تَالِيٍ.
3.
ﭑ مَ دِ، عِ نَشَ نّيمُ ﭑ مَ مَرَ سِيٍ مَ، عِ بْحّ شَ ﭑ مَ سّرِيّ رَبَتُ، 
بَرِ مَ عٍ قَمَ عِ شَ سِمَيَ شْن نَكُيَدٍ بْحّسَ كُي. 
عِ نَشَ دُفُتّفّحَ نُن نْندِ رَبّحِن، عِ شَ عٍ شِرِ عِ كْن مَ، عِ شَ عٍ سّبّ عِ سٌندٌنيِ مَ. 
عِ قَمَ هِننّ نُن شَشِلِ قَنيِ سْتْدٍ نَ كِ نّ، عَلَ نُن عَدَ مَدِيٍ يَ عِ. 
عِ يّتّ تَشُ عَلَتَلَ رَ عِ بْحّ بِرِن نَ، عِ نَشَ لَ عِ يّتّ رَ. 
عِ شَ عَلَ كٌلٌن عِ شَ كِرَ بِرِن شْن، عَ تَن نَن قَمَ حّرّ كِ قَنيِ مَسٍندٍ عِ بّ. 
عِ نَشَ عِ شَشِلِ تِ عِ يّتّ رَ، عِ شَ فَاشُ عَلَتَلَ يَ رَ، عِ شَ فبِلٍن قٍ حَاشِ قْشْ رَ. 
نَ قِندِ مَ يَلَنيِ نَن نَ عِ قَتٍ بّ، عَ سّنبّ قِ عِ شْرِيٍ مَ. 
عَلَتَلَ بِنيَ عِ هَرِفٍ رَ، عِ شَ دَشَمُي سِنفٍ قِ عَ مَ. 
نَ نَن عَ نِيَمَ بَلٌي نُن مِنسٍ فبٌ عِ يِ رَ، عِ شَ سَفَيٍ بِرِن نَقٍ. 
ﭑ مَ دِ، عِ نَشَ تٌندِ عَلَتَلَ شَ مَتِنشِنيِ رَ، عِ شَ عَ شَ مَرَ سِيٍ سُشُ، 
بَرِ مَ عَلَتَلَ مَرَ سِ قِمَ نّ عَ شَنُنتٍنيِيٍ مَ، عَلْ بَبَيٍ عٍ شَ دِ مَتِنشِنمَ مَرَقَنيِ كُي كِ نَشّ. 
سّيوّ نَ مِشِ بّ نَشَن شَشِلِمَيَ سْتْشِ، سّيوّ نَ عَدَ مَ بّ نَشَن قَهَامُي سْتْ. 
شَشِلِمَيَ شَ فٍينِ فبٌ فبٍتِ بّ، عَ تِدٍ دَنفِ شّيمَ رَ. 
عَ قَن فّمّ تٌقَنيِ بّ، عَ تِدٍ دَنفِ عِ وَشْنسٍ بِرِن نَ. 
شَشِلِمَيَ قِندِ مَ سِمَيَ شْنكُيٍ نَن نَ، عَ قِندِ بَننَيَ نُن شُننَكٍلِ رَ. 
شَشِلِمَيَ كِرَ قَن، عَ بْحّسَ قِمَ عَدَ مَدِيٍ مَ. 
عَ قِندِشِ سِمَيَ وُرِ نَن نَ عَ سُشُمَيٍ بّ. مِشِ نَشٍيٍ كَنكَنمَ لْننِ مَ، نٍيٍ سّيوَ مَ نّ. 
عَلَتَلَ بْشِ يَءِلَنشِ لْننِ نَن نَ، عَ كٌورٍ يَءِلَنشِ شَشِلِ قَنيِ نَن نَ. 
عَ شَ لْننِ نَن يٍ رَ مِنِشِ بْشِ مَ، عَ شَ شَشِلِ قَنيِ نَن يٍ رَفَتَشِ نُشُييٍ كُي. 
ﭑ مَ دِ، سّرِيّ نُن نْندِ رَفَتَ عِ بْحّ كُي، عٍ نَشَ مَكُيَ عِ رَ. 
عٍ سِمَيَ نُن هِننّ قِمَ نّ عِ مَ، 
عِ شَ دُنِحّءِفِرِ سْونّيَمَ نّ، عِ مُ دِنكٌنمَ. 
عِ نَ عِ سَ، عِ مُ فَاشُمَ، عِ شِمَ نّ عَ قَنيِ رَ. 
عِ نَشَ فَاشُ فبَلٌي يَ رَ، عِ نَشَ فَاشُ مِشِ حَاشِيٍ شَ فٍرٍ يَ رَ، 
بَرِ مَ عَلَتَلَ نَن نَ عِ شَ شَشِلِسَ رَ. عَ عِ رَتَنفَمَ نّ فَنتَنيِ بِرِن مَ. 
عِ نَشَ تٌندِ مِشِ مَلِدٍ عِ نْمَ نَشَن نَ. 
عِ نَشَ عَ قَلَ عِ بٌورٍ بّ، «سِفَ، تِنَ عِ قَ،» شَ عَ مَلِ شَ قّيرّ نَ عِ بّ تٌ. 
عِ نَشَ عِ دّقَنبٌورٍ يَنقَ. 
عِ نَشَ مِشِ تْوحّفّ، نَشَن مُ قٍ حَاشِ يٌ رَبَشِ عِ رَ. 
عِ نَشَ فٍرٍ سٌي تْونّ، عِ نَشَ بِرَ عَ حّرّ كِ قْشْ رَ. 
عَلَتَلَ مِشِ حَاشِ شْنمَ، كْنْ تِنشِنتْي تَن نَقَن عَ مَ. 
عَلَتَلَ مِشِ حَاشِ شَ بَنشِ دَنكَمَ نّ، كْنْ عَ بَرَكّ سَمَ نّ تِنشِنتْي سَبَتِدٍ مَ. 
عَلَ يّتّ عِفبٌي عِفٌرٌ مَ نّ، كْنْ عَ هِننّمَ مِشِ مَفٌرٌشِ تَن نَ. 
شَشِلِمَيٍ نْرْ مَ نّ، كْنْ شَشِلِتَرٍيٍ تَن يَافِ نَن سْتْمَ.