يَبُرَ.
104.
ﭑ شَ عَلَتَلَ تَنتُ ﭑ نِي بِرِن نَ. ﭑ مَرِفِ عَلَتَلَ، عِ سّنبّ فبٌ، نْرّ نُن يَنبّ نَ عِ مَ، 
عَ لُشِ عَلْ نَءِيَلَنيِ يَتِ قِندِشِ عِ شَ فُبَ نَن نَ. عِ كٌورٍ عِتَلَشِ عَلْ دُفِ شُنفبٍ عِ سَبَتِشِ نَشَن بُن مَ، 
عِ شَ كٌنكٌي تِشِ نُشُييٍ قَرِ يٍ رَفَتَشِ دّننَشّ. عِ نُشُييٍ قِندِ عِ شَ حّرّ سٍ رَ، عِ عِ حّرّ قٌيٍ قَرِ. 
عِ قٌيٍ شّيمَ عِ شَ مَسٍنيِ رَ، عِ تّ رَ سَنبَمَ عِ شَ وَلِ رَبَقٍ رَ. 
عَلَ دُنِحَ تِشِ نّ عَلْ بَنشِ تِشِ كِ نَشّ، عَ مُ عَ مَمَشَمَ قٍوٌ. 
عَ بَا دُ سُ نّ عَ شُن مَ عَلْ دُفِ، عَ فٍيَيٍ شُنتَفِ مَكٌتٌ. 
عِ تٌ شَاحّ يٍ مَ، عَ عَ فِ عِ شَ فَلَنيِ شُي مَ، 
فٍيَيٍ نُن فُلُنبَيٍ قَ لُ يِرٍ عِ نُ وَ دّننَشّ شْن. 
عِ نَانِنيِ سَشِ يٍ بّ عَ مُ تُفَنمَ نَشَن شُن مَ، عَلَكٌ عَ نَشَ فبِلٍن دِن نَ شَرٍ مَ. 
عِ دُلٌنيِيٍ قِندِ شُرٍيٍ رَ، نَشٍيٍ سُسُمَ فٍيَ لٌنفٌرِيٍ رَ، 
عَ يٍ شْلِ بَ بُرُنيِ سُبٍيٍ بِرِن مَ، عَ يٍ شْلِ بَ وُلَءِ سٌقَلٍيٍ مَ. 
شْنِيٍ سَبَتِشِ نٍيٍ قّ مَ، عٍ عٍ شُي رَ مِنِمَ وُرِ سَلٌنيِيٍ كْن نَ بُرّشّيٍ لٌنفٌرِ رَ. 
عِ فٍيَيٍ بُندَ مَ يٍ رَ كٍلِ كٌورٍ مَ، بْشِ وَ سَمَ عِ شَ وَلِ رَ. 
عِ حٌوفٍ رَ مِنِمَ شُرُ سٍيٍ بّ، عِ سَنسِيٍ رَبُلَمَ عَدَ مَدِيٍ بّ، عٍ بَلٌي سْتْمَ نَشٍيٍ رَ. 
عِ وّنِ قِمَ مِشِيٍ مَ، نَشَن عٍ بْحّ رَقَنمَ عٍ مَ، عِ تُرٍ رَ مِنِمَ عٍ بّ، نَشَن عٍ كِرِ رَتٌقَنمَ، عِ عٍ بَلٌمَ دٌنسٍ رَ، نَشَن سّنبّ قِمَ عٍ مَ. 
لِبَن وُرِ بِلِيٍ، مَرِفِ نَشٍيٍ سِشِ، عٍ بَرَ يٍ سْتْ عَ قَنيِ رَ، 
شْنِيٍ عٍ تّي سَمَ عٍ كْن نَ. فبٌنفبٌي عٍ تّي سَمَ سِثِرّ وُرِ بِلِيٍ كْن نَ، 
وُلَءِ سِيٍ شِمَ فٍيَيٍ قَرِ، سَفَلٍيٍ لُمَ فّمّ لٌنفٌرِيٍ رَ. 
عِ كِكٍ يَءِلَنشِ سَلِ وَشَتِيٍ كٌلٌنقٍ نَن نَ. سٌفٍ عَ دُلَ تّمُي كٌلٌن. 
عِ دِ مِ رَقَمَ كْي رَ، بُرُن سُبٍيٍ حّرّ مَ تّمُي نَشّ. 
يّتّيٍ نَ عٍ شُي رَ مِنِ دٌنسٍ قٍنقٍ رَ، عَلَ عٍ كِمَ بَلٌي رَ. 
سٌفٍ نّقّ مِنِ، عٍ فبِلٍن عٍ شَ قْنمّيٍ رَ. 
مِشِيٍ تَن مِنِ، عٍ سَ قّيحّن وَلِدٍ. 
عَلَتَلَ، عِ شَ دَالِسٍيٍ وُيَ. عِ عٍ بِرِن دَاشِ شَشِلِمَيَ نَن نَ. بْشِ رَقٍشِ عِ شَ دَالِسٍيٍ رَ، 
بَا قَن نَقٍشِ عِ شَ دَالِسٍيٍ رَ، ندٍيٍ شُرُن، ندٍيٍ شُنفبٌ، عٍ وُيَ. 
كُنكُي شُنفبٍيٍ حّرّ مَ مّننِ قَرِ، ثٍرٍ مُي حّرّ مَ بَا بُن مَ حّلّشِنيِ رَ. 
يِ دَالِسٍ بِرِن عٍ شَشِلِ تِشِ عِ تَن نَن نَ عٍ بَلٌي شَ قٍ رَ. 
عِ نَ عٍ كِ، عٍ عَ سْتْمَ نّ عِ سَابُي رَ، عٍ وَ سَ. 
عِ نَ عٍ كُمَ، عٍ فَاشُمَ نّ. عِ نَ عٍ حّنفِ بَ، عٍ قَشَمَ نّ، عٍ فبِلٍن بّندّ. 
عِ نَ عِ حّنفِ رَ سٌ عٍ قَتٍ، عٍ مَن بَلٌ، بْشِ مَن قَ قَن. 
عَلَتَلَ شَ نْرّ شَ بُ عَبَدَن! عَلَتَلَ شَ سّيوَ عَ شَ دَالِيٍ رَ! 
عَ نَ بْشِ مَتٌ، عَ سّرّنمَ نّ، عَ نَ دِن فٍيَيٍ رَ، عٍ فَنمَ نّ. 
ﭑ عَلَتَلَ مَتْشْمَ نّ قَننِ ﭑ بَلٌشِ، ﭑ بّيتِ بَمَ نّ ﭑ مَرِفِ عَلَ بّ قَننِ ﭑ نَ دُنِحَ مَ. 
ﭑ مَ دُبّ شَ رَقَن عَ مَ. ﭑ سّيوَ مَ نّ عَلَتَلَ شَ قٍ رَ. 
كْنْ يُنُبِتْييٍ تَن شَ لْي دُنِحَ مَ. مِشِ حَاشِيٍ نَشَ لُ نَا سْنْن! ﭑ بَرَ عَلَتَلَ مَتْشْ ﭑ نِي بِرِن نَ. وٌ عَلَتَلَ تَنتُ!