عَننَبِ يٍرٍ مِ.
49.
عَلَتَلَ بَرَ عَ مَسٍن عَمٌنِكَيٍ شَ قٍ رَ؛ «دِ مُ نَ عِسِرَيِلَكَيٍ بّ؟ كّ تٌنفٌمَيٍ مُ نَ عٍ بّ؟ مُنقٍ رَ عَمٌنِ مَنفّ فَدِ بْشِ سْتْشِ، عَ شَ مِشِيٍ قَ لُ نَ تَا كُي؟» 
عَلَتَلَ شَ مَسٍنيِ نَن يَ؛ «لْشْي قَمَ عَ لِدٍ، ﭑ قَمَ نّ رَابَ فٍرٍدٍ عَمٌنِ بْشِ مَ. عَ قِندِ مَ فبَلٌي يِرٍ نَن نَ، تَا نَشٍيٍ نَ عَ رَبِلِنيِ عٍ بِرِن فَن. نَ وَشَتِ عِسِرَيِلَ مَن بْشِ مَسْتْمَ نّ نَشَن نُ بَرَ بَ عَ يِ رَ. 
شّسِبْن، وٌ شَ وَ عَيِ بّ نَشَن بَرَ كَنَ. رَابَكَيٍ، وٌ شَ وَ، وٌ شَ سُننُن دٌنمَ رَفٌرٌ وٌ مَ، حْن قٍ بَرَ عَ لِ. وٌ شَ وٌ فِ تّتّ قَرِ، بَرِ مَ وٌ شَ مَنفّ بَرَ شَنِن كٌنيِيَ كُي، عَ نُن سّرّشّدُبّيٍ نُن كُنتِفِيٍ. 
مُنقٍ رَ وٌ شَشِلِ تِشِ وٌ شَ لَاكْي وَلِ رَ؟ مُنقٍ رَ وٌ لَشِ وٌ يّتّ شَ نَاقُلِ رَ، مَتَندِلَيٍ؟ وٌ عَ قَلَمَ، ‹ندٍ نْمَ وٌن نَ؟› كْنْ وٌ سّنبّ قَمَ نّ كَنَدٍ. 
مَنفّ عَلَتَلَ شَ مَسٍنيِ نَن يَ؛ ﭑ قَمَ نّ وٌ مَفَاشُدٍ عَ نُن وٌ رَبِلِنيِ. وٌ بِرِن شَنِنمَ نّ، مِشِ كٍرٍن مُ كِسِمَ. 
نَ دَنفِ شَنبِ، ﭑ مَن عَمٌنِكَيٍ شُن نَكٍلِمَ نّ. عَلَتَلَ شَ مَسٍنيِ نَن نَ كِ.» 
مَسٍنيِ نَن يَ عٍدٌنكَيٍ بّ؛ مَنفّ عَلَتَلَ بَرَ عَ مَسٍن، «لْننِ مُ نَ تٍمَن سْنْن؟ مَرَ سِ بَرَ حْن عَ شَ دِيٍ يَ مَ؟ قَهَامُي بَرَ كَنَ؟ 
وٌ وٌ فِ، وٌ شَ وٌ كٌبٍ رَ سٌ. دٍدَنكَيٍ، وٌ شَ وٌ نْشُن فٍيَيٍ قَرِ، بَرِ مَ ﭑ قَمَ نّ عٍسَيُ شَ فبَلٌي رَ. عَ حَشَنكَتَ وَشَتِ بَرَ عَ لِ. 
نَشٍيٍ قَمَ وٌ شَ بٌفِسٍ بَدٍ، عٍ مُ سٍسٍ لُمَ نَا. نَشٍيٍ قَمَ وٌ مُحَدٍ، عٍ سٍ بِرِن كَنَمَ نّ عَلْ عٍ وَ مَ عَ شْن مَ كِ نَشّ. 
ﭑ قَمَ نّ سٍ بِرِن بَدٍ عٍسَيُ يِ رَ. عَ مُ نْمَ عَ نْشُندٍ، بَرِ مَ ﭑ نَ يِرٍ بِرِن كٌلٌن. عَ بْنسْي، عَ نفَشَكٍرٍنيِيٍ، نُن عَ دْشْبٌورٍيٍ، عٍ بِرِن شُن نَكَنَمَ نّ، عٍ بِرِن لْي. 
وٌ شَ كِرِدِيٍ لُ نَ، ﭑ تَن نَن قَمَ عٍ بَلٌدٍ. وٌ شَ كَاحّ فِنّيٍ شَ عٍ شَشِلِ تِ ﭑ تَن نَن نَ. 
عَلَتَلَ بَرَ عَ مَسٍن؛ هَلِ نَشَن مُ قٍ حَاشِ رَبَشِ، عَ قَمَ نّ تْورْدٍ. وٌ تَن نَشٍيٍ قٍ حَاشِ رَبَشِ، عَ مُ لَنمَ شّ وٌ قَن شَ تْورْ؟ وٌ تْورْ مَ نّ.» 
