عَننَبِ يٍرٍ مِ.
16.
عَلَتَلَ بَرَ يِ مَسٍنيِ تِ ﭑ بّ، 
«عِ نَشَ فِنّ دْشْ، عِ نَشَ دِيٍ سْتْ، 
بَرِ مَ عَلَتَلَ بَرَ عَ مَسٍن دِيٍ شَ قٍ رَ نَشٍيٍ قَمَ بَرِدٍ يِ بْشِ مَ، عَ نُن عٍ نفَ نَشٍيٍ عٍ بَرِشِ، عَ نُن عٍ بَبَ نَشٍيٍ عٍ سْتْشِ، 
عٍ قَمَ نّ قَشَدٍ قُرٍ مَ، كْنْ حْنقٍ مُ رَبَمَ عٍ بّ، عٍ مُ رَفَتَمَ بْشِ مَ. عٍ قِندِ مَ حَحّ نَن نَ بّندّ قُحِ قَرِ. عٍ نَ قَشَ سَنتِدّفّمَ نُن كَامّ رَ، شْنِيٍ نُن وُلَءِ سُبٍيٍ قَ عٍ بِنبِيٍ دٌندٍ.» 
عَلَتَلَ بَرَ عَ مَسٍن ﭑ بّ، «عِ نَشَ سٌ بَنشِ كُي مِشِ نَ سُننُنيِ كُي دّننَشّ، عِ نَشَ سِفَ حْن يِرٍ، عِ نَشَ مِشِ كُنقَ بَ، بَرِ مَ ﭑ بَرَ بْحّسَ بَ ﭑ مَ حَمَ يِ رَ، ﭑ بَرَ تٌندِ هِننّ نُن كِنِكِنِ مَ عٍ بّ.» عَلَتَلَ شَ مَسٍنيِ نَن نَ كِ. 
«مِشِ شُنفبٍيٍ نُن مِشِ لَنمَيٍ قَشَمَ نّ يِ بْشِ مَ. عٍ مُ رَفَتَمَ، عٍ حْنقٍ مُ رَبَمَ. عٍ شَ مِشِيٍ مُ عٍ يّتّ مَشَبَمَ سُننُنيِ كُي، عٍ مُ عٍ شُنيِ بِمَ قَشَ مِشِيٍ بّ. 
عٍ مُ تَامِ دْشْمَ سُننُن مِشِيٍ بّ عَلَكٌ عٍ شَ مَدُندُ. عٍ مُ مِنسٍ دْشْمَ سُننُن مِشِيٍ بّ، نَشٍيٍ بَبَ شَ نَ مُ عَ رَ عٍ نفَ بَرَ قَشَ. 
عِ نَشَ حْن قٍ بَندٍ دٌن، عِ نَشَ لُ سُننُن مِشِيٍ قّ مَ عٍ مَدُندُقٍ رَ، 
بَرِ مَ عِسِرَيِلَ مَنفّ عَلَتَلَ بَرَ عَ مَسٍن، ‹ﭑ بَرَ قَ يِ وَشَتِ وٌ تَفِ عَلَكٌ حّلّشِنيِ سِفِيٍ شَ دَن، شُلُنيِيٍ شَ حْن قُتِ شِرِ مَيٍ تَفِ.›» 
«ﭑ نَ فّ يِ مَسٍنيِ تِدٍ حَمَ بّ، عٍ قَمَ نّ ﭑ مَشْرِندٍ، ‹مُنقٍ رَ عَلَتَلَ بَرَ عَ مَسٍن عَ شَ مُشُ حَشَنكَتَ؟ مُنسٍ قِندِشِ مُشُ شَ يُنُبِ رَ؟ مُشُ قٍ حَاشِ مُندُن نَبَشِ مُشُ مَرِفِ عَلَتَلَ رَ؟›» 
«عِ شَ عٍ يَابِ، ‹عَلَتَلَ شَ مَسٍنيِ نَن يَ؛ وٌ بَبَيٍ بَرَ ﭑ نَبٌلٌ، عٍ بَرَ بِرَ عَلَ فبّتّيٍ قْشْ رَ، عٍ بَرَ عٍ بَتُ، عٍ بَرَ تُوبِ عٍ بّ. عٍ بَرَ ﭑ تَن نَبّحِن، عٍ مُ ﭑ مَ سّرِيّ سُشُ. 
