عَننَبِ عٍسَيِ.
37.
مَنفّ شٍسٍكِيَ تٌ نَ قٍ مّ، عَ نَشَ عَ شَ دٌنمَ عِبْو عَ مَ، عَ بّكِ دُفِ رَفٌرٌ عَ مَ سُننُنيِ كُي، عَ قَ سِفَ عَلَتَلَ شَ بَنشِ كُي. 
عَ نَشَ عَ شَ بَنشِ شُنيِ عٍلِيَكِمِ، عَ شَ سّبّلِتِ سٍبٍنَ، نُن سّرّشّدُبّ قٌرِيٍ شّي عَمٌسُ شَ دِ عَننَبِ عٍسَيِ شْن، بّكِ دُفِ رَفٌرٌشِ عٍ مَ. 
عٍ نَشَ عَ قَلَ عَ بّ، شٍسٍكِيَ يِ نَن قَلَشِ، «تٌ قِندِشِ سُننُنيِ، حَشَنكَتّ، نُن بْحّ مَحَاشُ لْشْي نَن نَ. عَ لُشِ عَلْ دِيٍ بَرِ تّمُي بَرَ عَ لِ، كْنْ سّنبّ مُ نَ سْنْن عٍ شَ بَرِ. 
عِ مَرِفِ عَلَتَلَ نَ عَسِرِيَ مَنفّ شَ شّيرَ شَ مَسٍنيِ مّ عَلَ حِحّ رَ سْتْقٍ رَ، تّمُندٍ عَ عَ حَشَنكَتَمَ نّ عَ شَ نَ وْيّنيِيٍ مَ. عِ شَ عَلَ مَشَندِ عَلَكٌ وٌن مَ مِشِ دْنشْييٍ نَشَ قَشَ.» 
مَنفّ شٍسٍكِيَ شَ مِشِيٍ نَشَ سِفَ عَننَبِ عٍسَيِ يِرٍ. 
عٍسَيِ نَشَ عَ مَسٍن عٍ بّ، «وٌ عَ قَلَ وٌ شَ مَنفّ بّ، عَلَتَلَ يِ مَسٍنيِ نَن تِشِ، ‹عِ نَشَ فَاشُ عَسِرِيَ مَنفّ شَ شّيرَيٍ شَ مَرَ سْتْييٍ شَ قٍ رَ، عَ نَشٍيٍ قَلَشِ ﭑ بّ. 
ﭑ قَمَ عَ شَشِلِ مَقِندِدٍ شِبَارُي ندٍ رَ، عَ قَ فبِلٍن عَ شْنيِ. ﭑ عَ قَشَمَ سَنتِدّفّمَ رَ مّننِ نّ.›» 
مَنفّ شَ شّيرَ تٌ فبِلٍن عَسِرِيَ مَنفّ يِرٍ، عَ نَشَ عَ لِ عَ شَ مَنفّ نُ بَرَ كٍلِ لَكِسِ، عَ نُ نَ لِبِنَ فٍرٍقٍ. 
نَ تّمُي عَسِرِيَ مَنفّ نَشَ عَ كٌلٌن عَ كُسِ مَنفّ تِرِهَكَ نَ قَقٍ عَ فٍرٍدٍ. نَ كُي عَ مَن نَشَ شّيرَيٍ شّي شٍسٍكِيَ مَ، عَ قَلَقٍ رَ، 
«وٌ عَ قَلَ يُدَيَ مَنفّ شٍسٍكِيَ بّ، ‹عِ شَ عَلَ، عِ لَشِ نَشَن نَ، نَ نَشَ عِ مَدَشُ دٍ عَ قَلَقٍ رَ، «دَرِ سَلَمُ مُ لُمَ عَسِرِيَ مَنفّ بّلّشّ عِ.» 
عِ عَ كٌلٌن عَ قَنيِ رَ عَسِرِيَ مَنفّيٍ نَشَن نَبَشِ حَمَنّيٍ بِرِن نَ. عٍ عٍ سْنتْ نّ عَ حَاشِ رَ. عِ تَن قَ قَمَ عِ بَدٍ ﭑ يِ رَ دِ؟ 
ﭑ بٍنبَيٍ سِ نَشٍيٍ بْنبْ، عٍ شَ عَلَيٍ عٍ رَتَنفَ نّ، عَلْ فٌسَن، شَرَنِ، رٍ سٍقَ، نُن عٍدٍن بْنسْي نَشٍيٍ نَ تٍلِ عَسَرِ؟ 
شَمَتَ مَنفّ، عَرَثَدِ مَنفّ، سٍقَرَوَيِمِ مَنفّ، هٍنَ مَنفّ، نُن عِوَ مَنفّ نَ مِندٍن؟›» 
شٍسٍكِيَ نَشَ بَتَاشّ رَ سُشُ شّيرَيٍ يِ رَ، عَ نَشَ عَ شَرَن. نَ دَنفِ شَنبِ، عَ نَشَ تٍ عَلَتَلَ شَ بَنشِ، عَ عَ عِتَلَ عَلَتَلَ يَ عِ. 
