يَبُرَ.
106.
وٌ شَ عَلَتَلَ مَتْشْ. وٌ شَ عَ تَنتُ بَرِ مَ عَ قَن، عَ شَ شَنُنتٍيَ بُمَ عَبَدَن. 
ندٍ عَلَتَلَ شَ وَلِ شُنفبٍ مَسٍنمَ، ندٍ عَ شَ مَتْشْي بَمَ؟ 
سّيوّ نَ تِنشِنتْييٍ بّ، نَشٍيٍ بِرَ مَ تِنشِنيِ قْشْ رَ لْشْي بِرِن. 
عَلَتَلَ، عِ شَ رَتُ ﭑ مَ عِ هِننّمَ عِ شَ حَمَ رَ تّمُي نَشّ، عِ نَ عٍ رَكِسِ، عِ شَ ﭑ قَن مَلِ، 
عَلَكٌ ﭑ شَ عِ شَ مِشِ سُفَندِشِيٍ شَ هّرِ سْتْ، ﭑ شَ سّيوَ عِ شَ حَمَ رَ، ﭑ شَ حّلّشِن عِ كّ تٌنفٌمَيٍ يَ مَ. 
مُشُ بَرَ يُنُبِ رَبَ عَلْ مُشُ بٍنبَيٍ، مُشُ بَرَ قٍ كٌبِيٍ رَبَ حَاشُحَ كُي. 
مُشُ بٍنبَيٍ تٌ نُ نَ مِسِرَ بْشِ مَ، عٍ مُ عٍ حْشْ سَ عِ شَ كَابَنَكٌي شْن مَ، عٍ مُ رَتُ عِ شَ شَنُنتٍيَ مَ. عٍ نَشَ عٍ كٌبٍ رَ سٌ عِ رَ شُلُنيُمِ بَا قّ مَ. 
كْنْ عَ نَشَ عٍ رَكِسِ عَ شِلِ شَ قٍ رَ، عَلَكٌ عَ شَ عَ سّنبّ مَسٍن. 
عَ تٌ شَاحّ شُلُنيُمِ بَا مَ، عَ نَشَ شْرِ، عٍ نَشَ عَ عِفِرِ عَ شَرَشِ رَ. 
عَ نَشَ عٍ رَكِسِ عٍ شْنمِشِيٍ بّلّشّ عِ، عَ عٍ شُنسَرَ عٍ يَشُييٍ بّلّشّ. 
يٍ نَشَ دُ سُ عٍ يَشُييٍ شُن نَ، هَلِ مِشِ كٍرٍن عَ مُ كِسِ. 
نَ كُي عٍ نَشَ لَ عَ شَ مَسٍنيِ رَ، عٍ عَ مَتْشْ بّيتِ رَ. 
كْنْ عَ مُ بُ، عٍ مَن نَشَ نّيمُ عَ شَ وَلِيٍ مَ، عٍ تٌندِ عَ وَشْنقٍ رَبَدٍ. 
عٍ نَشَ بِرَ عٍ يّتّ وَشْنقٍ قْشْ رَ فبٍنفبٍرٍنيِ مَ، عٍ عَلَتَلَ مَتٌ. 
عَ نَشَ عٍ وَشْنسٍ سٌ عٍ يِ رَ، كْنْ نَ دَنفِ شَنبِ، عَ نَشَ عٍ رَحْن. 
عَلَ شَ حَمَ نَشَ مُنسَ نُن هَرُنَ تْونّ، نَشٍيٍ قِندِشِ عَلَتَلَ شَ كٌنيِ سّنِيّنشِيٍ رَ. 
بْشِ نَشَ عَ رَبِ، عَ دَتَن نُن عَبِرَ مِ شَ مِشِيٍ رَفٌرٌ عَ كُي. 
تّ نَشَ عٍ قْشِرَبِرّ حَاشِيٍ فَن. 
عٍ نَشَ نِنفٍ مِسَالِ يَءِلَن وُرٍ رَ، عٍ عَ بَتُ كُيٍ رَ. 
نِنفٍ نَشَن سّشّ دٌنمَ، عٍ نَشَ نَ مِسَالِ قِندِ عٍ مَرِفِ عَلَتَلَ حْشْي رَ. 
عٍ نَشَ نّيمُ عٍ رَكِسِمَ عَلَ مَ، نَشَن قٍ شُنفبٍيٍ رَبَ مِسِرَ، 
نَشَن كَابَنَكٌييٍ رَبَ هَمِ بْشِ مَ، نَشَن قٍ مَفَاشُشِيٍ رَبَ شُلُنيُمِ بَا مَ. 
عَلَ نُ وَ مَ عٍ سْنتْقٍ، كْنْ عَ شَ مِشِ سُفَندِشِ مُنسَ نَشَ عَ مَشَندِ، عَ شَ عَ شَ شْنّ شْرْشْي لُ نَ. 
