عَننَبِ عٍسَيِ.
50.
عَلَتَلَ شَ مَسٍنيِ نَن يَ؛ «ﭑ كّيدِ مُندُن سّبّشِ ﭑ شَ مّي وٌ نفَ رَ؟ ﭑ سَرٍ مُندُن سْتْشِ وٌ مَتِقٍ رَ؟ وٌ مَتِشِ وٌ يّتّ شَ يُنُبِيٍ نَن مَ قٍ رَ. ﭑ مّيشِ وٌ نفَ رَ عَ شَ مَتَندِ نَن مَ. 
مُنقٍ رَ وٌ مُ ﭑ يَابِمَ؟ مُنقٍ رَ وٌ مُ تِمَ ﭑ يَ رَ؟ وٌ عَ مَحْشُنشِ نّ ﭑ بّلّشّ مُ قَتَ وٌ قُلُندٍ؟ وٌ عَ مَحْشُنشِ نّ ﭑ سّنبّ مُ نْمَ وٌ رَكِسِدٍ؟ ﭑ مَ وْيّن كٍرٍن نْمَ بَا شَرَدٍ. ﭑ نْمَ شُرٍ قِندِدٍ فبٍنفبٍرٍنيِ رَ، يّشّيٍ شَ قَشَ، عٍ شَ بْرْ. 
ﭑ قَتَ كٌورٍ رَقْورْدٍ، عَلْ مِشِ نَ كَاحّ دُفِ رَفٌرٌشِ عَ مَ.» 
ﭑ مَرِفِ عَلَتَلَ بَرَ مَسٍنيِ سٌ ﭑ يِ رَ نَشَن نْمَ مِشِ تَفَنشِ مَلِدٍ. عَ ﭑ نَ نَشُنُمَ فّيسّفّ بِرِن، عَ ﭑ تُلِ عِبَمَ، عَلَكٌ ﭑ شَ ﭑ تُلِ مَتِ عَ رَ عَلْ شَرَندِ قَنيِ. 
ﭑ مَرِفِ عَلَتَلَ بَرَ ﭑ تُلِ رَبِ، ﭑ تَن مُ تٌندِ مَ بِرَدٍ عَ قْشْ رَ. 
ﭑ نَن ﭑ قَرِ تِمَ نّ ﭑ يَشُييٍ شَ ﭑ بْنبْ. ﭑ نَ ﭑ شّرّ قَن تِمَ نّ عٍ شَ ﭑ دّ شَبٍ مَتَلَ. ﭑ مُ ﭑ يَ تَفِ نْشُن عٍ شَ كٌنبِيٍ مَ، ﭑ مُ تٌندِ عٍ شَ عٍ دّ يٍ بْشُن ﭑ مَ. 
ﭑ مَرِفِ عَلَتَلَ تٌ ﭑ مَلِ، ﭑ مُ يَافِ، ﭑ مُ ﭑ فِ. ﭑ لُمَ نّ عَلْ قَنيٍ، بَرِ مَ ﭑ عَ كٌلٌن ﭑ مُ لُمَ يَافِ كُي. 
نَشَن ﭑ فبٍ حْشْمَ عَ نَ ﭑ سّيتِ مَ. ندٍ وَ مَ ﭑ سْنشْقٍ؟ وٌن شَ وْيّن. ندٍ وَ مَ ﭑ كَلَمُقٍ؟ كِيتِ شَ سَ. 
ﭑ مَرِفِ عَلَتَلَ نَن ﭑ مَلِقٍ. ندٍ نْمَ عَ رَ؟ عٍ شَ كَلَمُي كَنَمَ نّ عَلْ دُفِ قٌرِ تٍيسٍ نَشَن دٌنمَ. 
ندٍ فَاشُمَ عَلَتَلَ يَ رَ وٌ يَ مَ، عَ عَلَ شَ كٌنيِ شُي سُشُ؟ نَشَن بِرِن نَ حّرّقٍ دِ مِ شْورَ نَءِيَلَنيِ شَنبِ، عَ شَ عَ شَشِلِ تِ عَلَتَلَ شِلِ رَ، عَ لَ عَ رَ. 
ﭑ شَ عَ قَلَ وٌ بّ، وٌ تَن نَشٍيٍ تّ رَدّشّمَ، وٌ قَ تَنبّ رَشَحّنمَ فٍرٍ شِلِ مَ، ﭑ قَمَ نّ وٌ تْورْدٍ عَ شْرْشْي رَ.