عَننَبِ يٍرٍ مِ.
20.
سّرّشّدُبّ ثَسُرَ، عِمٍرِ شَ دِ، نَشَن قِندِشِ هْرْ مْبَنشِ يَرٍرَتِ رَ، عَ تٌ عَننَبِ يٍرٍ مِ شَ كَوَندِ مّ، 
عَ نَشَ عَ سُشُ، عَ عَ بْنبْ، عَ عَ سَ كُتُنيِ رَ هْرْ مْبَنشِ سّيتِ مَ بُنيَمِن سٌدٍ دّ رَ. 
كُيٍ تٌ عِبَ، ثَسُرَ نَشَ عَ رَ مِنِ، كْنْ عَننَبِ يٍرٍ مِ نَشَ عَ يَابِ، «عَلَتَلَ بَرَ عِ شِلِ مَسَرَ. عَ مُ قَلَمَ سْنْن ثَسُرَ، عَ قَلَمَ نّ قَ ‹مَفٌرِ مِسَبِبَ،› ‹حَشَنكَتّ يِرٍ.› 
عَلَتَلَ نَشَ عَ مَسٍن، ‹ﭑ فَاشُي لُمَ نّ عِ تَن نُن عِ بٌورٍيٍ بْحّ مَ. عِ يَشُييٍ عِ بٌورٍيٍ قَشَمَ نّ سَنتِدّفّمَ رَ عِ يَ شْرِ. ﭑ يُدَيَ بْشِ قَن سَمَ نّ بَبِلْن مَنفّ بّلّشّ، عَ عٍ بْنبْ سَنتِدّفّمَ رَ، عَ قَ عٍ شَنِن بَبِلْن. 
هَرِفٍ نُن نَاقُلِ نَشَن بِرِن نَ يِ تَا كُي، عَ نُن نَشَن نَ يُدَيَ مَنفّيٍ يِ رَ، ﭑ نَ بِرِن سٌمَ نّ وٌ يَشُييٍ يِ رَ يِ فٍرٍ كُي، عٍ شَ عَ شَنِن بَبِلْن. 
عِ تَن ثَسُرَ، نُن عِ شَ مِشِيٍ، وٌ قَن سِفَمَ نّ كٌنيِيَ كُي بَبِلْن بْشِ مَ. عِ قَشَمَ مّننِ نّ، عِ رَفَتَ نَا، عِ تَن نُن عِ بٌورٍيٍ عِ نَشٍيٍ كَوَندِشِ وُلٍ رَ.›» 
«عَلَتَلَ، عِ بَرَ ﭑ نَتَنتَن، ﭑ قَن بَرَ ﭑ يّتّ لُ نَ تَنتَنيِ كُي. عِ بَرَ ﭑ سُشُ، عِ بَرَ نْ ﭑ نَ. لْشْي يٌ لْشْي عٍ ﭑ مَبٍرٍ مَ، عٍ بِرِن يٌمَ ﭑ مَ. 
ﭑ مَ مَسٍنيِ بِرِن قِندِ مَ حَشَنكَتّ نُن فبَلٌي نَن نَ. ﭑ نَ عَلَتَلَ شَ مَسٍنيِ تِ، حَمَ بِرِن يٌ ﭑ مَ. 
شَ ﭑ نَ عَ قَلَ، ‹ﭑ مُ عَ شَ قٍ كَوَندِ مَ سْنْن، ﭑ مُ وْيّنمَ عَ شِلِ رَ سْنْن،› عَلَتَلَ شَ مَسٍنيِ لُمَ نّ عَلْ تّ ﭑ بْحّ كُي. ﭑ مُ نْمَ نَ تّ رَشُبٍندٍ، قٌ ﭑ شَ عَلَتَلَ شَ مَسٍنيِ تِ. 
ﭑ بَرَ تْوحّفّ فبٍفبٍ مّ. شَ ﭑ عَ قَلَ، ‹فبَلٌي نَ قَقٍ،› مِشِ ندٍيٍ عَ قَلَ، ‹وٌن شَ عَ مَسٍن مَنفَسَنيِ بّ.› ﭑ بٌورٍيٍ بِرِن نَ ﭑ مَتٌقٍ، عَلَكٌ عٍ شَ ﭑ سُشُ تَنتَنيِ كُي. عٍ عَ قَلَمَ، ‹تّمُندٍ وٌن نْمَ نّ عَ سُشُدٍ فَنتَنيِ رَ، وٌن شَ نْ عَ رَ، وٌن شَ وٌن فبٍحْشْ عَ مَ.› 
كْنْ عَلَتَلَ سّنبّمَ نَ ﭑ سّيتِ مَ. ﭑ يَشُييٍ قَمَ نّ بِرَدٍ، عٍ مُ نْمَ ﭑ نَ. نَ قِندِ مَ نّ يَافِ رَ عٍ بّ، عٍ شَشِلِ عِقُ. 
مَنفّ عَلَتَلَ تِنشِنتْييٍ كٌلٌن، عَ عٍ بْحّ نُن عٍ سٌندٌنيِ مَتٌمَ. ﭑ عَ كٌلٌن عَلَتَلَ قَمَ نّ ﭑ فبٍحْشْدٍ عٍ مَ، ﭑ شَشِلِ تِشِ عَ تَن نَن نَ. 
وٌ عَلَتَلَ مَتْشْ، وٌ بّيتِ بَ عَ بّ، بَرِ مَ عَ سٍتَرٍيٍ رَكِسِمَ نّ عٍ يَشُييٍ بّلّشّ. 
ﭑ بَرِ لْشْي دَنكَشِ. ﭑ نفَ ﭑ بَرِشِ لْشْي نَشّ، لْشْي قَنيِ مُ عَ رَ. 
شّيرَ نَشَن ﭑ بَرِ قٍ قَلَ ﭑ بَبَ بّ، مِشِ دَنكَشِ نَن نُ عَ رَ. ﭑ بَبَ نُ بَرَ سّيوَ نَ شِبَارُ رَ، 
كْنْ نَ شّيرَ شَ لُ عَلْ يِ تَايٍ، عَلَتَلَ نَشٍيٍ هَلَكِشِ كِنِكِنِتَرٍحَ كُي. عَ شَ عٍ فبٍلٍفبٍلٍ شُي مّ فّيسّفّ نُن يَنيِ رَ. 
عَ نُ لَن نّ عَ شَ ﭑ قَشَ ﭑ نفَ تّيفّ، ﭑ شَ رَفَتَ مّننِ عَبَدَن. 
مُنقٍ رَ ﭑ قَ مِنِشِ دُنِحَ مَ، ﭑ شَ يِ تْورّ نُن يِ قٍ شْنّ سْتْ، ﭑ مَ دُنِحّءِفِرِ شَ قِندِ يَافِ رَ ﭑ بّ؟»