عَلَتَلَ شَ مَسٍنيِ نَن يَ؛ «ﭑ بَرَ ﭑ كَلِ ﭑ يّتّ رَ، بٌسَرَ كَنَمَ نّ، عَ يَافِ سْتْ. بٌسَرَ نُن عَ رَبِلِنيِ دَنكّ نَن سْتْمَ، نَا قَ قِندِ فبَلٌي يِرٍ رَ.» 
عَلَتَلَ بَرَ شِبَارُ قِ ﭑ مَ، عَ بَرَ شّيرَيٍ شّي سِ بِرِن مَ؛ «وٌ شَ قَ، وٌ شَ وٌ مَلَن، وٌ شَ فٍرٍ تِ.» 
عَ نَشّ عٍدٌنكَيٍ بّ، «ﭑ بَرَ وٌ شُرُن سِيٍ يَ مَ، وٌ بَرَ يَافِ سْتْ عَدَ مَدِيٍ تَفِ. 
وٌ شَ يّتّ عِفبٌحَ، وٌ شَ بْحّتٍ بَرَ وٌ يَنقَ. وٌ تَن نَشٍيٍ سَبَتِشِ فٍيَيٍ قَرِ، وٌ تَن نَشٍيٍ شَ بَنشِيٍ نَ يِرٍ عِتٍشِ عَلْ سّفّ تّي، ﭑ وٌ رَبِرَ مَ نّ. عَلَتَلَ شَ مَسٍنيِ نَن نَ كِ.» 
«عٍدٌن قِندِ مَ نّ فبَلٌي يِرٍ رَ. دَنفِ مِشِيٍ دّ عِشَرَ مَ نّ، عٍ كَابَ نَ حَشَنكَتّ تٌقٍ رَ. 
عَلَتَلَ بَرَ عَ مَسٍن وٌ بّ، وٌ شُن نَكَنَمَ نّ عَلْ سٌدٌ مَ نُن فٌمٌرَ شُن نَكَنَشِ كِ نَشّ. مِشِ يٌ مُ لُمَ نَا سْنْن. 
ﭑ لُمَ نّ عَلْ يّتّ نَشَن كٍلِمَ يُرُدّن شُرٍ قّ مَ، عَ سِفَ سُبٍ قٍندٍ يِرٍ فبّتّ. ﭑ عٍدٌن كٍرِ مَ نّ عَ شْنيِ، ﭑ قَ مَنفّ سُفَندِشِ تِ نَا. ندٍ مَنِيَ ﭑ نَ؟ ندٍ ﭑ نَسِمَ؟ 
نَ كُي وٌ شَ عَ رَ مّ عَ عَلَتَلَ نَتّ نَشَن تٌنفٌشِ عٍدٌن نُن تٍمَنكَيٍ شِلِ مَ. عَ عٍ شَنِنمَ نّ عَلْ شُرُ سٍيٍ، عَ قَ عٍ شْنيِ كَنَ. 
دُنِحَ بِرِن قَمَ نّ عٍ شَ بِرّ كٌلٌندٍ، نَ شِبَارُي رَيٍنسٍن يّ هَن شُلُنيُمِ بَا يِرٍ. 
نَ لْشْي عٍ يَشُييٍ مَنِيَمَ سّفّ نَن نَ نَشَن حّرّ مَ كٌورٍ مَ عٍ مَتٌقٍ رَ، عٍ قَ دُ سُ بٌسَرَ شُن نَ. نَ لْشْي عٍدٌن سّنبّمَيٍ لُمَ نّ عَلْ فِنّ نَشٍيٍ نَ دِ بَرِقٍ.» 
مَسٍنيِ، نَشَن مَسٍنشِ دَ مَسِ بّ، نَ نَن يَ؛ «شَمَتَ نُن عَرَثَدِ بَرَ يَافِ، بَرِ مَ عٍ بَرَ شِبَارُ حَاشِ مّ. عٍ بْحّ بَرَ رَ مَشَ عَلْ مْرْنيِ نَشَن نَ بَا مَ، نَشَن مُ نْمَ عَ رَشَرَدٍ. 
دَ مَسِ سّنبّ بَرَ حْن، عَ وَ مَ عَ فِقٍ فَاشُي كُي. كْنتْقِلِ نُن تْورّ بَرَ عَ سُشُ عَلْ فِنّ نَشَن نَ دِ بَرِقٍ. 
نَ تَا تٌقَنيِ ﭑ نُ حّلّشِنشِ نَشَن نَ، نَ بَرَ قِندِ تَا رَبّحِنشِ رَ؟ 
نَ لْشْي، نَا قٌنِكٍيٍ بِرَ مَ نّ تَا كُي، نَا سْورِيٍ قَن دُندُ. مَنفّ عَلَتَلَ شَ مَسٍنيِ نَن نَ كِ. 