شٍسٍكِيَ نَشَ عَلَتَلَ مَشَندِ، عَ نَشّ، 
«عِسِرَيِلَ مَرِفِ عَلَتَلَ، نَشَن مَفٌرٌشِ مَلٍكّيٍ تَفِ، عِ تَن نَن نَ دُنِحَ بِرِن مَرِفِ رَ، عِ تَن نَن كٌورٍ نُن بْشِ دَاشِ. 
عَلَتَلَ، عِ عِ تُلِ مَتِ عَ قَنيِ رَ، عِ شَ سٍنَشٍرِبِ شَ مَسٍنيِ رَ مّ، نَشَن عَ شَ مِشِ شّيشِ عَلَ حِحّ رَ سْتْدٍ. 
عَلَتَلَ، نْندِ نَ عَ رَ، عَسِرِيَ مَنفّيٍ بَرَ سِ بِرِن سْنتْ، عَ عٍ شَ قٍ شُن نَكَنَ. 
عٍ نَشَ نٍيٍ شَ عَلَيٍ وٌلِ تّ عِ، عٍ عٍ كَنَ. عَ نْندِ كِ مَ، نَ كُيٍيٍ مُ قِندِشِ عَلَ رَ، بَرِ مَ عِبُنَدَ مَ نَن نٍيٍ يَءِلَنشِ وُرِ نُن فّمّ رَ. 
يَندِ، مُشُ مَرِفِ عَلَتَلَ، عِ شَ مُشُ رَتَنفَ سٍنَشٍرِبِ مَ، عَلَكٌ دُنِحَ بِرِن شَ عَ كٌلٌن، عَ عِ تَن نَن كٍرٍن نَ عَلَ رَ.» 
عَوَ، عَمٌسُ شَ دِ عَننَبِ عٍسَيِ نَشَ شّيرَ شّي مَنفّ شٍسٍكِيَ مَ، عَ نَشّ، «عِسِرَيِلَ مَرِفِ عَلَتَلَ يِ نَن مَسٍنشِ، ‹ﭑ بَرَ عِ شَ مَشَندِ سُشُ عِ نَشَن تِشِ عَسِرِيَ مَنفّ سٍنَشٍرِبِ شَ قٍ رَ. 
عَلَتَلَ شَ مَسٍنيِ نَن يَ عَ شِلِ مَ، سِيٌنِ تَا قَمَ نّ يٌدٍ عِ مَ، دَرِ سَلَمُ تٌقَنيِ قَ عِ مَبٍرٍدٍ. 
عِ ندٍ كٌنبِشِ، عِ ندٍ مَبٍرٍشِ؟ عِ سْنشْشِ ندٍ مَ؟ عِ بَرَ عِ يّتّ عِفبٌ عِسِرَيِلَ سّنِيّنتْي مَ. 
عِ شَ شّيرَيٍ بَرَ مَرِفِ رَ سْتْ. عِ بَرَ عَ قَلَ، «ﭑ تَن بَرَ تٍ هَن لِبَن فٍيَيٍ قَرِ ﭑ مَ فِسٍيٍ كُي. ﭑ سّدِرِ وُرِ عِتٍشِيٍ قْن، ﭑ سِثِرّ وُرِ تٌقَنيِيٍ سّفّ قْتْنيِ دّحّشِ كُي. 
ﭑ تِفِيٍ فٍ حَمَنّيٍ مَ، ﭑ عٍ يٍ مِن. ﭑ نِلِ شُرٍ سّنكِنّيٍ بِرِن شْرِ مَ نّ ﭑ سَنيِيٍ رَ.»›» 
عَلَتَلَ نَشّ، «عِ مُ عَ مّشِ بَ، ﭑ بَرَ يِ قٍيٍ نَتّ نُ عَ رَكُيَ، كَقِ ﭑ عِ دَا تّمُي؟ ﭑ قَ نَ عٍ رَبَقٍ نّ. عِ تَن قِندِشِ تَا سّنبّمَيٍ سْنتْمَ نَن تُن نَ، 
نَ تَا مِشِيٍ سّنبّ مُ نَ عٍ شَ تِ وٌ كَنكٍ. فَاشُي نُن يَافِ نَن تُن عٍ سْتْمَ. عٍ لُمَ نّ عَلْ حٌوفٍ شَرٍ، عَلْ سّشّ نَشَن نَ بَنشِ كْن نَ، عَلْ مّنفِ بِلِ نَشَن شَرَ مَ بٍينُن عَ شَ بٌفِ. 
