عَننَبِ عٍسَيِ.
19.
حَشَنكَتّ نَ مِسِرَ بّ. عَلَتَلَ نَ قَقٍ مِسِرَكَيٍ شِلِ مَ نُشُي قَرِ. عٍ شَ كُيٍيٍ نَ سّرّنقٍ عَ يَ رَ، فَاشُي بَرَ لُ عٍ بْحّ مَ. 
ﭑ مِسِرَكَيٍ رَدِنمَ نّ عٍ بٌورٍ رَ، كَنكَن نُ قَ عَ نفَشَكٍرٍنيِ نُن عَ دّ قَن بٌورٍ فٍرٍ تَا نُن مَنفّيَ شَ قٍ رَ. 
لِمَنِيَ بَمَ نّ مِسِرَكَيٍ يِ رَ، ﭑ عٍ شَ نَتّ بِرِن كَنَ نّ عٍ رَ. عٍ مَرَ سِ قٍنمَ نّ عٍ شَ عَلَيٍ رَ، عٍ عٍ بٍنبَ قَشَشِيٍ مَشَندِ سٍمَتٌييٍ نُن دُورٍيٍ سَابُي رَ. 
ﭑ مِسِرَكَيٍ سٌمَ نّ مَنفّيٍ يِ رَ نَشٍيٍ شَ قٍ مَشْرْشْ، نَشٍيٍ شَ يَامَرِ قِندِ تْورّ رَ حَمَ بّ. عَلَتَلَ سّنبّمَ شَ مَسٍنيِ نَن يَ. 
بَا نُن شُرٍيٍ يٍ شْرِ مَ نّ. 
يٍ نَشَن لُمَ شُرٍفُلِ، عَ بْرْ مَ نّ، عَ شِرِ حَاشِ قَ تٍ. سَنسِ بِرِن نَشٍيٍ نَ شُرٍ دّ رَ عٍ لِسِمَ نّ. 
هَلِ نَشٍيٍ نَ نِلِ شُرٍ شُنفبٍ دّ رَ، عَ سٌمَ بَا مَ دّننَشّ، عٍ قَن لِسِمَ نّ. شّ نَشٍيٍ نَ شُرٍ دّ رَ، عٍ شَرَ مَ نّ، قٌيٍ قَ عَ بِرِن شَنِن. 
يّشّ سُشُي بِرِن وَ مَ نّ، نَشٍيٍ كْنيِ نُن يّلّ وٌلِمَ شُرٍ مَ. 
نَشٍيٍ فّسّ رَوَلِمَ، عٍ قَن لُمَ نّ تْورّ كُي، لِمَنِيَ بَ عٍ يِ رَ. 
نَشٍيٍ دُفِيٍ رَوَلِمَ، عٍ شُن نَكَنَمَ نّ، عٍ بْحّ رَحَاشُ عٍ مَ. 
سٌوَن مَنفّيٍ مُ سٍسٍ قَهَامُمَ، قِرَوُنَ شَ مَرَ سِيٍ مُ شَشِلِ قَنيِ يٌ سْتْشِ يِ قٍ كُي. مِشِ عَ قَلَمَ دِ قِرَوُنَ بّ، «مُشُ تَن قِندِشِ لْننِلَيٍ نَن نَ، مَنفّ قٌرِيٍ شَ دِيٍ نَن مُشُ رَ؟» 
وٌ شَ لْننِلَيٍ نَ مِندٍن؟ عٍ شَ وٌ رَكٌلٌن مَنفّ عَلَتَلَ قَمَ نَشَن نَبَدٍ مِسِرَ رَ. 
سٌوَن مَنفّيٍ قِندِشِ شَشِلِتَرٍ نَن نَ، نٌقَ مَنفّيٍ مُ فّشِ قَهَامُي سْتْدٍ. مِسِرَ بْنسْي يَرٍرَتِيٍ نَ مِسِرَكَيٍ رَلْيقٍ نّ. 
