عَننَبِ عٍسَيِ.
52.
سِيٌنِكَيٍ، وٌ شَ كٍلِ سّنبّ رَ، وٌ شَ دُفِ تٌقَنيِ رَفٌرٌ وٌ مَ، وٌ تَن تَا سّنِيّنشِ. سُننَتَرٍيٍ نُن سّنِيّنتَرٍيٍ مُ سٌمَ وٌ شْنيِ سْنْن. 
دَرِ سَلَمُكَيٍ، وٌ شَ كٍلِ، وٌ شُبٍ بَ وٌ مَ، وٌ دْشْ كِبَنيِ كُي. يْلْنشْنيِ شَ بَ وٌ كْنيِ مَ. 
عَلَتَلَ شَ مَسٍنيِ نَن يَ، «عٍ وٌ مَتِشِ نّ قُقَقُ، وٌ شُن مُ سَرَ مَ كْبِرِ رَ.» 
عَلَتَلَ سّنبّمَ شَ مَسٍنيِ نَن يَ، «سِنفٍ ﭑ مَ حَمَ نُ نَ مِسِرَ بْشِ نَن مَ كٌنيِيَ كُي. نَ دَنفِ شَنبِ، عَسِرِيَكَيٍ نَشَ عٍ حَشَنكَتَ، عٍ عٍ شَنِن. 
يَكْسِ نَ قِندِشِ مُنسٍ رَ ﭑ بّ؟ عٍ بَرَ ﭑ مَ حَمَ شَنِن قُقَقُ، عٍ قَ يٌ عٍ مَ عٍ شَ يَامَرِ كُي.» عَلَتَلَ شَ مَسٍنيِ نَن يَ، «تّمُي بِرِن ﭑ شِلِ نَ كَنَقٍ. 
نَ كُي ﭑ بَرَ نَتّ تٌنفٌ عَ ﭑ مَ حَمَ قَمَ نّ ﭑ شِلِ كٌلٌندٍ، عٍ قَ عَ كٌلٌن عَ ﭑ تَن نَن يِ مَسٍنيِ تِشِ، عَ ﭑ تَن نَن نَ عٍ سّيتِ مَ.» 
شّيرَ تٌقٍ قَ رَ فٍيَ قَرِ، قٍ قَنيِ نَ عَ رَ. عَ قَمَ نّ شِبَارُ قَنيِ رَ نَشَن بْحّسَ قِمَ مِشِ مَ، نَشَن قِندِ مَ كِسِ رَ، نَشَن عَ مَسٍنمَ سِيٌنِ بّ، «وٌ مَرِفِ عَلَ نَن مَنفّ رَ!» 
وٌ وٌ تُلِ مَتِ وٌ كَنتَمَيٍ رَ، عٍ بَرَ عٍ شُي عِتٍ سّيوّ رَ. عَلَتَلَ نَ فبِلٍن سِيٌنِ، عٍ قَمَ نّ عَ تٌدٍ عٍ يَيٍ رَ. 
دَرِ سَلَمُكَيٍ، وٌ بِرِن شَ وٌ شُي عِتٍ سّيوّ رَ، بَرِ مَ عَلَتَلَ نَ عَ شَ حَمَ مَيٌتٌقٍ، عَ نَ دَرِ سَلَمُ شُن سَرَقٍ. 
عَلَتَلَ نَ عَ سّنبّ سّنِيّنشِ مَسٍنقٍ حَمَنّ مَ. دُنِحَ بِرِن قَمَ نّ عَلَتَلَ شَ كِسِ تٌدٍ. 
وٌ سِفَ، وٌ سِفَ. وٌ نَشَ وٌ مَسٌ سٍ سّنِيّنتَرٍ يٌ رَ. وٌ شَ مِنِ نَ كُي سّنِيّنيِ كُي، وٌ تَن نَشٍيٍ هْرْ مْلِنفِرَ سٍيٍ شَنِنمَ عَلَتَلَ بّ. 
كْنتْقِلِ نَشَ عَ نِيَ وٌ شَ فبَتَ، فَاشُي نَشَ عَ نِيَ وٌ شَ وٌ فِ، بَرِ مَ عَلَتَلَ نَن تِشِ وٌ يَ رَ، عِسِرَيِلَ مَرِفِ عَلَ نَن تِشِ وٌ شَنبِ رَ. 
«ﭑ مَ كٌنيِ شَ قٍ سْونّيَمَ نّ، عَ شَ قٍ تٍ، عَ شُن نَكٍلِ، عَ تِدٍ شُنفبٍ سْتْ. 
عَ شَ قٍ مَفٌرٍ قِندِ مَ تّرّننَ نَن نَ مِشِ فبٍفبٍ بّ، عَ لَهَلّ مَقِندِ، عَ مُ لُ عَدَ مَ كِ مَ سْنْن، 
عَ مَن مَنفّيٍ دّ عِشَرَ مَ نّ مَرَ سّنِيّنيِ رَ، عَ نَشَن قِمَ بْنسْي فبٍفبٍ مَ. عٍ قِندِ مَ نّ سٍيدٍيٍ رَ قٍ ندٍ مَ، عٍ مُ نَشَن سِنفٍ تٌشِ، عٍ قَهَامُي سْتْمَ نّ قٍ ندٍ شَ قٍ رَ، عٍ مُ نَشَن سِنفٍ مّشِ.»