تَالِيٍ. 26. كُيٍ مُ شِنبٍلِمَ سٌفٌقُرٍ رَ، تُنّ مُ قَمَ مَالٍ شَبَ تّمُي، نَ كِ عَ مُ لَن لْننِتَرٍ شَ بِنيّ سْتْ. دَنكّ مُ مِشِ قَنيِ سُشُمَ. نَ قٍ لُمَ نّ عَلْ شْنِ نَشَن مُ دْشْمَ، كٌيِنمَ شَ عَ فْنْ. سٌي بْنبْمَ نّ عَلَكٌ عَ شَ عَ فِ، كَرَقٌي رَ سٌمَ نّ سٌقَلٍ دّ عِ عَلَكٌ مِشِ شَ عَ رَحّرّ، شَشِلِتَرٍ قَن شُرُ مَ نّ وُرِ رَ عَلَكٌ عَ شَ مَتِنشِن. عِ نَشَ شَشِلِتَرٍ يَابِ عَ مَحْشُن كِ رَ، شَ نَ مُ عَ رَ وٌ بِرِن لَن. عِ شَ شَشِلِتَرٍ يَابِ عَ مَحْشُن كِ مَ، شَ نَ مُ عَ رَ عَ عَ يّتّ قِندِ مَ شَشِلِمَ نَن نَ. مِشِ نَشَن شَشِلِتَرٍ شّيمَ مَسٍنيِ ندٍ تِدٍ، نَ بَرَ عَ يّتّ تْورْ. تَالِ وْيّنيِ نَشَن مِنِمَ شَشِلِتَرٍ دّ عِ، نَ لُشِ نّ عَلْ مَبّنيِ سَنيِ نَشَن سّنبّ مُ نَ. شَشِلِتَرٍ بِنيَقٍ لُشِ نّ عَلْ فّمّ سَقٍ لَاتِ كُي. تَالِ وْيّنيِ نَشَن مِنِمَ شَشِلِتَرٍ دّ عِ، نَ لُشِ نّ عَلْ لُشُسِنيِ نَشَن نَ سِيسِلَ بّلّشّ عِ. مِشِ نَشَن وَلِ سٌمَ شَشِلِتَرٍ يِ رَ، شَ نَ مُ عَ رَ مِشِ يِ رَ عَ مُ نَشَن كٌلٌن، نَ لُشِ نّ عَلْ سْورِ نَشَن تَنبّ وٌلِمَ حَمَ مَبِرِ. شَشِلِتَرٍ نَشَن فبِلٍنمَ عَ شَ دَشُحَ مَ، نَ لُشِ نّ عَلْ بَرٍ نَشَن فبِلٍنمَ عَ شَ بْشُنيِ دٌن نَ. شَشِلِتَرٍ قَن قِسَ مِشِ بّ نَشَن عَ يّتّ قِندِشِ لْننِلَ رَ. قٍ سْونّيَمَ نّ نَ شَشِلِتَرٍ بّ دَنفِقٍ نَ يّتّ عِفبٌي رَ. مِشِ تُننَشْنْشِ نَن عَ قَلَمَ، «يّتّ نَ كِرَ رَ، يّتّ نَ تَا كُي.» نَادّ رَبِمَ، عَ مَن نَفَلِمَ، عَلْ تُننَشْنّ نَشَن عَ يَ رَبِمَ عَ شَ سَدٍ مَ، عَ مَن شِ. مِشِ تُننَشْنْشِ عَ دٌنسٍ سُشُمَ عَ بّلّشّ رَ، كْنْ عَ مُ عَ رَ سٌمَ عَ دّ عِ تُننَشْنْيَ سَابُي رَ. مِشِ تُننَشْنْشِ عَ يّتّ رَقِسَ شَشِلِمَ سٌلٌقٍرٍ بّ نَشٍيٍ يَابِ قِمَ شَشِلِمَيَ رَ. دَنفِ مِشِ نَشَن عَ يّتّ رَ سٌمَ فٍرٍ كُي نَشَن مُ عَ مَتٌشِ، نَ مَنِيَ مِشِ رَ نَشَن بَرٍ سُشُمَ عَ تُلِيٍ مَ. مِشِ نَشَن عَ بٌورٍ مَدَشُ، عَ قَ عَ قَلَ، «بٍرٍ نَن نُ عَ رَ،» نَ مَنِيَ دَشُي رَ نَشَن تّ مَشِرِ مَ تَنبّ مَ، عَ عَ وٌلِ. شَ يٍفٍ مُ نَ، تّ شُبٍنمَ نّ. شَ مِشِ كٍرٍن عَ سَبَرِ، سْنشْي دَنمَ نّ. تِفٍ قِندِ مَ نّ تّ وٌلٍ رَ، يٍفٍ قِندِ تّ رَ. سْنشْلَ قَن فٍرٍ رَبِرَ مَ نَ كِ نّ. نَاقِشِ شَ مَسٍنيِ لُشِ نّ عَلْ دٌنسٍ حْشُنمّ، نَشَن فٌرٌ مَ مِشِ قُرِ كُي. مِشِ حَاشِ نَشَن وْيّن حْشُنمّ قَلَمَ، نَ لُشِ نّ عَلْ بِرِكِ تٌ حَاشِيٍ سٍ قِيشّ مَسٌمَ نَشٍيٍ مَ. مِشِ حَاشِ عَ بٌورٍ مَدَشُمَ وْيّن حْشُنمّ رَ، كْنْ يَنقَنتٍيَ نَ عَ بْحّ كُي. هَلِ عَ وْيّنيِ حْشُن، عِ نَشَ لَ عَ رَ دٍ، بَرِ مَ كٌبِحَ نَ عَ سٌندٌنيِ كُي. عَ شَ شْننَنتٍيَ نْشُنشِ عَ شَ مَيٍندٍنيِ سَابُي رَ، كْنْ عَ شَ كٌبِحَ قَمَ نّ مِنِدٍ كّنّ مَ مِشِيٍ تَفِ. مِشِ نَشَن يِلِ فٍمَ فَنتَنيِ رَ، عَ تَن نَن قَمَ بِرَدٍ عَ كُي. مِشِ نَشَن فّمّ وٌلِمَ، نَ فّمّ فبِلٍنمَ عَ تَن نَن مَ. وُلٍ قَلّ تْوحّفّتْي نَن شْنمَ، مِشِ نَشَن عَ بٌورٍ مَتْشْمَ وُلٍ رَ، نَ كَسَرّ نَن تُن نَبَمَ.