عَننَبِ عٍسَيِ.
14.
عَلَتَلَ كِنِكِنِمَ نّ يَشُبَ بْنسْي مَ، عَ قَ عٍ رَ سَبَتِ عٍ شْنيِ عِسِرَيِلَ بْشِ مَ. شْحّيٍ قَن كَقُمَ نّ عٍ مَ، عٍ لُ لَنيِ كُي يَشُبَ بْنسْي يَ مَ. 
سِيٍ عٍ مَلِمَ نّ سَبَتِدٍ عٍ شْنيِ، نَ سِيٍ قَ قِندِ عِسِرَيِلَ شَ كٌنيِيٍ رَ. مِشِ نَشٍيٍ نُ بَرَ عٍ سُشُ، عٍ تَن يَتِ بَرَ قِندِ عِسِرَيِلَ شَ كٌنيِيٍ رَ. 
عَلَتَلَ نَ مَلَبُي قِ وٌ مَ وٌ شَ تْورّ نُن قٍ شْرْشْي شَ قٍ رَ تّمُي نَشّ، عَ قَ وٌ رَ مِنِ وٌ شَ كٌنيِحَ وَلِ شْرْشْي كُي نَشَن نُ بَرَ دْشْ وٌ مَ، 
وٌ قَمَ نّ يِ مَسٍنيِ تِدٍ بَبِلْن مَنفّ بّ، «مُنسٍ حَشَنكَتّ كَنيِ رَلْيشِ؟ عَ تْورّ نَشَن دْشْشِ مِشِيٍ مَ، نَ حْنشِ دِ؟ 
عَلَتَلَ بَرَ مِشِ حَاشِ شَ وُرِ بْنبْ تِ سٍ عِبٌلٌن، عَ بَرَ مَنفّ كٌبِ شَ مُنيَاتِ عِفِرَ، 
نَشَن نُ حَمَيٍ بْنبْمَ عَ شَ بْحّ تٍ رَ، نَشَن مُ دَنمَ نَشَن نُ نْي دْشْمَ حَمَنّيٍ مَ عَ شَ شْنّ كُي.» 
«يَكْسِ دُنِحَ نَ مَلَبُي نُن شَشِلِسَ نَن كُي قَ، بِرِن نَ عٍ شُي عِتٍقٍ سّيوّ كُي. 
هَلِ وُرِ بِلِ نَشٍيٍ نَ لِبَن، عٍ نَ حّلّشِنقٍ عِ شَ قٍ دَنيِ رَ، عٍ نُ قَ عَ قَلَ، ‹كَقِ عِ بِرَ، مِشِ يٌ مُ مُشُ قْنمَ سْنْن.› 
عَلِفِيَمَ نَ عَ يَءِلَنقٍ عِ قَقٍ رَ. كُنتِفِيٍ قُرٍيٍ رَكٍلِمَ نّ عِ يَ رَ عَلِفِيَمَ دِ مِ كُي، سِ مَنفّيٍ بِرِن نَكٍلِمَ نّ عٍ شَ كِبَنيِيٍ كُي، 
عِ رَ سّنّقٍ يِ وْيّنيِ رَ، ‹عِ قَن سّنبّ بَرَ كَنَ عَلْ مُشُ تَن، وٌن بِرِن بَرَ لُ يِرٍ كٍرٍن. 
عِ شَ يّتّ عِفبٌيَ بَرَ رَفٌرٌ فَبُرِ كُي، عِ شَ سِفِيٍ بَرَ دُندُ، كُلِيٍ بَرَ لُ عِ شَ سَدٍ مَ.›» 
«عِ بَرَ بِرَ كٍلِقٍ كٌورٍ مَ، عِ تَن نَشَن نُ يَنبَمَ عَلْ سُبَشّ لٌولٌي. عٍ بَرَ عِ رَبِرَ بْشِ، عِ تَن نَشَن نُ نْشِ حَمَنّيٍ رَ. 
عِ نُ عَ قَلَ نّ عِ بْحّ كُي، ‹ﭑ تَن تٍمَ نّ هَن عَرِيَننَ، ﭑ قِندِ نَا مَنفّ رَ، ﭑ دْشْ ﭑ مَ كِبَنيِ كُي مَلَنيِ يَ مَ نَشَن نَبَمَ نَ فٍيَ سّنِيّنشِ قَرِ. 
ﭑ تٍمَ نّ نُشُي قَرِ، ﭑ لُ عَلْ عَلَ سّنبّمَ.›» 
«كْنْ عِ شَ نَتٍ بَرَ كَنَ، عٍ بَرَ عِ رَفٌرٌ كٍلِقٍ كٌورٍ مَ هَن فَبُرِ كُي، عِ شَ لُ يِلِ تِلِنشِ كُي عَلِفِيَمَ. 