ﭑ تّ سَمَ نّ دَ مَسِ تّتّ مَ، بٍن هَدَدَ شَ يِرٍ مَكَنتَشِ فَن.» 
مَسٍنيِ نَن يَ كٍدَرِ نُن شَسٌرِ شَ مَنفّيَ شَ قٍ رَ، بَبِلْن مَنفّ نٍبُكَدَنسَرِ نَشَن فٍرٍشِ؛ عَلَتَلَ بَرَ عَ مَسٍن، «وٌ كٍلِ، وٌ شَ كٍدَرِ فٍرٍ. وٌ شَ حَمَنّ كَنَ نَشَن نَ قُفٍ رَ. 
وٌ شَ عٍ شَ كِرِ بَنشِيٍ، عٍ شَ شُرُ سٍيٍ، عٍ شَ كٌتٍ بِرِن، نُن عٍ شَ حْشْمّيٍ سُشُ. وٌ شَ عَ قَلَ عٍ بّ، ‹قٍ شْرْشْي نَ وٌ لِقٍ يِرٍ بِرِن.› 
عَلَتَلَ شَ مَسٍنيِ نَن يَ؛ شَسٌرِكَيٍ، وٌ شَ وٌ فِ، وٌ شَ يِلِ فٍ وٌ وٌ نْشُنمَ دّننَشّ، بَرِ مَ بَبِلْن مَنفّ نٍبُكَدَنسَرِ بَرَ نَتّ تٌنفٌ وٌ شَ قٍ رَ، عَ بَرَ عَ حَنِفٍ عَ شَ وٌ فٍرٍ.» 
عَلَتَلَ بَرَ عَ مَسٍن، «وٌ كٍلِ، وٌ شَ سِ ندٍ فٍرٍ نَشَن بْحّ سَشِ. عَ شَ نَادّيٍ مُ بَلَنشِ، عَ يِرٍيٍ مُ مَكَنتَشِ. عَ نَ عَ كٍرٍنيِ نَن مَ. 
وٌ قَمَ نّ عٍ شَ حْشْمّيٍ نُن عٍ شَ شُرُ سٍ وُيَشِيٍ سْتْدٍ. يِ مِشِ نَشٍيٍ عٍ دّ شَبٍ سّيتِ بِمَ، ﭑ عٍ رَلْيمَ نّ قٌيٍ كُي، عٍ شَ تْورْ يِرٍ بِرِن. 
شَسٌرِ قِندِ مَ نّ وُلَءِ بَرٍ يِرٍ رَ، فبَلٌي نَ دّننَشّ. مِشِ يٌ مُ سَبَتِمَ مّننِ سْنْن.» 
عَلَتَلَ نَن يِ مَسٍنيِ تِشِ عَننَبِ يٍرٍ مِ بّ عٍلَمَ شَ قٍ رَ يُدَيَ مَنفّ سٍدٍكِيَ شَ مَنفّيَ قْلّ تّمُي؛ 
مَنفّ عَلَتَلَ بَرَ عَ مَسٍن، «ﭑ عٍلَمَ شَ شَلِ كَنَمَ نّ، نَشَن قِندِشِ عَ سّنبّ رَ. 
ﭑ فٍرٍ تِمَ نّ عَ بّ يِرٍ بِرِن، ﭑ شَ عَ رَلْي قٌيٍ كُي. نَ فٍرٍ دَنفِ شَنبِ، سِ بِرِن قَمَ نّ فِ مِشِ ندٍ سْتْدٍ كٍلِقٍ عٍدٌن. 
ﭑ قَمَ نّ عٍلَمَكَيٍ رَ سّرّندٍ عٍ يَشُييٍ يَ رَ نَشٍيٍ وَ مَ عٍ قَشَقٍ. ﭑ عٍ حَشَنكَتَمَ نّ ﭑ مَ شْنّ كُي، ﭑ مَ سَنتِدّفّمَ قَ عٍ بِرِن سْنتْدٍ. عَلَتَلَ شَ مَسٍنيِ نَن نَ كِ. 
ﭑ مَ كِبَنيِ لُمَ نّ عٍلَمَ، ﭑ عٍ شَ مَنفّ نُن عٍ شَ كُنتِفِيٍ قَشَ. عَلَتَلَ شَ مَسٍنيِ نَن نَ كِ. 
كْنْ وَشَتِ دْنشْي رَ، ﭑ مَن عٍدٌنكَيٍ رَفبِلٍنمَ نّ كٍلِقٍ كٌنيِيَ كُي. عَلَتَلَ شَ مَسٍنيِ نَن نَ كِ.»