تَالِيٍ.
21.
عَلَتَلَ نَن مَنفّ بْحّ رَحّرّ مَ، عَلْ عَ شُرٍ رَحّرّ مَ كِ نَشّ عَ وَشْنكِ رَ. 
عَدَ مَدِ حْشْ عَ مَ عَ شَ كِرَ بِرِن تِنشِن، كْنْ عَلَتَلَ نَن مِشِ بْحّ مَتٌمَ سِكٍيلِ رَ. 
وٌ شَ بِرَ نْندِ نُن تِنشِنيِ قْشْ رَ. نَ رَقَن عَلَتَلَ مَ دَنفِقٍ سّرّشّ رَ. 
يّتّ عِفبٌحَ نُن قٍ حَاشِ رَبَقٍ، نَ بِرِن قِندِشِ يُنُبِ نَن نَ. 
وَكِلِلَ هَرِفٍ شُن مَسَمَ نّ، كْنْ فبَتَ فبٍفبٍ قِندِ مَ تْورّ نَن نَ. 
هَرِفٍ نَشَن سْتْشِ وُلٍ رَ، عَ مُ بُمَ، عَ مِشِ شَنِنمَ نّ عَلِفِيَمَ. 
مِشِ حَاشِيٍ شُن نَكَنَمَ نّ، بَرِ مَ عٍ مُ تِنشِنيِ رَبَتُمَ. 
مِشِ كٌبِ مُ تِنشِن، كْنْ مِشِ قَنيِ عَ حّرّ مَ كِرَ تِنشِنشِ شْن مَ. 
لُقٍ رَ بَنشِ قَرِ مَ، عَ قِسَ لُقٍ رَ فِنّ فٍرٍ سٌي سّيتِ مَ بَنشِ كُي. 
مِشِ حَاشِ وَ مَ قٍ حَاشِ نَن تُن شْن مَ. عَ مُ كِنِكِنِمَ مِشِ يٌ مَ، هَلِ دْشْبٌورٍ. 
شَشِلِتَرٍ نَ عَ تٌ عٍ مِشِ مَيٍلٍ حَشَنكَتَمَ، عَ شَشِلِ دِ سْتْمَ نّ، كْنْ شَشِلِمَ تَن قَهَامُي سْتْمَ لْننِ نَن كُي. 
عَلَ نَشَن تِنشِن، عَ مِشِ حَاشِ مَتٌمَ نّ، عَ عٍ شُن نَكَنَ. 
مِشِ نَشَن تٌندِ مَ عَ تُلِ مَتِدٍ سٍتَرٍ وَ شُي رَ، عَ قَن قَمَ نّ وَدٍ، مِشِ مُ عَ تُلِ مَتِمَ عَ رَ. 
بْحّتٍ كِقٍ فُندٌ رَ، عَ بْحّ رَفٌرٌ مَ نّ. مِشِ كِقٍ سُتُرّ رَ، عَ شَ شْنّ مَفٌرٌ مَ نّ. 
حّرّقٍ تِنشِنيِ كُي، نَ قِندِشِ سّيوّ نَن نَ تِنشِنتْي بّ، كْنْ نَ حّرّ كِ مْولِ مُ رَقَن مِشِ حَاشِ مَ. 
مِشِ نَشَن فبِلٍنمَ كِرَ قَنيِ قْشْ رَ، نَ قَمَ نّ لُدٍ مِشِ قَشَشِيٍ يَ مَ. 
مِشِ نَشَن بِرَ مَ عَ وَشْنقٍ فبَنسَن قْشْ رَ، نَ لُمَ نّ سٍتَرٍحَ كُي. مِشِ نَشَن وّنِ نُن دٌنسٍ قَنيِ تُن قٍنمَ، نَ مُ بَننَمَ. 
مِشِ حَاشِ قِندِ مَ تِنشِنتْي شُنسَرٍ نَن نَ، يَنقَنتٍ قِندِ مِشِ قَنيِ شُنسَرٍ رَ. 
لُقٍ رَ فبٍنفبٍرٍنيِ مَ، عَ قِسَ لُقٍ رَ فِنّ قِتِنّتْي سّيتِ مَ. 
هَرِفٍ قَنيِ نُن تُرٍ فبٍفبٍ نَ لْننِلَ شْنيِ، كْنْ لْننِتَرٍ بَرَ عَ فبٍ بِرِن دٌن. 
مِشِ نَشَن بِرَ مَ تِنشِنيِ نُن هِننّ قْشْ رَ، عَ سِمَيَ، كِيتِ قَنيِ، نُن بِنيّ سْتْمَ نّ. 
لْننِلَ نْمَ نّ نْدٍ تَا مَكَنتَشِ رَ، عَ عٍ شَ تّتّ رَبِرَ عٍ شَشِلِ نُ تِشِ نَشَن نَ. 
مِشِ نَشَن قَتَ عَ دّ سُشُدٍ، نَ مُ تْورْ مَ. 
يّتّ عِفبٌي يٌمَ نّ مِشِيٍ مَ، عَ قٍ بِرِن سُشُمَ نَ شَشِلِ نَن نَ. 
مِشِ تُننَشْنْشِ وَشْنقٍ عَ قَشَمَ نّ، بَرِ مَ عَ مُ تِنمَ وَلِدٍ. 
لْشْي بِرِن مِشِ تُننَشْنْشِ مِلَمَ نّ عَ وَشْنسٍ مَ. تِنشِنتْي تَن مِشِ كِمَ عَ فبٍ سٍ بِرِن نَن نَ. 
مِشِ حَاشِ شَ سّرّشّ مُ رَقَن عَلَ مَ. شَ عَ سَ عَ بَ مَحْشُنيِ كٌبِ رَ، عَلَتَلَ شَ شْنّ شُن مَسَمَ نّ. 
سٍيدٍ وُلٍ قَلّ هَلَكِمَ نّ، كْنْ سٍيدٍ نْندِ قَلّ شَ سِمَيَ نَن بُمَ. 
مِشِ حَاشِ عَ يَتَفِ عِقْورْ مَ، كْنْ تِنشِنتْي قٍ تِنشِنشِ نَن نَبَمَ. 
لْننِ يٌ مُ نَ، قَهَامُي يٌ مُ نَ، مَرَ سِ يٌ مُ نَ، نَشَن سّنبّ فبٌ عَلَتَلَ بّ. 
سٌي مَشِرِ مَ فٍرٍ سٌ لْشْي نّ، كْنْ شُننَكٍلِ قَتَنمَ عَلَتَلَ نَن نَ.