كْنْ ﭑ عِ دْشْ تّمُي، عِ مِنِ تّمُي سِفَقٍ رَ فٍرٍ سٌدٍ، عِ قَ تّمُي، ﭑ نَ بِرِن كٌلٌن. عِ مَن نَ ﭑ مَتَندِ، ﭑ نَ قَن كٌلٌن. 
عِ تٌ بَرَ ﭑ مَتَندِ نَ كِ، عِ عِ يّتّ عِفبٌ ﭑ مَ، ﭑ نَ ﭑ مَ شُرُندّ فبَكُمَ نّ عِ حْي رَ، ﭑ نَ ﭑ مَ كَرَقٌي سْتِ عِ دّ كُي، ﭑ عِ رَفبِلٍن عِ كٍلِدٍ.» 
عَلَتَلَ نَشّ، «شٍسٍكِيَ، تْنشُمَ نَن يَ عِ بّ؛ تٌوقَرٍ وٌ سَنسِ شْرِ يٌلٌنشِ نَن دٌنمَ. تَمُنَ وٌ سَنسِ بَلِ نَن دٌنمَ. كْنْ تَمُنَ بٌورٍ، وٌ سَنسِيٍ نَن دٌنمَ وٌ نَشٍيٍ سِمَ وٌ عٍ شَبَ، وٌ وّنِ مِن نَشَن كٍلِمَ وّنِ بِلِيٍ مَ، وٌ نَشٍيٍ سِمَ. 
يُدَ بْنسْييٍ نَشٍيٍ كِسِمَ، نٍيٍ لُمَ نّ عَلْ وُرِ بِلِ نَشَن سَنكٍ نَ بْشِ بُن مَ، عَ قَ عَ بٌفِ رَ مِنِ. 
بَرِ مَ مِشِ ندٍيٍ رَتَنفَمَ نّ قَشّ مَ دَرِ سَلَمُ، سِيٌنِ مِشِ ندٍيٍ كِسِمَ نّ. عَلَتَلَ سّنبّمَ عَ مَقُرَ مَ نّ نَ بِرِن نَبَدٍ.» 
نَ كُي، عَلَتَلَ يِ مَسٍنيِ نَن تِشِ عَسِرِيَ مَنفّ شَ قٍ رَ، «عَ مُ سٌمَ يِ تَا كُي، عَ مُ شَلِ يٌ وٌلِمَ بٍ، عَ مُ تِمَ وٌ كَنكٍ عَ شَ وُرٍ لٍقَ رَ، عَ مُ بّندّ مَتٍمَ تُفَنقٍ رَ وٌ شَ تّتّ رَ. 
عَ فبِلٍنمَ عَ قَ كِرَ نَن نَ، عَ مُ سٌمَ يِ تَا كُي! عَلَتَلَ شَ مَسٍنيِ نَن نَ كِ. 
ﭑ يِ تَا مَكَنتَمَ نّ، ﭑ عَ رَكِسِمَ نّ ﭑ شِلِ نُن ﭑ مَ كٌنيِ دَوُدَ شَ قٍ رَ.» 
نَ كْي رَ عَلَتَلَ شَ مَلٍكّ نَشَ مِنِ، عَ سَ عَسِرِيَكَ وُلُ كّمّ تٌنفٌ سٌلٌمَسَشَن نُن سُولِ قَشَ. عَ دْنشْييٍ تٌ كٍلِ فّيسّفّ، عٍ نَشَ نَ قُرٍيٍ تٌ عٍ يَ مَ. 
نَ كُي، عَسِرِيَ مَنفّ سٍنَشٍرِبِ نَشَ فبِلٍن عَ شْنيِ نِنٍوٍ. 
لْشْي ندٍ، عَ تٌ نُ نَ سَلِقٍ عَ شَ عَلَ نِسِرِ شَ بَنشِ كُي، عَدَرَ مٍلٍكِ نُن سَرٍ سٍرِ نَشَ عَ قَشَ سَنتِدّفّمَ رَ، عٍ عٍ فِ عَرَرَتِ بْشِ مَ. عٍسَرِشَدٌنِ نَشَ تِ مَنفّ رَ عَ بَبَ سٍنَشٍرِبِ حْشْي رَ.