قَشَ مِشِ نَشٍيٍ عِ تٌمَ نَا، نٍيٍ عٍ يَ بَنبَنمَ نّ عِ رَ، عٍ قَ عَ مَحْشُن، ‹يِ نَن قِندِشِ نَ مِشِ رَ نَشَن نُ دُنِحَ عِمَشَمَ، نَشَن نُ مَنفّيَ كَنَمَ، 
نَشَن نُ دُنِحَ قِندِ مَ فبٍنفبٍرٍنيِ رَ عَ شَ تَايٍ كَنَقٍ رَ، نَشَن نُ تٌندِ مَ عَ شَ فٍيلِمَنِيٍ بّحِندٍ؟›» 
«حَمَنّ مَنفّيٍ بِرِن نَفَتَشِ عٍ شَ فَبُرِ بِنيّ نَن كُي، 
كْنْ عِ تَن مُ رَفَتَشِ عِ شَ فَبُرِ كُي، عَلْ سَلٌنيِ نَشَن سّفّمَ وُرِ مَ، عَلْ سْورِ نَشَن قَشَشِ سَنتِدّفّمَ رَ عَ لُ عَ بٌورٍيٍ قُرٍيٍ يَ مَ، عٍ بِرِن قَ فٌرٌ عَلِفِيَمَ يِلِ كُي. 
بِنيّ يٌ مُ لُمَ عِ شَ حْن قٍ كُي عَلْ عٍ تَن، بَرِ مَ عِ بَرَ عِ شَ بْشِ تُشُنسَن، عِ بَرَ عِ شَ حَمَ سْنتْ.» «مِشِ حَاشِ شَ دِيٍ شِلِ نّيمُمَ نّ دُنِحَ رَ. 
عٍ شَ دِيٍ كْن شَ رَشَبَ عٍ بَبَيٍ شَ يُنُبِيٍ شَ قٍ رَ، عٍ نَشَ عٍ عِكٍلِ قَ، عٍ بْشِ سْتْ عٍ تَايٍ تِمَ دّننَشّ. 
ﭑ تَن عَلَتَلَ سّنبّمَ كٍلِمَ نّ عٍ شِلِ مَ، ﭑ بَبِلْن شِلِ نُن عَ بْنسْي دْنشْي رَحْنمَ نّ، عٍ شَ دِ يٌ مُ لُمَ نَا. 
ﭑ عٍ شْنيِ قِندِ مَ شُندِ يِرٍ نَن نَ يٍ حَاشِ لُمَ دّننَشّ. ﭑ نٍيٍ شُن نَكَنَمَ قٍوٌ.» عَلَتَلَ سّنبّمَ شَ مَسٍنيِ نَن نَ كِ. 
مَنفّ عَلَتَلَ بَرَ عَ كَلِ يِ مَسٍنيِ رَ، «ﭑ نَتّ نَشَن تٌنفٌشِ عَ قَمَ كَمَلِدٍ، ﭑ وَشْنقٍ مُ كَنَمَ. 
ﭑ عَسِرِيَ بُتُشُنمَ نّ ﭑ مَ بْشِ كُي، ﭑ عٍ بٌرٌنمَ نّ ﭑ مَ فٍيَيٍ قَرِ. عٍ شَ نْي بَمَ نّ ﭑ مَ حَمَ قَرِ، ﭑ عٍ شَ كٌتٍ بَمَ نّ ﭑ مَ مِشِيٍ شُن.» 
نَتّ نَن نَ كِ نَشَن تٌنفٌشِ دُنِحَ بِرِن شِلِ مَ. عَلَتَلَ سّنبّمَ بّلّشّ نَن نَ كِ، عَ نَشَن عِتَلَشِ حَمَنّيٍ بِرِن شِلِ مَ. 
عَلَتَلَ بَرَ نَ نَتّ تٌنفٌ. ندٍ نَ كَنَمَ؟ عَلَتَلَ نَن بّلّشّ عِتَلَشِ. ندٍ نَ عِسٌمَ؟ 
مَنفّ عَشَسِ قَشَ حّ نَشَن نَ، عَلَ يِ مَسٍنيِ نَن تِ، 
«قِلِسِتَكَيٍ، وٌ نَشَ سّيوَ وٌ يَشُييٍ بِرَقٍ رَ. كٍلِقٍ بْشِمَسٍ ندٍ مَ، بْشِمَسٍ فبّتّ نَن بَرِ مَ، نَشَن شُلُن، عَ شْنْ نَ سِنفٍ بّ. 
نَ كُي، مِسِكِينّيٍ قَمَ نّ بَلٌدٍ، تْورْ مِشِيٍ مَلَبُمَ نّ شَشِلِسَ كُي، كْنْ وٌ تَن قِلِسِتَكَيٍ، ﭑ وٌ قَشَمَ نّ كَامّ رَ، ﭑ وٌ بْنسْي دْنشْي سْنتْمَ نّ. 
وَ شُي شَ مِنِ وٌ يَ مَ، لِمَنِيَ شَ بَ وٌ يِ! تُورِ قْورّ نَ تٍقٍ كْولَ بِرِ رَ، سْورِ يٌ مُ بَشِ عٍ رَ.» 
يَابِ مُندُن قِمَ سِيٍ شَ شّيرَيٍ مَ؟ عٍ عَ قَلَمَ نّ، «عَلَتَلَ نَن سِيٌنِ شَ قٍ مَبَنبَنشِ، عَ عَ شَ حَمَ تْورْشِ كَنتَ.»