عَلَ شَ مَسٍنيِ قِرِن ندٍ عَننَبِ يٍرٍ مِ بّ.
1.
مُنسٍ دَرِ سَلَمُ سْتْشِ؟ سِنفٍ مِشِ نُ وُيَ، كْنْ يَكْسِ عٍ مُ وُيَ. عَ بَرَ لُ عَلْ كَاحّ فِنّ. سِنفٍ عَ شِلِ نُ شُنفبٌ حَمَنّيٍ تَفِ، عَ قِندِ مَنفّ تَا نَن نَ عٍ يَ مَ، كْنْ يَكْسِ عَ نَ كٌنيِيَ كُي. 
كْي بِرِن عَ وَقٍ، عَ يَيٍ نُ عَ شّرّيٍ مَشَ. عَ شَنُنتٍنيِيٍ مُ نَ سْنْن نَشٍيٍ عَ مَدُندُ مَ. عَ بٌورٍيٍ بِرِن بَرَ عَ يَنقَ، عٍ قِندِ عَ يَشُييٍ رَ. 
عٍ بَرَ يُدَ بْنسْي شَنِن كٌنيِيَ كُي، عٍ عَ رَيَافِ. يَكْسِ عَ دْشْشِ سِيٍ تَفِ، مَلَبُي يٌ مُ نَ عَ بّ. عَ يَشُييٍ عَ تْورْ مَ. 
مِشِ يٌ مُ نَ سِيٌن كِرَيٍ شْن مَ سْنْن، سِفَقٍ سَلِدٍ. سِيٌن شَ نَادّيٍ بِرِن بَرَ كَنَ، عَ شَ سّرّشّدُبّيٍ تْورْقٍ، عَ شَ فِنّدِ مّدِيٍ سُننُنقٍ. سِيٌن نَ قٍ شْنّ نَن كُي. 
عَ يَشُييٍ بَرَ نْ عَ رَ، عٍ قَ لُ بْحّسَ كُي. عَلَتَلَ نَ رَفِرِشِ، سِيٌن شَ قٍ حَاشِيٍ نَن مَ قٍ رَ. عَ فٍرٍقَيٍ بَرَ عَ شَ دِيٍ شَنِن كٌنيِيَ كُي. 
سِيٌن سّنبّ بِرِن بَرَ كَنَ. عَ شَ كُنتِفِيٍ بَرَ لُ عَلْ شٍلِ، نَشٍيٍ مُ حٌوفٍ تٌمَ، نَشٍيٍ بَرَ تَفَن كٌيِنمَ يَ رَ. 
دَرِ سَلَمُ شَ يَافِ نُن عَ شَ كُي عِقُي كُي، عَ بَرَ عَ مَحْشُن عَ شَ سٍ قَنيِيٍ بِرِن شَ قٍ، نَشٍيٍ نُ نَ عَ يِ رَ تّمُي دَنفِشِ. عَ شَ حَمَ تٌ سَ عَ فٍرٍقَيٍ بّلّشّ، عَ مَلِمَ يٌ مُ نُ نَ. عَ يَشُييٍ نَشَ يٍلٍ عَ شَ كَسَرّ مَ. 
دَرِ سَلَمُ شَ يُنُبِ بَرَ فبٌ، عَ بَرَ قِندِ سّنِيّنتَرٍ رَ. نَشٍيٍ بِرِن نُ عَ مَتْشْمَ، عٍ نَ يٌقٍ عَ مَ يَكْسِ. عَ بَرَ لُ عَلْ مِشِ مَفٍلِ، عَ يَافِ، عَ قَ عَ يّتّ نْشُن. 
نْشْي نُ نَ عَ شَ دُفِ مَ، كْنْ عَ مُ عَ مَحْشُن عَ شَ قٍ رَحْنيِ مَ. كَسَرّ نَشَن عَ مَسْتْ، عَ مَفَاشُ. مِشِ يٌ مُ نَ، نَشَن عَ مَدُندُ مَ. سِيٌن شَ مَسٍنيِ «عَلَتَلَ، ﭑ مَ مَرَيَافِ مَتٌ، بَرِ مَ ﭑ يَشُييٍ بَرَ شُننَكٍلِ سْتْ.» 
عَ يَشُييٍ بَرَ عَ شَ سٍ قَنيِ بِرِن تٌنفٌ. عَ سِ فبّتّيٍ تٌ نّ سٌ رَ عَ شَ سَلِدٍ كُي، نَشٍيٍ مُ دَشَ عٍ شَ سٌ نَا. 
عَ شَ حَمَ بِرِن بَرَ كْنتْقِلِ بَلٌي قٍندٍ. عٍ بَرَ عٍ شَ نَاقُلِ بِرِن مَسَرَ دٌنسٍ رَ، عَلَكٌ عٍ شَ بَلٌ. سِيٌن شَ مَسٍنيِ «عَلَتَلَ، ﭑ مَ يَافِ مَتٌ. 
