تَالِيٍ.
25.
سُلٍمَنِ شَ تَالِ ندٍيٍ نَن يَ، يُدَ مَنفّ شٍسٍكِيَ نَشٍيٍ سّبّ؛ 
عَلَ قٍيٍ نْشُنمَ، مَنفّيٍ كَتَمَ عٍ قَهَامُدٍ. 
كٌورٍ شَ مَءِتٍيَ نُن بْشِ شَ تِلِنيِ مُ كٌلٌنمَ. مَنفّ سٌندٌن مَ قٍ قَن مُ نْمَ كٌلٌندٍ. 
شَ فبٍتِ فبِ بَ، عَ نْمَ قِندِدٍ سٍ تٌقَنيِ رَ. 
شَ مِشِ حَاشِ بَ مَنفّ رَبِلِنيِ، عَ شَ مَنفّيَ سَبَتِمَ نّ تِنشِنيِ سَابُي رَ. 
عِ نَشَ عِ يّتّ عِفبٌ مَنفّ يَ شْرِ، عِ نَشَ عِ يّتّ قِندِ مِشِ شُنفبٍ رَ. 
عَ قِسَ كُنتِفِ نَن شَ عِ شِلِ عِ شَ دْشْ يِرٍ ندٍ، دِنّ عَ شَ عِ رَكٍلِ مِشِ شُنفبٍ ندٍ بّ. 
عِ نَ قٍ ندٍ تٌ، عِ نَشَ فبَتَ سِفَقٍ رَ كِيتِ بَنشِ، بَرِ مَ شَ قٍ فبّتّ مِنِمَ عِ مُ نَشَن كٌلٌن، نَ نْمَ عِ رَيَافِدٍ عِ دْشْبٌورٍ يَ شْرِ. 
قٍ نَ سٌ وٌ نُن عِ دْشْبٌورٍ تَفِ، عِ نَشَ مِشِ فبّتّ شَ فُندٌ مَكّنّن، 
شَ نَ مُ عَ رَ مِشِ ندٍ نَ نَ كٌلٌن، عَ عِ رَيَافِمَ نّ، عِ قَ شِلِ كَنّ سْتْ عَبَدَن. 
وْيّنيِ قَلَشِ عَ كِ مَ، عَ تٌقَن عَلْ شّيمَ نُن فبٍتِ. 
شَشِلِمَ شَ مَرَ سِ تِدٍ فبٌ شَشِلِ قٍنيِ بّ، عَلْ شُرُندّ نَشَن يَءِلَنشِ شّيمَ قَنيِ رَ. 
دُفُتّفّ شّيرَ حْشُن عَ شّيمَ بّ، عَلْ قٌيٍ قَنيِ نَشَن قَمَ وَلِكّيٍ مَ شّ شَبَ تّمُي. 
مِشِ نَشَن عَ قَلَمَ عَ سٍتَرٍيٍ كِمَ، كْنْ عَ مُ عَ رَبَمَ، نَ كَنيِ لُشِ نّ عَلْ نُشُي نُن قٌيٍ نَشَن مُ قَمَ يٍ رَ. 
تُننَبّشِيَ عَ نِيَمَ نّ مَنفّ شَ نَتّ مَسَرَ، وْيّن حْشُنمّ سّنبّ فبٌ هَن عَ نْمَ شْرِ رَفِرَدٍ. 
عِ نَ كُمِ تٌ، نَشَن عِ رَلِمَ، نَ نَن كْن. شَ عَ رَدَنفِ يّ، عِ عَ بْشُنمَ نّ. 
عِ نَشَ عِ دْشْبٌورٍ شْنيِ سِفَقٍ رَدِفَن، شَ نَ مُ عَ رَ عِ شَ قٍ قَمَ نّ رَحَاشُدٍ عَ مَ. 
عِ دْشْبٌورٍ تْوحّفّقٍ شْنْ عَلْ سَنتِدّفّمَ شَاحّشِ، عَلْ تَنبّ رَ مٍلُشِ. 
عِ شَشِلِ تِقٍ يَنقَنتٍ رَ، نَ لُشِ نّ عَلْ حِنيِ كَنَشِ، عَلْ سَنيِ مَبّنشِ. 
مِشِ نَشَن سِفِ سَمَ مِشِ سُننُنشِ يَ شْرِ، نَ مَنِيَ مِشِ رَ نَشَن شِنبٍلِ دُفِ بَمَ قُرٍ مَ مَ شِنبٍلِ تّمُي. عَ شَ سُننُنيِ شُن نَن تُن مَسَمَ عَلْ مِشِ نَ فبّنفبّ سَ قِ يَ عِ. 
شَ كَامّ نَ عِ يَشُي مَ، دٌنسٍ سٌ عَ يِ رَ. شَ يٍ شْلِ نَ عَ مَ، يٍ سٌ عَ يِ رَ، عَ شَ عَ مِن. 
شَ عِ نَ وَلِ مْولِ رَبَ عَ بّ، نَ لُشِ نّ عَلْ عِ بَرَ تّ وٌلٍ دْشْ عَ شُن مَ. عَلَتَلَ نَن عِ فبٍحْشْمَ. 
قٌيٍ نَشَن كٍلِمَ كْولَ مَ، نَ قَمَ نّ تُنّ رَ. نّنيِ نَشَن نَاقِشِيَ قَلَمَ، نَ مِشِ يَتَفِ عِ شْنْمَ نّ. 
لُقٍ رَ بَنشِ قَرِ مَ، نَ قِسَ لُقٍ رَ فِنّ قِتِنّتْي سّيتِ مَ بَنشِ كُي. 
شِبَارُ قَنيِ نَشَن كٍلِشِ يِرٍ مَكُيٍ، عَ مَنِيَ يٍ شِنبٍلِ رَ مِشِ تَفَنشِ بّ. 
تِنشِنتْي نَشَن نَتّ تٌنفٌمَ، عَ شَ بِرَ مِشِ حَاشِ قْشْ رَ، نَ مَنِيَشِ يٍ دُلٌنيِ نَن نَ نَشَن بَرَ دُندَ، عَ يٍ مُ قَن سْنْن. 
كُمِ دٌنقٍ عَ رَدَنفِ عَ عِ، نَ مُ قَن. بِنيّ قٍنقٍ عِ يّتّ رَ، نَ قَن مُ قَن. 
مِشِ نَشَن مُ نْمَ عَ يّتّ رَشَندٍ عَ نَ شْنْ، نَ لُشِ نّ عَلْ تَا كَنَشِ نَشَن تّتّ بَرَ بِرَ.