تَالِيٍ.
8.
لْننِ مُ مِشِ شِلِمَ شّ؟ شَشِلِ قَنيِ مُ عَ يّتّ مَسٍنمَ شّ؟ 
عَ شَ مَسٍنيِ تِمَ يِرٍ عِتٍشِ قَرِ، عَ وْيّنمَ كِرَ دّ رَ نُن كِرَ رَلَندٍيٍ. 
عَ عَ شُي عِتٍمَ تَا سٌدٍ دّ رَ مِشِ دَنفِمَ دّننَشّ. عَ نَشّ، 
«عَدَ مَدِيٍ، ﭑ نَ وٌ تَن نَن مَشِلِقٍ، مَسٍنيِ نَ ﭑ يِ رَ عِبُنَدَ مَ بِرِن بّ. 
شَشِلِتَرٍ شَ شَشِلِ سْتْ، لْننِتَرٍ شَ لْننِ قٍن. 
وٌ وٌ تُلِ مَتِ ﭑ مَ مَسٍنيِ هَفِفّ رَ، مَسٍنيِ تِنشِنشِ نَشَن مِنِمَ ﭑ دّ عِ. 
ﭑ نَ نْندِ نَن قَلَقٍ وٌ بّ يِ كِ. تِنشِنتَرٍيَ مُ رَقَن ﭑ مَ قٍقٍ مَ. 
ﭑ مَ وْيّنيِ بِرِن تِنشِن، وُلٍ نُن سّنِيّنتَرٍحَ يٌ مُ نَ عٍ يَ مَ. 
نٍيٍ قِيشّ شَشِلِمَ بّ، عٍ تِنشِن لْننِلَيٍ بّ. 
وٌ شَ ﭑ مَ لْننِ قٍن دَنفِ فبٍتِ رَ، وٌ شَ عَ كٌلٌن شَشِلِ قَنيِ تِدٍ فبٌ شّيمَ قَنيِ بّ، 
قَهَامُي تِدٍ دَنفِ فّمّ تٌقَنيِ رَ. سٍسٍ مُ نَ نَشَن تِدٍ دَنفِمَ نٍيٍ رَ.» 
«ﭑ تَن لْننِ، ﭑ سٌمَ قٍ كُي، ﭑ عَ تَفِ رَبَ. 
شَ عَلَتَلَ شَ يَرَفَاشُي نَ عِ بّ، عِ قٍ حَاشِ نَن شْنمَ. يّتّ عِفبٌحَ، قٍ حَاشِيٍ، نُن وْيّن كٌبِيٍ، ﭑ نٍيٍ نَن شْنمَ. 
ﭑ فبٍ نَن نَ مَرَ سِ نُن نْندِ رَ، شَشِلِ قَنيِ نُن سّنبّ كَنيِ نَن ﭑ نَ. 
ﭑ تَن نَن مَنفّيٍ رَحّرّ مَ، مَنفّ نَشٍيٍ يَامَرِ تِمَ تِنشِنيِ رَ. 
ﭑ تَن نَن بْشِ يَرٍرَتِيٍ رَحّرّ مَ، ﭑ كُنتِفِيٍ تِمَ عَدَ مَدِيٍ يَ مَ. 
ﭑ مِشِ نَن شَنُمَ، نَشَن ﭑ شَنُ. نَشٍيٍ ﭑ قٍنمَ، نٍيٍ ﭑ تٌمَ نّ. 
بَننَيَ نُن بِنيّ نَ ﭑ تَن نَن يِ رَ، هَرِفٍ نَشَن مُ كَنَمَ. 
ﭑ نَشَن قِمَ مِشِ مَ عَ قَن شّيمَ قَنيِ بّ، عَ شَ فٍينِ دَنفِ فبٍتِ رَ. 
ﭑ نَن ﭑ حّرّ مَ نْندِ كِرَ نَن شْن مَ، تِنشِنيِ نَ دّننَشّ، 
عَلَكٌ ﭑ شَنُنتٍنيِ شَ هَرِفٍ سْتْ كّ رَ، قٍ قَنيِ شَ لُ عٍ يِ رَ دُنِحّءِفِرِ كُي.» 
«عَلَتَلَ نَشَ ﭑ دَا عَ شَ وَلِ بِرِن قْلّ رَ. 
ﭑ نُ نَ كَبِ قْلّ، بٍينُن بْشِ شَ دَا. 
ﭑ بَرِ تّمُي بَا مُ نُ نَ، دُلٌنيِ مُ نُ نَ. 
ﭑ بَرِ نّ بٍينُن فٍيَيٍ شَ مِنِ، 
بٍينُن بْشِ نُن قْتْنيِ شَ دَا. 
عَ تٌ نُ كٌورٍ دَاقٍ، ﭑ نُ نَ. عَ تٌ نُ كٌورٍ وَلَشّ عِتَلَقٍ، ﭑ نُ نَ. 
عَ تٌ نُ نُشُي تِقٍ كٌورٍ مَ، ﭑ نُ نَ. عَ تٌ نُ يٍ رَ مِنِقٍ سّنبّ رَ بْشِ بُن، ﭑ نُ نَ. 
عَ تٌ نُ نَانِنيِ سَقٍ بَا بّ عَلَكٌ يٍ نَشَ قَ بَنبَرَن حّ، ﭑ نُ نَ. عَ تٌ نُ دُنِحَ بُنيِ دْشْقٍ، ﭑ نُ نَ. 
ﭑ قَن نُ نَ عَ قّ مَ عَ مَلِقٍ رَ، لْشْ يٌ لْشْ ﭑ قِندِ عَ بّ سّيوّ نَن نَ، ﭑ قَ ﭑ حّلّشِن عَ يَ عِ تّمُي بِرِن. 
ﭑ حّلّشِنشِ عَ شَ دُنِحَ دَاشِ نَن نَ، عَ قِندِشِ ﭑ بّ سّيوّ رَ لُقٍ رَ عَدَ مَدِيٍ تَفِ.» 
«يَكْسِ ﭑ مَ دِيٍ، وٌ وٌ تُلِ مَتِ ﭑ نَ، سّيوّ نَ مِشِ بّ نَشَن بِرَ مَ ﭑ مَ كِرَ قْشْ رَ. 
وٌ وٌ تُلِ مَتِ ﭑ مَ شَرَنيِ رَ، وٌ شَ قِندِ لْننِلَيٍ رَ. وٌ نَشَ عَ رَبٌلٌ دٍ. 
سّيوّ نَ مِشِ بّ نَشَن عَ تُلِ مَتِمَ ﭑ نَ، نَشَن لُمَ ﭑ سّيتِ مَ تّمُي بِرِن، نَشَن ﭑ مَمّمَ نَادّ رَ. 
ﭑ كٌلٌنمَ بَرَ كِسِ، عَلَتَلَ بَرَ هِننّ نَ كَنيِ رَ. 
كْنْ ﭑ فٍرٍقَ تَن بَرَ عَ يّتّ بْنْ، ﭑ شْنمِشِ نَ قَشّ قٍنقٍ نَ كِ نّ.»