يَبُرَ.
118.
وٌ عَلَتَلَ تَنتُ بَرِ مَ عَ قَن، عَ شَ شَنُنتٍيَ مُ حْنمَ عَبَدَن. 
عِسِرَيِلَ شَ عَ قَلَ، «عَ شَ شَنُنتٍيَ مُ حْنمَ عَبَدَن!» 
هَرُنَ بْنسْي شَ عَ قَلَ، «عَ شَ شَنُنتٍيَ مُ حْنمَ عَبَدَن!» 
عَلَ يَرَفَاشُييٍ شَ عَ قَلَ، «عَ شَ شَنُنتٍيَ مُ حْنمَ عَبَدَن!» 
ﭑ مَ تْورّ كُي، ﭑ نَشَ عَلَتَلَ مَشَندِ. عَ نَشَ ﭑ مَ دُبَ سُشُ ﭑ قُلُنقٍ رَ. 
عَلَتَلَ نَ ﭑ سّيتِ مَ، ﭑ مُ فَاشُمَ قٍقٍ مَ. عَدَ مَدِ نْمَ مُنسٍ نِيَدٍ ﭑ نَ؟ 
عَلَتَلَ نَ ﭑ قْشْ رَ، عَ ﭑ مَلِمَ. ﭑ قَمَ نّ نْدٍ ﭑ يَشُييٍ رَ. 
شَشِلِ تِقٍ عَلَتَلَ رَ، نَ نَن قَن بٍينُن شَشِلِ تِقٍ عَدَ مَدِ رَ. 
يّتّ تَشُقٍ عَلَتَلَ رَ دَنفِ يّتّ تَشُقٍ دُنِحَ مَنفّيٍ رَ. 
سِ بِرِن نُ ﭑ نَبِلِنشِ ﭑ فٍرٍ شِلِ مَ، كْنْ عَلَتَلَ نَشَ عَ نِيَ ﭑ شَ نْ عٍ رَ. 
عٍ نُ ﭑ نَبِلِنشِ عَ حَاشِ رَ، كْنْ ﭑ نَشَ نْ عٍ رَ عَلَتَلَ شِلِ رَ. 
عٍ نَشَ دِن ﭑ نَ عَلْ كُمِ تْنسْي، كْنْ عٍ نَشَ حْن عَلْ سّشّ شَرَشِ فَنمَ كِ نَشّ. عَلَتَلَ نَن عَ نِيَ ﭑ شَ نْ عٍ رَ. 
عٍ نُ ﭑ مَتُتُنمَ سّنبّ رَ، عَ فبٍ مُ نُ لُشِ ﭑ شَ بِرَ، كْنْ عَلَتَلَ نَشَ ﭑ مَلِ. 
عَلَتَلَ نَن نَ ﭑ سّنبّ نُن ﭑ مَ سّيوّ رَ، عَ بَرَ ﭑ نَكِسِ! 
سّيوّ نُن شُننَكٍلِ شُي نَشَ مِنِ تِنشِنتْييٍ شْنيِ عَ قَلَقٍ رَ، 
«عَلَتَلَ نَشَ وَلِ سّنبّ رَ! عَ نَشَ عَ مَنفّيَ مَسٍن، عَ كَابَنَكٌي رَبَ.» 
ﭑ مُ قَشَ، ﭑ نَشَ كِسِ، عَلَكٌ ﭑ شَ عَلَتَلَ شَ كَابَنَكٌي مَسٍن حَمَ بّ. 
عَلَتَلَ بَرَ ﭑ حَشَنكَتَ، كْنْ عَ مُ ﭑ لُشِ ﭑ شَ قَشَ. 
وٌ تِنشِنيِ نَادّيٍ رَبِ ﭑ بّ، ﭑ سٌمَ مّننِ عَلَتَلَ تَنتُقٍ رَ. 
عَلَتَلَ شَ نَادّ نَن يِ كِ، تِنشِنتْييٍ سٌمَ نَشَن كُي. 
ﭑ عِ تَنتُمَ نّ، بَرِ مَ عِ بَرَ ﭑ مَ دُبَ سُشُ، عِ بَرَ قِندِ ﭑ نَكِسِمَ رَ. 
بَنشِتِيٍ مّي فّمّ نَشَن نَ، نَ بَرَ قِندِ بَنشِ سَنفَنتِمّ رَ. 
نَ كٍلِشِ مَرِفِ نَن مَ. كَابَنَكٌي نَ عَ رَ وٌن تَن بّ. 
لْشْي نَن يِ كِ عَلَتَلَ نَشَن حَنِفٍشِ، وٌن شَ حّلّشِن، وٌن شَ سّيوَ عَ شَ قٍ رَ. 
يَندِ عَلَتَلَ، مُشُ رَكِسِ! يَندِ عَلَتَلَ، مُشُ شُن نَكٍلِ. 
بَرَكَ نَ مِشِ مَ نَشَن قَقٍ مَرِفِ شِلِ رَ. مُشُ عَلَتَلَ مَتْشْمَ عَ شَ بَنشِ كُي. 
مَرِفِ نَن نَ عَلَتَلَ رَ، نَشَن شَ نْرّ بَرَ يَنبَ وٌن مَ. وٌ شَ سّرّشّ شِرِ سّرّشّبَدٍ سّيتِ مَ. 
ﭑ مَرِفِ عَلَ نَن عِ رَ، ﭑ عِ تَنتُمَ نّ، ﭑ مَرِفِ عَلَ نَن عِ رَ، ﭑ عِ مَتْشْمَ نّ. 
وٌ عَلَتَلَ تَنتُ بَرِ مَ عَ قَن. عَ شَ شَنُنتٍيَ مُ حْنمَ عَبَدَن.