وٌ تَن بَرَ قٍ حَاشِ رَبَ دَنفِقٍ وٌ بَبَيٍ رَ. وٌ بَرَ بِرَ وٌ سٌندٌنيِ حَاشِ وَشْنقٍ قْشْ رَ، وٌ مُ وٌ تُلِ مَتِ ﭑ نَ. 
ﭑ شَ وٌ كٍرِ يِ بْشِ مَ، وٌ شَ سِفَ يِرٍ ندٍ وٌ نُن وٌ بَبَيٍ مُ دّننَشّ كٌلٌن. مّننِ وٌ نْمَ نّ عَلَ فبّتّيٍ بَتُدٍ كْي نُن يَنيِ رَ، بَرِ مَ ﭑ مُ كِنِكِنِمَ وٌ مَ سْنْن.›» 
عَلَتَلَ شَ مَسٍنيِ نَن يَ؛ «لْشْي قَمَ قَدٍ، مِشِ مُ عَ قَلَمَ سْنْن، ‹عَلَتَلَ حِحّ بَرَ عِسِرَيِلَكَيٍ رَ مِنِ مِسِرَ بْشِ رَ.› 
مِشِيٍ قَمَ نّ عَ قَلَدٍ، ‹عَلَتَلَ حِحّ بَرَ عِسِرَيِلَكَيٍ رَ مِنِ كْولَ بْشِ مَ، عَ نُن بْشِ بِرِن مَ عٍ رَيٍنسٍنشِ دّننَشّ. ﭑ قَمَ نّ عٍ رَفبِلٍندٍ عٍ شَ بْشِ مَ، ﭑ نَشَن قِ عٍ بَبَيٍ مَ.›» 
عَلَتَلَ شَ مَسٍنيِ نَن يَ؛ «ﭑ قَمَ نّ مِشِ سُشُييٍ شّيدٍ عٍ يِرٍ، عٍ شَ عٍ سُشُ. ﭑ قَمَ نّ كٌيِنمَيٍ شّيدٍ عٍ يِرٍ، عٍ شَ عٍ قٍن فٍيَيٍ قَرِ فّمّيٍ لٌنفٌرِ رَ، 
بَرِ مَ ﭑ بَرَ عٍ حّرّ كِ تٌ. عٍ رَبَقٍ مُ نْشُنشِ ﭑ مَ، ﭑ عٍ شَ يُنُبِيٍ بِرِن تٌمَ. 
ﭑ قَمَ نّ عٍ شَ يُنُبِ سَرٍ رَفبِلٍندٍ عٍ مَ دْشْ قِرِن، بَرِ مَ عٍ بَرَ ﭑ مَ بْشِ قِندِ بْشِ سّنِيّنتَرٍ رَ، ﭑ نَشَن قِشِ عٍ مَ كّ رَ. عٍ بَرَ نَ بْشِ رَقٍ قٍ حَاشِ نُن قٍ رَتْنشِ رَ.» 
«عَلَتَلَ قِندِشِ ﭑ سّنبّ نَن نَ، عَ قِندِشِ ﭑ كَنتَمَ نَن نَ، عَ قِندِشِ ﭑ مَ كَنتَرِ نَن نَ ﭑ مَ تْورّ كُي. سِيٍ قَمَ نّ قَدٍ عِ يِرٍ كٍلِقٍ دُنِحَ تُشُي بِرِن. عٍ قَمَ نّ عَ قَلَدٍ، ‹مُشُ بَبَيٍ بِرَشِ وُلٍ نَن قْشْ رَ، وُلٍ نَشَن مُ قِندِشِ مُنَقَنيِ رَ عٍ بّ.› 
عَدَ مَدِ نْمَ عَلَيٍ يَءِلَندٍ؟ عٍ نَشَن يَءِلَنمَ، عَلَ مُ عَ رَ.» 
«نَ نَن عَ رَ، يِ بِيَاسِ ﭑ قَمَ نّ ﭑ سّنبّ مَفَاشُشِ مَسٍندٍ عٍ بّ، عَلَكٌ عٍ شَ عَ كٌلٌن عَلَتَلَ نَن ﭑ نَ.»