تَالِيٍ.
16.
عَدَ مَدِ نَتّ تٌنفٌمَ عَ بْحّ كُي، كْنْ مَرَفِرِ نَ عَلَ نَن بّلّشّ. 
عَدَ مَ تَن بّ، عَ شَ كِرَ بِرِن قَن، كْنْ كِيتِ سَ مَنفّ عَلَ عَ بْحّ كٌلٌن. 
وَلِ بِرِن تَشُ عَلَتَلَ رَ، عَلَكٌ عَ شَ سْونّيَ. 
عَلَتَلَ قٍ بِرِن يَءِلَنشِ قٍ ندٍ نَن مَ. هَلِ مِشِ حَاشِ دَاشِ فبَلٌي لْشْي نَن مَ قٍ رَ. 
عَلَتَلَ يّتّ عِفبٌي شْنشِ. حَشَنكَتّ نَن عَ مَمّقٍ. 
يُنُبِ شَقَرِ مَ هِننّ نُن دُفُتّفّيَ نَن سَابُي رَ. عَلَتَلَ شَ يَرَفَاشُي مِشِ رَتَنفَمَ قٍ حَاشِ نَن مَ. 
مِشِ حّرّ كِ نَ رَقَن عَلَتَلَ مَ، عَ عَ نِيَمَ نّ فٍرٍ شَ حْن نَ كَنيِ نُن عَ يَشُييٍ تَفِ. 
سٍ دٌندٌرٌنتِ سْتْشِ تِنشِنيِ رَ نَ نَن قِسَ سٍ فبٍفبٍ سْتْشِ بّ تِنشِنتَرٍيَ كُي. 
مِشِ نَتّ تٌنفٌمَ عَ شَ قٍ رَبَشِ مَ، كْنْ نَ قٍيٍ رَفِرِ مَنفّ نَ عَلَتَلَ نَن نَ. 
مَنفّ شَ مَسٍنيِ تِدٍ فبٌ، عَ شَ كِيتِ شَ تِنشِن. 
عَلَتَلَ نَ سِكٍيلِ تِنشِنشِ نَن بّ، عَ شَ وَلِ نَن نَ سٍ مَنِيَسٍ كَمَلِشِ رَ. 
قٍ حَاشِ مُ رَقَن مَنفّيٍ مَ، بَرِ مَ تِنشِنيِ نَن مَنفّ كِبَنيِ مَبَنبَنمَ. 
مَنفّيٍ شَ هِننّ نَ تِنشِنتْييٍ بّ، نْندِ قَلّ رَقَن عٍ مَ. 
مَنفّ شَ بْحّتٍ مِشِ قَشَمَ نّ، كْنْ لْننِلَ قَتَ مَنفّ بْحّ رَفٌرٌدٍ. 
مَنفّ شَ حّلّشِنيِ قِندِ مَ سِمَيَ نَن نَ، عَ شَ هِننّ لُمَ نّ عَلْ نُشُي نَشٍيٍ تُنّ يٍ رَ مِنِمَ. 
لْننِ سْتْي قَن شّيمَ سْتْي بّ، شَشِلِ قَنيِ سْتْي قَن فبٍتِ سْتْي بّ. 
تِنشِنتْي شَ كِرَ مُ سِفَمَ قٍ حَاشِ مَ. مِشِ نَشَن عَ حّنفِ سَشِ عَ حّرّ كِ شْن مَ، نَ كِسِمَ نّ. 
يّتّ عِفبٌحَ مِشِ نَن شُن نَكَنَمَ، يّتّ عِتٍيَ مِشِ نَن نَلْيمَ. 
لُقٍ يّتّ مَفٌرٍيٍ يَ مَ، نَ قَن نَاقُلِ عِتَشُنقٍ بّ يّتّ عِفبٌييٍ يَ مَ. 
هّيرِ نَ مِشِ بّ نَشَن عَ حّنفِ سَمَ قٍ رَبَ كِيٍ شْن مَ. سّيوّ نَ مِشِ بّ نَشَن عَ شَشِلِ تِمَ عَلَتَلَ رَ. 
مِشِ سَبَرِشِ قِندِ مَ شَشِلِمَ نَن نَ. وْيّن حْشُنمّ شَشِلِ قِمَ نّ مِشِ مَ. 
شَشِلِ قَنيِ سِمَيَ نَن قِمَ شَشِلِمَ مَ، شَشِلِتَرٍحَ قِندِ مَ حَشَنكَتّ نَن نَ شَشِلِتَرٍ بّ. 
شَشِلِمَ عَ حّنفِ سَمَ عَ شَ مَسٍنيِ مَ، عَلَكٌ لْننِ قَنيِ شَ مِنِ عَ دّ كُي. 
وْيّن قَنيِ قِندِشِ كُمِ نَن نَ، نَشَن شَشِلِ نُن قَتٍ رَيَلَنمَ. 
عَدَ مَ عَ مَحْشُن نّ عَ شَ كِرَ قَنشِ، كْنْ عَ رَحْنيِ عَ شُن تِمَ قَشّ نَن نَ. 
وَلِكّ شَ كَامّ نَن عَ تُتُنمَ وَلِ مَ. 
قُيَنتٍ قٍ حَاشِ مَحْشُنمَ نّ، عَ شَ مَسٍنيِ مِشِ فَن. 
مِشِ كٌبِ فٍرٍ شْرّ عِسْشْمَ نّ، نَاقِشِ دّقَنمَيٍ تَفِ عِسٌمَ. 
مِشِ كٌبِ عَ بٌورٍ رَتَنتَنمَ نّ، عَ نَ تِ كِرَ حَاشِ شْن مَ. 
مِشِ نَشَن تْنشُمَ مَسٍنمَ عَ يَ نُن عَ دّ رَ، عَ وَ مَ قٍ حَاشِ ندٍ نَن نَبَقٍ. 
شُنسّشّ قِيشّ قِندِ مَ بِنيّ نَن نَ، نَشَن سْتْمَ كِرَ تِنشِنشِ شْن مَ. 
دِحّ مِشِ قَن فٍرٍ سٌي بّ، يّتّ سُشُي تِدٍ دَنفِ تَا سُشُقٍ رَ. 
مِشِ كَندَ بُنمَ قٍ ندٍ مَ، كْنْ قٍ بِرِن نَفِرِ مَنفّ نَ عَلَتَلَ نَن نَ.