عَلَ شَ دَنفِ مِشِ رَتَنفَ نَ قٍ مْولِ مَ. وٌ عَ مَتٌ شَ ﭑ مَ تْورّ مَنِيّ نَ قٍ رَ، عَلَتَلَ نَشَن دْشْشِ ﭑ مَ عَ شَ شْنّ كُي. 
عَ بَرَ تّ رَفٌرٌ كٍلِقٍ كٌورٍ، نَشَن بَرَ ﭑ قَتٍ فَن. عَ بَرَ فَنتَنيِ تِ ﭑ بّ، عَ يّلّ عِتَلَ ﭑ سَنتِدٍ. عَ بَرَ ﭑ نَبِرَ بْشِ، عَ ﭑ هَلَكِشِ لُ نَا. 
عَ بَرَ ﭑ مَ يُنُبِيٍ سَرٍ سَ ﭑ كْن مَ عَلْ كَرَقٌي. عَ بَرَ ﭑ سّنبّ شُن نَكَنَ. عَلَتَلَ بَرَ ﭑ سَ ﭑ يَشُييٍ بّلّشّ، نَشٍيٍ سّنبّ فبٌ ﭑ بّ. 
عَ بَرَ ﭑ مَ فٍرٍ سٌي بِرِن مَتُتُن، نَشٍيٍ نُ نَ ﭑ بّ. عَ بَرَ ﭑ يَشُييٍ مَشِلِ، عَلَكٌ عٍ شَ ﭑ مَ قٌنِكٍيٍ سّنبّ كَنَ. عَلَتَلَ بَرَ يُدَ بْنسْي شَ دِ هَلَكِ عَ حَاشِ رَ. 
ﭑ نَ وَقٍ يِ تْورّ نَن مَ، ﭑ يَيٍ رَ مِنِمَ عٍ بّ. نَشَن ﭑ مَدُندُ مَ، عَ فبِلٍن لِمَنِيَ قِ رَ ﭑ مَ. نَ بَرَ مَكُيَ ﭑ نَ. ﭑ مَ دِيٍ بَرَ هَلَكِ، بَرِ مَ يَشُي سّنبّ نُ فبٌ ﭑ بّ. 
سِيٌن بَرَ عَ بّلّشّيٍ عِتَلَ، كْنْ مِشِ يٌ مُ نَ نَشَن عَ مَدُندُ مَ. عَلَتَلَ بَرَ يَامَرِ قِ يَشُبَ دْشْبٌورٍيٍ شَ قِندِ عَ فٍرٍقَيٍ رَ. دَرِ سَلَمُ بَرَ قِندِ سّنِيّنتَرٍ رَ عٍ تَفِ. 
عَلَتَلَ شَ مَرَفِرِ تِنشِن، بَرِ مَ ﭑ بَرَ عَ شَ يَامَرِيٍ مَتَندِ. وٌ تَن سِ بِرِن، وٌ وٌ تُلِ مَتِ، وٌ شَ ﭑ مَ تْورّ مَتٌ. ﭑ مَ فِنّدِ مّدِيٍ نُن ﭑ مَ قٌنِكٍ شّمّيٍ بِرِن بَرَ شَنِن كٌنيِيَ كُي. 
ﭑ بَرَ ﭑ شَنُنتٍنيِيٍ شِلِ، كْنْ عٍ بَرَ ﭑ يَنقَ. ﭑ مَ سّرّشّدُبّيٍ نُن ﭑ مَ قٌرِيٍ بَرَ قَشَ تَا كُي. عٍ قَشِ دٌنسٍ قٍندٍ نَشَن نْمَ سّنبّ دِ قِدٍ عٍ مَ. 
عَلَتَلَ، ﭑ مَ تْورّ مَتٌ. ﭑ بْحّ مُ رَقَنشِ ﭑ مَ، بَرِ مَ ﭑ عَ كٌلٌن ﭑ مّي نّ عِ شَ سّرِيّ رَ، ﭑ قِندِ مَتَندِلَ يَتِ نَن نَ. سَنتِدّفّمَ مِشِ سْنتْ تَا قَرِ مَ، قُرٍ حَاشِ مِشِ قَشَمَ تَا كُي. 
مِشِيٍ بَرَ ﭑ وَ شُي مّ، كْنْ مِشِ يٌ مُ نَ نَشَن ﭑ مَدُندُ مَ. ﭑ يَشُييٍ بِرِن بَرَ ﭑ مَ تْورّ شَ قٍ مّ، عٍ بَرَ حّلّشِن عِ بّلّشّ قْشِ رَ. عِ بَرَ قَ لْشْي رَ، عِ لْشْي نَشَن مَ قٍ قَلَ. عَ نِيَ ﭑ يَشُييٍ قَن شَ لُ عَلْ ﭑ تَن. 
عِ شَ عٍ شَ حَاشُحَ بِرِن مَتٌ. عِ شَ عَ نِيَ عٍ قَن نَ عَلْ عِ عَ نِيَشِ ﭑ نَ كِ نَشّ، ﭑ مَ قٍ كٌبِ رَبَشِ مَ. ﭑ مَ كْنتْقِلِ وُيَ، ﭑ بْحّ تْورْشِ عَ فبٍ رَ.»