنيٍ كُي، كْنْ عَ نْمَ تَامِ قَن قِدٍ عٍ مَ؟» 
عَلَ تٌ نَ مّ، عَ نَشَ شْنْ كِ قَنيِ رَ، عَ قَ تّ رَدّشّ يَشُبَ شَ حَمَ شِلِ مَ، عَ قَ شْنْ عِسِرَيِلَ حَمَ مَ، 
بَرِ مَ عٍ مُ نُ لَشِ عَلَ رَ، عٍ مُ عٍ شَشِلِ تِشِ عَ شَ كِسِ رَ. 
نَ كُي عَلَ نَشَ يَامَرِ قِ كٌورٍ نَادّيٍ شَ رَبِ، 
«مَنَ» شَ فٌرٌ عٍ مَ بَلٌي رَ، نَشَن قِندِ كٌورٍ تَامِ رَ. 
بِرِن نَشَ نَ سّنبّمَيٍ شَ تَامِ دٌن، عٍ قَ وَ سَ نَ رَ. 
عَلَ نَشَ قٌيٍ رَقَ كٍلِ سٌفٍتٍدٍ بِرِ، عَ قٌيٍ رَقَ عَ سّنبّ رَ كٍلِ يِرٍقَنيِ مَ، 
نَشَن عَ نِيَ شْنِيٍ شَ فٌرٌ عٍ مَ عَ فبٍفبٍ رَ عَلْ شُبٍ نُن بَا دّ مّيّنيِ. 
عَ نَشَ عٍ فبٍفبٍ رَيٌلٌن عٍ يٌنكِندٍ تَفِ، عٍ شَ كِرِ بَنشِيٍ رَبِلِنيِ مَ. 
عٍ نَشَ نَ دٌن هَن عٍ وَ سَ. عَلَ نُ بَرَ عٍ هَيِ لِ. 
كْنْ هَلِ عٍ تٌ نُ بَرَ دٌنسٍ سْتْ، عَ مُ بُ 
عَلَ شَ شْنّ مَن نَشَ فٌرٌ عٍ مَ، عَ عِسِرَيِلَ سّنبّمَيٍ نُن عٍ قٌنِكٍ قَشَ. 
هَلِ نَ بِرِن تٌ رَبَ، حَمَ مُ تِن فبِلٍندٍ عٍ شَ يُنُبِيٍ قْشْ رَ. عٍ مُ لَ عَلَ شَ كَابَنَكٌي رَ. 
نَ كُي عَ نَشَ عٍ لُ عٍ شَ قُيَنتٍ كُي، هَن عٍ شَ قٍ نَشَ رَحْن فَاشُي كُي. 
قٌ قَشّ نَ دُتُن عٍ مَ، عٍ قَ سٌ عَلَ قٍنقٍ، عٍ عٍ يّتّ رَفبِلٍن عَ مَ، 
عٍ عٍ رَتُ عَ عَلَ نَن عٍ سّنبّ رَ، عَ عَلَ شِلِ شُنفبٍ كَنيِ نَن عٍ رَكِسِمَ رَ. 
كْنْ عٍ نُ وَ مَ عَ مَدَشُقٍ عٍ شَ وْيّنيِيٍ نَن نَ، عٍ وُلٍ قَلَ عَ بّ عٍ دّ رَ. 
عَ شَ قٍ مُ نُ نَ عٍ بْحّ مَ، عٍ مُ نُ بِرَ مَ عَ شَ سَاتّ قْشْ رَ. 
كْنْ عَلَ تٌ قِندِ هِننّنتٍ رَ، عَ نَشَ عٍ شَ يُنُبِيٍ شَقَرِ، عَ عٍ حَشَنكَتَقٍ لُ نَا. عَ نَشَ دِحّ عٍ مَ سَنيَ وُيَشِ، عَ مُ تِن عَ شَ شْنّ بِرِن شَ مِنِ. 
عَ نُ عَ كٌلٌن عَ بّندّ نَن تُن لَنشِ عٍ مَ، عٍ حّنفِ نَ دَن، عَ مُ فبِلٍن سْنْن. 
سَنمَيَ يٍرِ عٍ مُرُتَمَ عَ مَ فبٍنفبٍرٍنيِ مَ، سَنمَيَ يٍرِ عٍ عَ رَشْنْمَ نَ يِرٍ مَشَرٍ مَ؟ 
عٍ نُ لُمَ عَلَ مَتٌ رَ، عٍ نُ تِ عِسِرَيِلَ شَ سّنِيّنتْي كَنكٍ. 
عٍ مُ عٍ رَتُ عَ سّنبّ مَ. عٍ نّيمُ عَ مَ عَ عٍ رَكِسِ عٍ فٍرٍقَيٍ مَ تّمُي نَشّ. 
عٍ نّيمُ عَ شَ تْنشُمَيٍ مَ عَ نَشٍيٍ مَسٍن مِسِرَ بْشِ مَ. عٍ نّيمُ عَ شَ كَابَنَكٌي مَ عَ نَشٍيٍ رَبَ سٌوَن قِيلِ مَ. 
عَ نَشَ عٍ شَ نِلِ شُرٍ نُن عَ سَلٌنيِيٍ قِندِ وُلِ رَ هَن عٍ مُ نْ نَ يٍ مِندٍ. 
عَ نَشَ شّيرِيٍ رَدِن عٍ مَ عٍ هَلَكِقٍ رَ. عَ نَشَ لَنشَنسَرِ مَيٍ مَلَن مّننِ عٍ كَسَرَقٍ رَ. 
عَ نَشَ تُفُمِيٍ رَدِن عٍ شَ شّيٍ مَ، كَتٌي نَشَ شّ بٌفِ دٌن فبِكِ. 