عٍ نَشَ تٌندِ عَ شَ بْشِ قَنيِ سُشُدٍ، عٍ مُ لَ عَ شَ لَايِدِ رَ. 
عٍ نَشَ تِ عَلَتَلَ كَنكٍ عٍ شَ كِرِ بَنشِيٍ كُي، عٍ مُ عَ شُي سُشُ. 
نَ كُي عَ نَشَ لَايِدِ تٌنفٌ عٍ بّ، عَ شَ عٍ قَشَ فبٍنفبٍرٍنيِ مَ، 
عَ شَ عٍ بْنسْي قَشَ حَمَنّيٍ تَفِ، عَ شَ عٍ رَيٍنسٍن دُنِحَ مَ. 
عٍ نَشَ بَلِ ثٍيٌرِ بَتُ، عٍ سّرّشّ سُبٍ دٌن نَشَن بَشِ مِشِ قَشَشِيٍ بّ. 
عٍ نَشَ عَلَ رَشْنْ عٍ شَ قٍ كٌبِيٍ رَ، هَن عَ نَشَ قُرٍ حَاشِ ندٍ رَفٌرٌ عٍ مَ. 
قِنٍشَسِ تٌ كٍلِ، عَ نَشَ عَلَ مَشَندِ عٍ بّ، قُرٍ حَاشِ نَشَ بَ عٍ رَ. 
مِشِ نَشَ نَ تِنشِنيِ كٌلٌن عَ بّ عَبَدَن. 
عَلَتَلَ شَ حَمَ نَشَ عَ رَشْنْ مٍرِبَ شُرٍ قّ مَ. عَننَبِ مُنسَ نَشَ تْورْ عٍ شَ قٍ رَ، 
عَ تٌ وْيّن شْرْشْي قَلَ عٍ شَ عَلَ مَتَندِ شَ قٍ رَ. 
عٍ مُ كَنَان سِيٍ سْنتْ عَلْ عَلَتَلَ عٍ يَمَرِ كِ نَشّ. 
عٍ نَشَ سَبَتِ عٍ يَ مَ، عٍ بِرَ عٍ نَامُنيِيٍ قْشْ رَ. 
عٍ نَشَ نٍيٍ شَ كُيٍيٍ بَتُ، نَ قَ قِندِ فَنتَنيِ رَ عٍ بّ. 
عٍ نَشَ عٍ شَ دِ شّمّيٍ نُن عٍ شَ دِ فِنّ بَ سّرّشّ رَ حِننّيٍ بّ. 
عٍ تٌ عٍ شَ دِيٍ قَشَ سّرّشّ رَ كَنَان شَ كُيٍيٍ بّ، عٍ نَشَ بْشِ قِندِ بْشِ سّنِيّنتَرٍ رَ. 
عٍ عٍ يّتّ قِندِ مِشِ سّنِيّنتَرٍ رَ نَ كِ نّ، عٍ عٍ مَرِفِ يَنقَ. 
نَ كُي عَلَتَلَ نَشَ شْنْ عَ شَ حَمَ مَ، عَ كّ تٌنفٌمَيٍ مُ رَقَنشِ عَ مَ سْنْن. 
عَ نَشَ عٍ رَبٌلٌ سِ فبّتّيٍ يِ رَ، عٍ يَشُييٍ نَشَ عٍ يَمَرِ. 
عٍ يَشُييٍ نَشَ نْ عٍ رَ، عٍ قَ لُ عٍ سّنبّ بُن مَ. 
سَنيَ وُيَشِ عَلَ نَشَ عٍ رَكِسِ، كْنْ عٍ مُ فبِلٍن عَ مَتَندِقٍ رَ. نَ كُي عٍ نَشَ لْي عٍ شَ يُنُبِيٍ شَ قٍ رَ. 
كْنْ عَلَ نَشَ عٍ تْورّ تٌ، عَ نَشَ عٍ وَ شُي مّ. 
عَ نَشَ رَتُ عَ شَ سَاتّ مَ، عَ كِنِكِنِ عٍ مَ عَ شَ شَنُنتٍيَ تِلِنشِ شَ قٍ رَ. 
عَ نَشَ عَ نِيَ مِشِيٍ شَ كِنِكِنِ عٍ مَ كٌنيِيَ كُي. 
مُشُ مَرِفِ عَلَتَلَ، مُشُ رَكِسِ. عِ شَ مُشُ رَ مِنِ سِيٍ تَفِ، عَلَكٌ مُشُ شَ عِ شِلِ سّنِيّنشِ تَنتُ، مُشُ شَ سّيوَ عِ مَتْشْقٍ رَ. 
تَنتُي نَ عِسِرَيِلَ مَرِفِ عَلَتَلَ بّ عَبَدَن! حَمَ بِرِن شَ عَ قَلَ؛ «عَمِنَ!» وٌ شَ عَلَ مَتْشْ!