مَرِفِ بَرَ عٍ شَشِلِ يَ عِسٌ، عَلَكٌ عٍ شَ مِسِرَكَيٍ رَلْي عٍ شَ قٍ بِرِن كُي، عٍ قَ لُ عَلْ سِيسِلَ نَشَن بِرَ مَ عَ شَ بْشُنيِ مَ. 
مِسِرَكَيٍ مُ نْمَ سٍسٍ رَ عٍ شَ مَنفّيٍ نُن عٍ شَ كُنتِفِيٍ سَابُي رَ. 
نَ لْشْي مِسِرَكَيٍ نَ مَنفّ عَلَتَلَ شَ سّنبّ تٌ، عٍ سّرّنمَ نّ فَاشُي كُي عَلْ فِنّيٍ. 
يُدَيَ شِلِ نَن قَمَ مِسِرَكَيٍ مَفَاشُدٍ عَ حَاشِ رَ، قٍ مَ عَلَتَلَ سّنبّمَ نَشَن نَتّشِ عٍ شِلِ مَ. 
نَ لْشْي تَا سُولِ نَن لُمَ مِسِرَ بْشِ مَ، نَشٍيٍ كَنَان شُي قَلَمَ، عٍ مَن لُ عَلَتَلَ سّنبّمَ يِ رَ. نَ تَا ندٍ قَمَ نّ شِلِدٍ هٍرٍ سِ. 
نَ لْشْي سّرّشّبَدٍ كٍرٍن لُمَ نّ عَلَتَلَ بّ مِسِرَ بْشِ تَفِ، تْنشُمَ فّمّ قَن تِمَ نّ عَ بّ مِسِرَ نَانِنيِ رَ. 
نَ قِندِ مَ عَلَتَلَ سّنبّمَ شَ تْنشُمَ نُن سٍيدٍحْشْيَ نَن نَ مِسِرَ بّ. عٍ نَ عٍ شُي رَتٍ عَلَتَلَ مَ، عَ مَرَكِسِمَ شّيمَ نّ عٍ رَتَنفَدٍ عٍ شَ حَشَنكَتَمَيٍ مَ. 
نَ لْشْي عَلَتَلَ عَ يّتّ مَسٍنمَ نّ مِسِرَكَيٍ بّ، عٍ قَ عَ كٌلٌن عَلَ رَ. عٍ قَمَ عَ بَتُدٍ سّرّشّ نُن سَنسِ شْرِ هَدِيَ نَن نَ، عٍ كّرّ تٌنفٌ عَ بّ عٍ نَشَن نَكَمَلِمَ. 
عَلَتَلَ فبَلٌي رَفٌرٌ مَ نّ مِسِرَكَيٍ مَ، كْنْ عٍ نَ عٍ يّتّ رَفبِلٍن عَ مَ، عَلَتَلَ مَن كِنِكِنِمَ نّ عٍ مَ عَ شَ هِننّ رَ. 
نَ لْشْي كِرَ لُمَ نّ مِسِرَ نُن عَسِرِيَ تَفِ. عَسِرِيَكَيٍ سِفَمَ نّ مِسِرَ، مِسِرَكَيٍ قَن سِفَ عَسِرِيَ. عٍ مَلَنمَ نّ يِرٍ كٍرٍن عَلَتَلَ بَتُقٍ رَ. 
نَ لْشْي عِسِرَيِلَ، مِسِرَ، نُن عَسِرِيَ، بَرَكّ لُمَ نّ عٍ سَشَنيِ بِرِن مَ دُنِحَ. 
عَلَتَلَ سّنبّمَ دُبَمَ نّ عٍ بّ، عَ عَ مَسٍن، «بَرَكّ شَ لُ ﭑ مَ حَمَ مِسِرَ مَ، بَرَكّ شَ لُ ﭑ مَ دَالِسٍ عَسِرِيَ بّ، بَرَكّ شَ لُ ﭑ كّ تٌنفٌمَ عِسِرَيِلَ بّ.»