عَ نَشَ عٍ شَ وّنِ سَنسِيٍ كَنَ بَلَبَلَنيِ رَ، عَ نَشَ عٍ شَ سِكٌمٌرٌ بِلِيٍ تُشُنسَن تُنّ شِنبٍلِ رَ. 
بَلَبَلَنيِ نَشَ عٍ شَ شُرُ سٍيٍ قَشَ، فَلَنيِ نَشَ عٍ شَ فْورّيٍ سْنتْ. 
عَ نَشَ عَ شَ شْنّ شْرْشْي رَ مِنِ عٍ مَ، عَ بْحّ نَشَ تٍ عٍ مَ، هَن عَ نَشَ مَلٍكّ كَسَرَتِيٍ رَفٌرٌ عٍ شِلِ مَ. 
عَ نَشَ عَ شَ شْنّ قُلُن عٍ مَ، عَ مُ عٍ نِي رَتَنفَ قَشّ مَ، عَ قٍ شْرْشْييٍ رَدِن عٍ مَ. 
عَ نَشَ مِسِرَ دِ سِنفٍ بِرِن قَشَ، عٍ هَمِ بْنسْييٍ قٌنِكٍ بِرِن قَشَ. 
نَ نَن عَ رَ عَ نَشَ عَ شَ حَمَ رَ مِنِ عَلْ يّشّي فْورّ، عَ نَشَ عٍ رَحّرّ عَلْ شُرُ سٍيٍ فبٍنفبٍرٍنيِ مَ. 
عَ نَشَ عٍ شَنِن بْحّسَ كُي فَاشُي يٌ مُ عٍ سْتْ، كْنْ عَ نَشَ عٍ يَشُييٍ مَدُلَ بَا مَ. 
نَ كِ، عَ نَشَ عٍ شَنِن عَ شَ بْشِ سّنِيّنشِ مَ، عَ شَ فٍيَ عَ نَشَن سْتْ عَ سّنبّ رَ. 
عَ نَشَ بْنسْييٍ كٍرِ عٍ يَ رَ، عَ قَ نَ بْشِيٍ عِتَشُن عِسِرَيِلَ بْنسْييٍ مَ كّ رَ، عَ مّننِ قِندِ عٍ سَبَتِدٍ رَ. 
كْنْ عٍ مَن نَشَ فٍرٍفِرِ عَلَ شِلِ شُنفبٍ كَنيِ مَ، عٍ تٌندِ عَ شَ يَامَرِيٍ رَبَتُدٍ. 
عٍ نَشَ عٍ مَكُيَ عَلَ رَ، عٍ قِندِ يَنقَنتٍ رَ عَلْ عٍ بٍنبَيٍ عَ رَبَشِ كِ نَشّ، عٍ لُ عَلْ شَلِ كَنَشِ. 
عٍ نَشَ عَ رَشْنْ عٍ شَ كُيٍ بَتُدٍيٍ رَ، عٍ عَ رَتْونّ عٍ شَ وُرِ مَسٌلِشِيٍ رَ. 
عَلَ تٌ نَ قٍ مّ، عَ نَشَ شْنْ كِ قَنيِ، عَ عِسِرَيِلَ رَبٌلٌ. 
عَ نَشَ عَ شَ لِنفِرَ رَبّحِن سِلٌ، عَ نُ نَشَن تِشِ مِشِيٍ تَفِ. 
عَ نَشَ عَ شَ سَاتّ كَنكِرَ لُ يَشُي سَفٌي، عٍ كَنكَن عَ شَ نْرّ شَ تْنشُمَ مَ. 
عَ تٌ شْنْ عَ شَ حَمَ عِسِرَيِلَ مَ، عَ نَشَ عَ نِيَ عٍ شَ سْنتْ سَنتِدّفّمَ رَ. 
عٍ شَ قٌنِكٍيٍ نَشَ فَن تّ رَ، عٍ شَ فِنّدِ مّدِيٍ مُ مَتْشْي سْتْ، 
عٍ شَ سّرّشّدُبّيٍ نَشَ قَشَ سَنتِدّفّمَ رَ، عٍ شَ كَاحّ فِنّيٍ قَن مُ وَ. 
مَرِفِ نَشَ كٍلِ عَلْ مِشِ نَشَن كٍلِشِ شِ شْلِ مَ، عَلْ سْورِ نَشَن نْمَ عَ شَ سِيسِ رَ. 
عَ نَشَ عَ يَشُييٍ بْنبْ، عَ عٍ لُ يَافِ كُي نَشَن مُ حْنمَ. 
عَ نَشَ يُسُقُ بْنسْي رَبّحِن، عَ تٌندِ عٍقِرَ مِ بْنسْي سُفَندِدٍ. 
عَ نَشَ يُدَ بْنسْي سُفَندِ، عَ نُن سِيٌن فٍيَ نَشَن نُ رَقَنشِ عَ مَ. 
عَ نَشَ عَ شَ هْرْ مْلِنفِرَ تِ عَلْ يِرٍ عِتٍشِ، عَلْ عَ دُنِحَ تِشِ كِ نَشّ، عَ شَ بُ شْنكُيٍ رَ. 
عَ نَشَ عَ شَ كٌنيِ دَوُدَ سُفَندِ، عَ عَ تٌنفٌ فْورّ يَ مَ، 
عَ نُ مّينِقٍ يّشّي مَ دّننَشّ، عَلَكٌ عَ شَ مّينِ عَلَ شَ حَمَ مَ، نَشَن قِندِشِ يَشُبَ بْنسْي عِسِرَيِلَ رَ. 
دَوُدَ نَشَ مّينِ عٍ مَ عَ بْحّ قِيشّ رَ، عَ عٍ مَسُشُ شَشِلِمَيَ رَ.