تَالِيٍ.
12.
مِشِ يٌ تِنمَ مَرَ سِ رَ، نَ وَ مَ لْننِ نَن شْن، نَشَن تَن مُ تِنمَ نَ رَ، دَشُي نَن عَ رَ. 
عَلَتَلَ هِننّمَ نّ مِشِ قَنيِ رَ، عَ مِشِ كٌبِ تَن حَشَنكَتَ. 
حَاشُحَ مُ شِلِ شُنفبٍ قِمَ مِشِ مَ، كْنْ سٍسٍ مُ عَ نِيَمَ تِنشِنتْي سَنكٍيٍ شَ تَلَ. 
فِنّ قَنيِ قِندِ مَ عَ شَ مْرِ شَ شُننَكٍلِ نَن نَ، فِنّ حَاشِ تَن لُمَ نّ عَلْ كُلِ نَشَن نَ حِنيِ كُي. 
مِشِ تِنشِنشِيٍ شَ مَحْشُنيِ قَن، كْنْ مِشِ حَاشِ شَ مَرَ سِ مِشِ مَدَشُمَ نّ. 
مِشِ حَاشِ شَ وْيّنيِ مِشِ قَشَمَ نّ، كْنْ تِنشِنتْي تَن شَ وْيّنيِ مِشِ رَكِسِمَ نّ. 
مِشِ حَاشِيٍ شَ قٍ قَمَ نّ كَنَدٍ، كْنْ سٍسٍ مُ مِشِ تِنشِنشِيٍ شَ دٍنبَيَيٍ تٌمَ. 
حَمَ لْننِلَيٍ مَتْشْمَ نّ، كْنْ بْحّ حَاشِ كَنيِيٍ، عٍ يٌمَ نّ نٍيٍ مَ. 
يّتّ مَفٌرٍ، مَلِمَ كٍرٍن ثٍتِ نَ نَشَن بّ، عَ قِسَ يّتّ عِفبٌي بّ، بَلٌي مُ نَ نَشَن يِ رَ. 
تِنشِنتْي مّينِمَ نّ عَ شَ شُرُ سٍ مَ، كْنْ مِشِ حَاشِ تَن يَ عِشَرَ. 
بْشِ رَوَلِ بَلٌي سْتْمَ نّ، كْنْ لْننِتَرٍ بِرَ مَ قٍ قُقَقُ نَن قْشْ رَ. 
مِشِ حَاشِ هَرِفٍ قٍنمَ تِنشِنتَرٍيَ رَ، كْنْ تِنشِنتْي سَنكٍيٍ تَن سِفَمَ بْشِ سُشُ رَ نّ. 
قٍ حَاشِ قِندِ مَ فَنتَنيِ نَن نَ مِشِ حَاشِ بّ، كْنْ تِنشِنتْي عَ يّتّ رَتَنفَمَ نّ نَ تْورّ مَ. 
وْيّن قَنيِ قِندِ مَ شُننَكٍلِ نَن نَ مِشِ بّ، عَلْ مِشِ تٌ عَ شَ وَلِ سَرٍ سْتْمَ. 
لْننِتَرٍ عَ مَحْشُنشِ عَ عَ شَشِلِ قَن، لْننِلَ تَن مَرَ سِ نَن قٍنمَ. 
لْننِتَرٍ بْحّ تٍ رَقُرَ، لْننِلَ تَن مُ كٌنبِ يَابِمَ. 
تِنشِنتْي نْندِ نَن قَلَمَ عَ بٌورٍ شُن، كْنْ سٍيدٍ بَ حَاشِ وُلٍ نَن تُن مَدْشْمَ. 
مِشِ دّ وُيَشِ شَ وْيّنيِ مِشِ مَشْنْمَ نّ عَلْ سَنتِدّفّمَ، كْنْ لْننِلَ تَن شَ وْيّنيِ مِشِ نَن نَيَلَنمَ. 
نْندِ قَلّ شَ مَسٍنيِ مُ مَسَرَ مَ، كْنْ وُلٍ قَلّ شَ مَسٍنيِ لُمَ نّ مَسَرَ رَ. 
مَءِقُي نَن نَ مِشِ حَاشِ بْحّ كُي، سّيوّ نَ مِشِ بّ، نَشَن فٍرٍ رَشُبٍنمَ. 
قٍ حَاشِ يٌ مُ تِنشِنتْي لِمَ، كْنْ مِشِ حَاشِيٍ نَ نَن تُن سْتْمَ. 
عَلَتَلَ وُلٍ قَلّيٍ شْنمَ نّ، عَ هِننّمَ نّ نْندِ قَلّيٍ رَ. 
لْننِلَ عَ شَ لْننِ مَسٍن تّمُي كٌلٌن، لْننِتَرٍ تَن عَ شَ دَشُحَ نَن عِقَلَمَ عَ شُي عِتٍشِ رَ. 
تُننَبّشِلَيٍ قِندِ مَ مَنفّيٍ نَن نَ، كْنْ تُننَشْنّيٍ قِندِ مَ كٌنيِيٍ رَ. 
كْنتْقِلِ لُمَ نّ مِشِ لَهَلّ مَسَرَ رَ، وْيّن قَنيِ تَن عَ بْحّ رَ سّيوَ مَ نّ. 
تِنشِنتْي كِرَ تِنشِنشِ مَسٍنمَ نّ عَ بٌورٍ بّ، مِشِ حَاشِ تَن عَ بٌورٍ رَلْيمَ نّ. 
كٌيِنمَ تُننَشْنّ مُ عَ شَ تْوكّ فَنمَ، كْنْ تُننَبّشِلَ مّينِمَ نّ عَ سْتْسٍيٍ مَ. 
سِمَيَ نَ كِرَ تِنشِنشِ نَن شْن مَ. قَشّ مُ قُلَمَ نَ كِرَ رَ.