يَبُرَ.
89.
عٍتَنِ عٍسِرَكَ شَ لْننِ بّيتِ 
ﭑ بّيتِ بَمَ ﭑ مَرِفِ شَ دُفُتّفّحَ شَ قٍ رَ. ﭑ نَ مَسٍنمَ نّ بْنسْي بِرِن بّ، عَ قَلَقٍ رَ، 
«عِ شَ دُفُتّفّحَ مَبَنبَنشِ كٌورٍ مَ عَبَدَن. عِ شَ هِننّ مُ كَنَمَ.» 
«ﭑ بَرَ سَاتّ شِرِ ﭑ نُن ﭑ مَ مِشِ سُفَندِشِ رَ، ﭑ بَرَ يِ كّرّ تٌنفٌ ﭑ مَ كٌنيِ دِ دَوُدَ بّ. 
‹ﭑ عِ بْنسْي رَ سَبَتِمَ نّ عَبَدَن، ﭑ عِ شَ كِبَنيِ تِ تّمُي بِرِن.›» حّنفِ رَتٍ. 
ﭑ مَرِفِ، نَشٍيٍ نَ كٌورٍ مَ عٍ عِ مَتْشْمَ، مَلٍكّيٍ عِ تَنتُمَ عِ شَ دُفُتّفّحَ شَ قٍ رَ. 
ندٍ نَ كٌورٍ مَ نَشَن مَنِيَمَ مَرِفِ عَلَ رَ؟ ندٍ لُشِ عَلْ مَرِفِ عَلَ مَلٍكّيٍ يَ مَ؟ 
عَلَ مَفَاشُ عَ شَ سّنِيّنتْييٍ شَ مَلَنيِ، عٍ بِرِن عٍ مَفٌرٌ عَ بّ. 
مَرِفِ عَلَ، ندٍ سّنبّ فبٌ عَلْ عِ تَن مَنفّ عَلَ؟ عِ شَ دُفُتّفّحَ نَ يِرٍ بِرِن. 
عِ تَن نَن بَا يَمَرِ مَ، عِ عَ مْرْنيِيٍ رَشَرَ. 
عِ تَن نَن نْ مِسِرَ رَ، عِ عَ سْنتْ. عِ عِ يَشُييٍ رَيٍنسٍن عِ سّنبّ رَ. 
عِ تَن نَن فبٍ كٌورٍ رَ، عِ تَن نَن فبٍ بْشِ رَ. عِ تَن نَن دُنِحَ بِرِن دَا. 
سٍ نَشَن نَ كْولَ مَ، سٍ نَشَن نَ يِرٍقَنيِ مَ، عِ تَن نَن عَ بِرِن دَاشِ. تَبٌرٌ نُن شٍرِ مٌن فٍيَيٍ عِ شِلِ مَتْشْمَ. 
عِ سّنبّ فبٌ. 
تِنشِنيِ نُن نْندِ نَن نَ عِ شَ كِبَنيِ سَنبُنيِ رَ، شَنُنتٍيَ نُن دُفُتّفّحَ قَن تِشِ عِ يَ رَ. 
مَرِفِ، سّيوّ نَ حَمَ بّ نَشَن عِ شِلِ مَتْشْمَ، عٍ عٍ حّرّ مَ عِ شَ نَءِيَلَنيِ نَن مَ. 
عٍ سّيوَ مَ عِ شِلِ شَ قٍ رَ، عٍ شُن نَكٍلِمَ عِ شَ تِنشِنيِ سَابُي رَ. 
عِ تَن نَن قِندِشِ عٍ شَ نَءِيَلَنيِ نُن عٍ سّنبّ رَ. مُشُ سّنبّ فبٌ عِ شَ هِننّ شَ قٍ رَ. 
مُشُ مَرِفِ نَن نَ مُشُ كَنتَمَ نُن مُشُ شَ مَنفّ رَ، عِسِرَيِلَ شَ سّنِيّنتْي نَ عَ رَ. 
عِ وْيّن نّ عِ شَ حَمَ بّ لَامَتُنيِ رَ، عَ قَلَقٍ رَ، «ﭑ بَرَ سّنبّ قِ فٍرٍ سٌي ندٍ مَ، ﭑ نَشَن شُن نَكٍلِشِ حَمَ تَفِ. 
ﭑ بَرَ ﭑ مَ كٌنيِ دَوُدَ تٌ، ﭑ تُرٍ سّنِيّنشِ سُرُ سُرُ عَ شُنيِ مَ سُفَندِ رَ. 
ﭑ نَ ﭑ بّلّشّ رَ سٌمَ عَ بُن مَ، ﭑ سّنبّ قِمَ نّ عَ مَ عَ قَنيِ رَ. 
عَ يَشُي مُ عَ تّرّننَمَ، تِنشِنتَرٍ مُ عَ تْورْ مَ. 
ﭑ عَ يَشُييٍ عِبُتُشُنمَ نّ، ﭑ عَ شْنمَيٍ بْنبْمَ نّ. 
ﭑ شَنُنتٍيَ نُن ﭑ مَ دُفُتّفّحَ لُمَ نّ عَ مَ، عَ سّنبّ فبٌمَ ﭑ شِلِ نَن سَابُي رَ. 
