عَننَبِ عٍسَيِ.
33.
حَشَنكَتّ نَ عِ بّ، عِ تَن نَشَن فبَلٌي رَبَمَ. حَشَنكَتّ نَ عِ بّ، عِ تَن نَشَن يَنقّ تِمَ. عِ نَ فّ نَ رَبَدٍ، عِ شُن قَ رَكَنَ، يَنقّ فبِلٍن عِ مَ. 
عَلَتَلَ هِننّ مُشُ رَ، مُشُ شَشِلِ تِشِ عِ تَن نَن نَ. عِ شَ مُشُ سّنبّ شُن مَسَ، عِ شَ مُشُ رَتَنفَ قٍ شْرْشْي مَ. 
سِيٍ عٍ فِمَ نّ عِ شُي يَ رَ، حَمَنّيٍ يٍنسٍنمَ نّ عِ شَ فٍرٍ شُي رَ. 
وٌ تَن سِيٍ، مِشِيٍ قَمَ نّ وٌ شَ نَاقُلِ سُشُدٍ، عَلْ كَتٌي دِنمَ شّ رَ كِ نَشّ. 
وٌ تَن سِيٌنِكَيٍ، عَلَتَلَ فبٌ، عَ سَبَتِشِ كٌورٍ نَن مَ. عَ تِنشِنيِ نُن نْندِ قِمَ نّ وٌ مَ. 
عَ وٌ بُن تِ. عَ كِسِ، شَشِلِ قَنيِ، نُن قَهَامُي رَفَتَمَ نّ وٌ بّ، وٌ تَن نَشٍيٍ فَاشُمَ عَ يَ رَ. 
وٌ عَ مَتٌ، حَلَمَيٍ نُن شّيرَيٍ نَ وَقٍ تَندٍ. 
مِشِ يٌ مُ تٌمَ كِرَيٍ مَ سْنْن. سَاتّ بَرَ كَنَ، سَاتّ سٍيدٍيٍ بَرَ يَافِ، بِنيّ يٌ مُ نَ سْنْن. 
بْشِ نَ سُننُنيِ نُن هَلَكِ نَن كُي. لِبَن شَ مّرّ بَرَ مَشَرَ، بَسَن نُن كَرٍ مٍلٍ قْتْنيِ بُرّشّيٍ نَ يٌلٌنقٍ. 
عَلَتَلَ نَشّ، «يَكْسِ ﭑ كٍلِمَ نّ قَ، وٌ قَ ﭑ مَتْشْ. 
وٌ تٌ نَتّ قُقَقُ تٌنفٌ، وٌ مَن قٍ قُقَقُ نَن سْتْمَ. وٌ حّنفِ لُشِ نّ عَلْ تّ نَشَن قَمَ وٌ فَندٍ. 
تّ دِنمَ نّ سِيٍ رَ، عٍ فَن عَلْ تُنبٍ مَسّفّشِ، سٍسٍ مُ لُ.» 
وٌ تَن نَشٍيٍ مَكُيَ ﭑ نَ، وٌ شَ وٌ تُلِ مَتِ ﭑ مَ قٍ رَبَشِيٍ رَ. وٌ تَن نَشٍيٍ مَكْرّ ﭑ نَ، وٌ شَ لَ ﭑ سّنبّ رَ. 
يُنُبِتْي نَشٍيٍ نَ سِيٌنِ، عٍ بَرَ فَاشُ. عَلَتَلَ يَشُييٍ بَرَ سّرّن قْلْ. «ندٍ نْمَ لُدٍ تّ كَسَرَتِ سّيتِ مَ؟ ندٍ رَتَنفَمَ تّ شُبٍنتَرٍ مَ وٌن يَ مَ؟» 
مِشِ نَن عَ رَ نَشَن حّرّ مَ تِنشِنيِ رَ، نَشَن نْندِ قَلَمَ، نَشَن تٌندِ مَ فٍينِ سْتْ كِ حَاشِ رَ، نَشَن مُ عَ بّلّشّ عِتَلَمَ بُحَ كٌبِ بّ، نَشَن مُ عَ تُلِ مَتِمَ مِشِ قَشَقٍ نَتّ تٌنفٌي رَ، نَشَن مُ عَ شَشِلِ تِمَ قٍ حَاشِ رَ. 
نَ مِشِ مْولِ تَن سَبَتِمَ نّ فٍيَ قَرِ يِرٍ مَكَنتَشِ كُي، عَ بَلٌي نُن يٍ سْتْ عَ قَنيِ رَ. 
وٌ يَيٍ مَنفّ تٌمَ نّ عَ شَ تٌقَنيِ كُي، وٌ مَن قَ بْشِ تٌ نَشَن شَ فبٌي مُ حْنمَ. 
وٌ رَتُمَ نّ وٌ فَاشُ كِ مَ، عَ قَلَقٍ رَ، «نَ مَنفّ نَ مِندٍن؟ دُوتِ مَشِلِ فٌ؟ يِرٍ مَكَنتَشِ شُنمَتٌ فٌ؟» 
وٌ مُ قَمَ نَ بْنسْي يّتّ عِفبٌي تٌدٍ سْنْن، نَشٍيٍ شَ شُي قَهَامُقٍ شْرْشْ. 
سِيٌنِ مَتٌ، وٌن مَ سَلِ رَبَمَ دّننَشّ. مّننِ وٌ دَرِ سَلَمُ تٌمَ نّ، تَا نَشَن نَشَرَشِ، حَمَ نَشَن مُ تَلَمَ عٍ شْنيِ سْنْن. 
وٌن مَرِفِ سّنبّمَ لُمَ نّ نَا وٌن يَ مَ شُرٍيٍ سّيتِ مَ. وٌن يَشُييٍ مُ نْمَ تِدٍ نَ شُرٍيٍ مَ عٍ شَ كُنكُييٍ كُي، 
بَرِ مَ عَلَتَلَ نَن نَ وٌن مَ كِيتِسَ رَ، عَ سّرِيّ يَتِ نَن قِمَ وٌن مَ. عَلَتَلَ نَن نَ وٌن مَ مَنفّ رَ، عَ وٌن نَتَنفَمَ قٍ حَاشِ نَن مَ. 
وٌ تَن سِيٍ، وٌ شَ لُوتِيٍ بَرَ يْنتْن، وٌ شَ كُنكُي وُرِ مُ تِشِ، وٌ شَ بّلَ مُ فّشِ عِتَلَدٍ. نَ كُي وٌ شَ نَاقُلِ قَمَ نّ شَنِندٍ، هَلِ مَبّنيِيٍ نْمَ نَ رَبَدٍ. 
سِيٌنِكَ يٌ مُ عَ قَلَمَ، «ﭑ مُ يَلَنشِ.» عٍ شَ يُنُبِيٍ قَمَ نّ شَقَرِدٍ.