عَننَبِ عٍسَيِ.
26.
نَ لْشْي عٍ يِ بّيتِ نَن بَمَ يُدَيَ بْشِ مَ؛ عَلَ بَرَ تَا سّنبّمَ قِ وٌن مَ، نَشَن شَ تّتّ قِندِ مَ كِسِ رَ وٌن بّ. 
نَادّ شَ رَبِ، حَمَ تِنشِنشِ شَ سٌ، حَمَ نَشَن مُ لَنلَنتٍيَ كَنَ. 
مِشِ نَشَن حَنِفٍ قَن، عَ قِندِ مَ بْحّسَ كَنيِ نَن نَ، بَرِ مَ عَ لَشِ عِ رَ. 
وٌ وٌ يّتّ تَشُ عَلَتَلَ رَ تّمُي بِرِن، بَرِ مَ عَلَتَلَ نَن نَ عَلَ رَ نَشَن نَ عَبَدَن، نَشَن سّنبّ فبٌ عَلْ قَنيٍ. 
عَ بَرَ يّتّ عِفبٌي رَفٌرٌ، عَ عٍ شَ تَا عِتٍشِ عِفٌرٌ، عَ قِندِ شُبٍ رَ، 
مِسِكِينّيٍ نُن سٍتَرٍيٍ نَشَن عِبٌرٌنمَ. 
عِ تَن عَلَتَلَ تِنشِنشِ، عِ تِنشِنتْي شَ قٍ سْونّيَمَ نّ. 
مُشُ حّرّ مَ عِ شَ سّرِيّ نَن مَ، مُشُ شَشِلِ تِشِ عِ رَ. مُشُ عِ شِلِ مَتْشْمَ مُشُ بْحّ بِرِن نَ. 
مُشُ نِي يَتِ هَيِ نَ عِ مَ كْي رَ، عَ عِ قٍنمَ فّيسّفّ. عِ نَ عِ شَ كِيتِ سَ دُنِحَ مَ، نَ نَن دُنِحَ مِشِيٍ مَتِنكَنمَ تِنشِنيِ رَ. 
كْنْ مِشِ حَاشِيٍ تَن، هَلِ عٍ كِنِكِنِ عٍ مَ، عٍ مُ بِرَ مَ تِنشِنيِ قْشْ رَ. هَلِ حَمَ بِرِن بِرَ مَ تِنشِنيِ قْشْ رَ، عٍ تَن تٌندِ مَ نّ فبِلٍندٍ قٍ حَاشِ قْشْ رَ، عٍ مُ فَاشُمَ عَلَتَلَ شَ مَنفّيَ يَ رَ. 
عَلَتَلَ، عِ سّنبّ فبٌ، كْنْ عٍ مُ نَ تٌمَ. عِ شَنُنتٍيَ نَشَن سَشِ عِ شَ حَمَ مَ، عَ نِيَ عٍ شَ نَ تٌ، نَ شَ قِندِ عٍ بّ يَافِ رَ، عِ شَ تّ قَ عٍ فَن. 
عَلَتَلَ، عِ بَرَ بْحّسَ قِ مُشُ مَ، بَرِ مَ عِ تَن نَن مُشُ شَ وَلِ بِرِن نَكَمَلِمَ مُشُ بّ. 
مُشُ مَرِفِ عَلَتَلَ، مَرِفِ فبّتّيٍ بَرَ نْي دْشْ مُشُ مَ بَقٍ رَ عِ تَن نَ، كْنْ مُشُ عِ تَن نَن كٍرٍن بَتُمَ. 
نَ مَرِفِيٍ بَرَ قَشَ، عٍ مُ بَلٌمَ سْنْن، عٍ نِي مُ كٍلِمَ عَبَدَن. عِ بَرَ كٍلِ عٍ شِلِ مَ، عِ عٍ سْنتْ. عِ بَرَ عٍ شَ قٍ بِرِن نَلْي. 
عَلَتَلَ، عِ بَرَ عِ شَ حَمَنّ رَفبٌ يّ، عِ بَرَ عٍ شَ بْشِ نَانِنيِيٍ مَسَرَ، بْشِ شَ فبٌ. عِ بَرَ مَتْشْي سْتْ نَ قٍ كُي. 
عَلَتَلَ، عٍ نُ نَ عِ قٍنقٍ عِ شَ حَشَنكَتّ كُي، عٍ قَ عِ مَشَندِ. 
عٍ نُ عٍ شُي عِتٍمَ عِ مَ عَلْ فِنّ نَشَن نَ دِ بَرِقٍ تْورّ كُي. 
مُشُ بَرَ تْورْ نَ دِ بَرِقٍ كُي، كْنْ نَ قٍ قِندِشِ قُقَقُ نَن نَ. مُشُ مُ وَلِ يٌ رَبَشِ نَشَن قِندِشِ كِسِ رَ دُنِحَ بّ، عٍ مُ كِسِ سْتْ مُشُ سَابُي رَ. 
كْنْ عِ تَن نَن قَشَ مِشِيٍ رَكٍلِمَ قَشّ مَ. «وٌ تَن نَشٍيٍ سَشِ بّندّ بُن مَ، وٌ شَ كٍلِ، وٌ شَ سّيوَ. وٌ لُشِ نّ عَلْ شِنِ سٌفٍ نَشَن رَلْيمَ. وٌ قَن نَلْيمَ نَ كِ نّ.» 
ﭑ مَ حَمَ، وٌ شَ فبِلٍن وٌ شْنيِ، وٌ شَ نَادّ بَلَن سَابِ رَ. وٌ شَ وٌ نْشُن دٌندٌرٌنتِ هَن يِ شْنّ شَ دَنفِ سِندٍن. 
عَلَتَلَ قَمَ نّ كٍلِقٍ عَ شْنيِ، عَ قَ دُنِحَ مِشِيٍ رَتْن عٍ شَ يُنُبِيٍ شَ قٍ رَ. بْشِ وُلِ دّنتّفّمَ نّ عَ نَشَن مِنشِ، عَ مُ مِشِ قَشَشِيٍ رَفَتَمَ سْنْن.