عَننَبِ عٍسَيِ.
64.
دُنِحَ رَكٌلٌن عِ شِلِ سّنبّمَ رَ، عَلَكٌ سِيٍ شَ سّرّن فَاشُي كُي عِ يَ رَ. عَ شَ لُ عَلْ يٍفٍ نَشَن دّشّمَ، عَ قَ يٍ سَتُن عَ شْرْشْي رَ. 
عِ بَرَ كَابَنَكٌي رَبَ نَشٍيٍ بَرَ مُشُ تّرّننَ، عِ بَرَ فٌرٌ، فٍيَيٍ قَ سّرّن عِ يَ رَ. 
يِ قٍ مْولِ مُ كٌلٌنشِ سِندٍن. عِ كٍرٍن نَن بَرَ نَ قٍ مْولِ كٌلٌن، عِ تَن نَشَن مِشِ مَلِمَ نَشٍيٍ لَشِ عِ رَ. 
عِ قَ نّ مِشِ مَلِدٍ نَشٍيٍ تِنمَ تِنشِنيِ رَ، نَشٍيٍ وَ مَ بِرَقٍ عِ شَ كِرَ قْشْ رَ. كْنْ مُشُ تَن بَرَ يُنُبِ رَبَ، عِ قَ شْنْ مُشُ مَ. مُشُ نْمَ كِسِدٍ سْنْن؟ 
مُشُ بِرِن بَرَ قِندِ مِشِ سّنِيّنتَرٍ رَ. مُشُ نَشَن نَبَمَ عِ بّ عَ نْشْشِ عَلْ دُنكٌبِ. مُشُ شَ قٍ لُشِ نّ عَلْ بُرّشّ لِسِشِ. مُشُ شَ يُنُبِيٍ نَ مُشُ شَنِنقٍ عَلْ قٌيٍ بُرّشّ شَنِنمَ كِ نَشّ. 
كْنْ مِشِ يٌ مُ نَ مُشُ يَ مَ نَشَن عِ شِلِمَ، عٍ مُ عِ شَ قٍ سُشُمَ، بَرِ مَ عِ بَرَ عِ يّتّ مَكُيَ مُشُ رَ، عِ بَرَ مُشُ تْورْ مُشُ شَ يُنُبِ شَ قٍ رَ. 
كْنْ يَكْسِ، مُشُ مَرِفِ، مُشُ بَبَ، مُشُ بَرَ لُ عَلْ بّندّ دٌلٌشِ عِ يِ رَ، عِ نَشَن نَوَلِمَ عَ شَ قِندِ قّحّ تٌقَنيِ رَ. مُشُ تَن نَن عِ بّلّشّ وَلِ قْشِ مَسٍنمَ. 
عِ نَشَ شْنْ مُشُ مَ مَرِفِ. عِ نَشَ رَتُ مُشُ شَ يُنُبِيٍ مَ. عِ يَ تِ مُشُ رَ، عِ شَ حَمَ. 
عِ شَ تَا سّنِيّنشِيٍ بَرَ قِندِ فبٍنفبٍرٍن يِرٍ رَ، سِيٌنِ بَرَ قِندِ يِرٍ مَشَرَشِ رَ، دَرِ سَلَمُ بَرَ كَنَ، 
عِ شَ هْرْ مْبَنشِ مُشُ نُ سّيوَشِ نَشَن نَ، نَ بَرَ فَن. مُشُ هَرِفٍ قَنيِ بِرِن بَرَ كَنَ. 
نَ بِرِن كُي، عِ تٌندِشِ مُشُ مَلِدٍ؟ عِ عِ سَبَرِ مَ هَن مُن تّمُي؟ عِ مُشُ حَشَنكَتَمَ نَن تُي؟