بَايٍ نُن شُرٍيٍ بِرِن سَمَ نّ عَ شَ مَنفّيَ بُن مَ. 
عَ عَ قَلَمَ نّ ﭑ بّ، ‹ﭑ بَبَ نَن عِ رَ، ﭑ مَرِفِ عَلَ، ﭑ مَ مَرَكِسِمَ.› 
ﭑ عَ قِندِ مَ نّ ﭑ مَ دِ سِنفٍ رَ، نَشَن شُنفبٌ دُنِحَ مَنفّيٍ بِرِن بّ. 
ﭑ نَ ﭑ مَ دُفُتّفّحَ مَبَنبَنمَ نّ عَ بّ، مُشُ سَاتّ نَشَن شِرِشِ، عَ مُ كَنَمَ عَبَدَن. 
ﭑ عَ بْنسْي رَ سَبَتِمَ نّ، ﭑ عَ شَ مَنفّ كِبَنيِ مَبَنبَنمَ نّ قَننِ كٌورٍ نَ. 
عَ شَ دِيٍ نَ ﭑ مَ سّرِيّ رَبٌلٌ، عٍ مُ عٍ حّرّ ﭑ مَ يَامَرِ بُن مَ، 
عٍ ﭑ شُي مَتَندِ، عٍ مُ ﭑ وَشْنقٍ سُشُ، 
ﭑ عٍ بْنبْمَ لُشُسِنيِ نَن نَ، ﭑ عٍ حَشَنكَتَمَ قُرٍ حَاشِيٍ رَ. 
كْنْ ﭑ مُ ﭑ مَ دُفُتّفّحَ بَمَ عَ مَ. ﭑ مُ ﭑ شُي يَنقَمَ، 
ﭑ مُ ﭑ مَ سَاتّ كَنَمَ، ﭑ مَن مُ ﭑ شُي مَسَرَ مَ. 
ﭑ نَ ﭑ كَلِشِ ﭑ مَ سّنِيّنيِ رَ، ﭑ مُ عَننَبِ دَوُدَ يَنقَمَ. 
عَ بْنسْي كِسِمَ نّ عَبَدَن، عَ شَ كِبَنيِ لُمَ نّ ﭑ يَ عِ عَلْ سٌفٍ، 
عَ رَ سَبَتِمَ نّ عَلْ كِكٍ، نَشَن قِندِ مَ سٍيدٍحْشْيَ رَ عَبَدَن.» حّنفِ رَتٍ. 
كْنْ عِ تَن بَرَ عِ شَ مِشِ سُفَندِشِ مَكُيَ عِ رَ، عِ بَرَ مّي عَ رَ، عِ شْنْ عَ مَ. 
عِ بَرَ عِ شَ سَاتّ كَنَ عِ شَ كٌنيِ بّ، عِ عَ بَ عَ شَ كِبَنيِ كُي. 
عِ بَرَ عَ شَ تّتّ بْو، عِ بَرَ عَ مَكَنتَدٍ كَنَ. 
مِشِ نَشٍيٍ دَنفِمَ، عٍ هَرِفٍ بَمَ نَا. عَ دْشْبٌورٍيٍ يٌمَ عَ مَ. 
عِ بَرَ عَ يَشُييٍ سّنبّ سٌ، هَن عٍ بَرَ سّيوَ. 
عِ مُ عَ شَ سَنتِدّفّمَ وَلِ رَ سْونّيَ، عِ مُ عَ مَلِشِ فٍرٍ كُي. 
عِ بَرَ عَ شَ قٍ رَشُبٍن، عِ بَرَ عَ شَ كِبَنيِ وٌلِ بْشِ. 
عِ بَرَ ندٍ بَ عَ شَ قٌنِكٍيَ رَ، عِ يَافِ دُ سُ عَ شُن نَ. حّنفِ رَتٍ. 
عَلَتَلَ، عِ عِ نْشُنمَ ﭑ مَ هَن مُن تّمُي؟ عِ شَ شْنّ دّشّمَ عَلْ تّ هَن مُن لْشْي؟ 
عِ شَ رَتُ عَ مَ ﭑ مَ سِمَيَ دُنكٍ كِ نَشّ. عِ عِبُنَدَ مَ دَاشِ قُيَن نَن نَ؟ 
ندٍ بَلٌشِ نَشَن مُ قَشَمَ؟ ندٍ نْمَ عَ يّتّ بَدٍ سَيَ كِرَ شْن مَ؟ 
ﭑ مَرِفِ، عِ شَ دُفُتّفّحَ سِنفٍ نَ مِندٍن، عِ عِ كَلِ نَشَن نَ دَوُدَ بّ عِ شَ تِنشِنيِ كُي؟ 
ﭑ مَرِفِ، عِ شَ عِ حْشْ سَ عِ شَ كٌنيِيٍ شَ يَافِ شْن مَ. عِ شَ نَ كٌتٍ تٌ مِشِ وُيَشِيٍ نَشَن دْشْ ﭑ شُن مَ. 
ﭑ مَرِفِ، عِ شَ عِ رَتُ عَ مَ عِ يَشُييٍ ﭑ مَبٍرٍ مَ كِ نَشّ، ﭑ تَن عِ شَ مِشِ سُفَندِشِ. 
تَنتُي نَ مَرِفِ بّ عَبَدَن. عَمِنَ. عَمِنَ.