عَننَبِ عٍسَيِ.
63.
ندٍ نَ قَقٍ كٍلِقٍ عٍدٌن بْشِ مَ، دُفِ فبٍيلِ رَفٌرٌشِ نَشَن مَ، دُفِ نَشَن يَءِلَنشِ بٌسَرَ تَا كُي؟ عَ سّنبّ فبٌ، عَ تٌقَن. عَ قَ عَ قَلَ، «ﭑ شَ عَ قَلَ وٌ بّ نْندِ كِ مَ، ﭑ قَشِ وٌ رَكِسِدٍ نّ!» 
«مُنقٍ رَ عِ شَ دُفِ فبٍيلِشِ عَلْ مِشِ نَشَن وّنِ بٌفِ بُندُ مَ؟» 
«ﭑ تَن كٍرٍن بَرَ وَلِ عَلْ مِشِ نَشَن وّنِ بُندُ مَ. سِ يٌ مُ ﭑ مَلِشِ نَ وَلِ كُي. ﭑ بَرَ عٍ بٌرٌن ﭑ مَ شْنّ كُي، عٍ وُلِ قَ كَسَن ﭑ مَ دُفِ مَ هَن عَ فبٍيلِ سٌي. 
ﭑ بْحّ نُ وَ مَ فبٍ حْشْي نَن شْن. شُنسَرٍ تّمُي بَرَ عَ لِ. 
ﭑ مُ مِشِ تٌ نَشَن ﭑ مَلِمَ، نَ كُي ﭑ بَرَ كِسِ وَلِ سُشُ ﭑ يّتّ رَ، ﭑ مَ شْنّ قَ ﭑ تُتُن يَرٍ. 
ﭑ بَرَ سِيٍ بٌرٌن ﭑ مَ شْنّ كُي، عٍ قَ لُ عَلْ سِيسِلَيٍ، عٍ وُلِ لُ بْشِ مَ.» 
ﭑ عَلَتَلَ شَ هِننّ قٍ قَلَمَ نّ وٌ بّ. وٌن شَ عَ تَنتُ عَ شَ قٍ رَبَشِيٍ شَ قٍ رَ، عَ نَشَن نَبَشِ وٌن بّ. عَ بَرَ قٍ قَنيِ وُيَشِ رَبَ عِسِرَيِلَ بْنسْي بّ، عَ شَ هِننّ نُن كِنِكِنِ سَابُي رَ. 
عَ عَ قَلَ نّ، «ﭑ لَشِ عَ رَ ﭑ مَ حَمَ نَن يِ كِ، مَءِقُيَ مُ نَ نَشٍيٍ يَ مَ!» نَ كُي عَ نَشَ قِندِ عٍ رَكِسِمَ رَ. 
عٍ شَ تْورّ شَ قٍ نُ عَ تْورْ مَ، كْنْ عَ قَقٍ بَرَ قِندِ عٍ شُنسَرٍ رَ. عَ بَرَ عٍ تٌنفٌ، عَ عٍ شَنِن عَ شَ شَنُنتٍيَ نُن كِنِكِنِ كُي كَبِ تّمُي شْن كُيٍ. 
كْنْ عٍ نَشَ مُرُتَ عَ مَ، عٍ قَ عَ شَشِلِ سّنِيّنشِ تْورْ. نَ كُي عَ نَشَ عٍ بّحِن، عَ قِندِ عٍ يَشُي رَ عٍ فٍرٍقَ. 
حَمَ بَرَ عَ مَحْشُن قٍ سِنفٍيٍ مَ، نَشَن نَبَشِ عَننَبِ مُنسَ شَ وَشَتِ. عٍ بَرَ عٍ يّتّ مَشْرِن، «عَلَ نَشَن عِسِرَيِلَكَيٍ رَفِرِ شُلُنيُمِ بَا مَ، نَ نَ مِندٍن؟ عَلَ نَشَن عَ شَ حَمَ تٌنفٌ عَلْ شُرُ سٍ دّ مَدٌنيِ، نَ نَ مِندٍن؟ عَلَ نَشَن عَ شَشِلِ سّنِيّنشِ رَفٌرٌ عَ شَ حَمَ مَ، نَ نَ مِندٍن؟ 
عَلَ نَشَن مُنسَ مَلِ عَ سّنبّ كَرَلَنكٍ رَ، نَشَن بَا عِبْو عٍ يَ رَ عٍ رَفِرِقٍ رَ، عَلَكٌ عَ شِلِ شَ بِنيَ عَبَدَن، 
نَ نَ مِندٍن؟» نَ كُي عٍ مُ بِرَ. عٍ سّنبّ نُ فبٌ عَلْ سٌي نَشَن عَ فِمَ. 
عَلَتَلَ شَشِلِ نُ مَلَبُي قِمَ عٍ مَ، عٍ قَ لُ عَلْ نِنفٍ نَشَن حٌوفٍ دٌنمَ قِيلِ مَ. عِ بَرَ عِ شَ حَمَ رَحّرّ نَ كِ. عِ بَرَ شِلِ قَنيِ سْتْ نَ مَ. 
عِ شَ عِ يَ رَفٌرٌ كٍلِ كٌورٍ مَ، كٍلِقٍ عِ شَ كِبَنيِ سّنِيّنشِ كُي، نَشَن عِتٍشِ، نَشَن لُمَ نْرّ كُي، عِ قَ عَ مَتٌ عِ شَ شَنُنتٍيَ نُن سّنبّ نَ عٍ يّتّ مَسٍنقٍ دِ؟ عِ شَ هِننّ نُن كِنِكِنِ مَكُيَ مُشُ رَ. 
كْنْ هَلِ عِبُرَهِمَ نُن عِسِرَيِلَ نّيمُ مُشُ مَ، عِ تَن نَن نَ مُشُ بَبَ رَ. عَلَتَلَ نَن مُشُ بَبَ رَ، مُشُ شُنسَرَ مَ كَبِ تّمُي شْنكُيٍ. 
مُنقٍ رَ عِ عَ نِيَمَ، مُشُ شَ عِ شَ كِرَ رَبّحِن؟ مُنقٍ رَ عِ مُشُ بْحّ شْرْشْمَ هَن مُشُ شَ سُسَ عِ رَ؟ مُشُ مَرِفِ، عِ شَ مُشُ رَفبِلٍن عِ شَ يَرَفَاشُي كُي. 
عِ شَ هْرْ مْبَنشِ نُ نَ مُشُ بّلّشّ، كْنْ يَكْسِ مُشُ يَشُييٍ بَرَ مّننِ بٌرٌن. 
عِ فبٍ نَن مُشُ رَ كَبِ تّمُي شْنكُيٍ، كْنْ عٍ تَن مُ تِنشِ عِ شَ يَامَرِ رَ، عٍ مُ عِ شِلِ قَلَمَ. شَ عِ سَ كٌورٍ رَبِ نّ نُ فٌرٌقٍ رَ دُنِحَ، فٍيَيٍ سّرّنمَ نّ عِ يَ رَ نُ.