عَننَبِ مِكَ.
6.
وٌ وٌ تُلِ مَتِ عَلَتَلَ شَ مَسٍنيِ رَ؛ «كٍلِ، وٌ شَ وٌ شَ كَلَمُي تِ فٍيَيٍ يَ شْرِ، دُنِحَ بِرِن شَ عِ شُي مّ. 
فٍيَ نَشٍيٍ نَ دُنِحَ مَ كَبِ عَ قْلّ، وٌ شَ ﭑ تَن عَلَتَلَ شَ كَلَمُي مّ، ﭑ نَشَن تِمَ ﭑ مَ حَمَ عِسِرَيِلَ شِلِ مَ.» 
«ﭑ مَ حَمَ، ﭑ مُنسٍ رَبَشِ وٌ رَ؟ ﭑ كٌتٍ مُندُن دْشْشِ وٌ شُن مَ؟ وٌ شَ ﭑ يَابِ. 
ﭑ وٌ رَ مِنِشِ نّ مِسِرَ بْشِ رَ، ﭑ وٌ شُن سَرَ كٌنيِيَ كُي. ﭑ نَشَ مُنسَ، هَرُنَ، نُن مَرِيَمَ شّي وٌ رَ مِنِدٍ. 
ﭑ مَ حَمَ، وٌ شَ وٌ رَتُ عَ مَ، مٌوَبَ مَنفّ بَلَكِ نُ وَ مَ نَشَن نَبَقٍ وٌ رَ، عَ نُن بٍيٌرِ شَ دِ بَلَمِ شَ يَابِ. وٌ شَ وٌ رَتُ وٌ شَ بِيَاسِ مَ كٍلِقٍ سِتِمِ هَن فِلِفَلِ، عَلَتَلَ شَ قٍ تِنشِنشِيٍ عَ نَشٍيٍ رَبَشِ وٌ بّ.» 
ﭑ قَمَ مُنسٍ رَ عَلَتَلَ بّ ﭑ شَ مَنفّ عَلَ بَتُ؟ عَ لَنمَ ﭑ شَ قَ سّرّشّ نَن نَ عَ بّ، سّرّشّ فَن دَاشِ عَلْ نِنفٍ نَشٍيٍ بَرَ حّ كٍرٍن سْتْ؟ 
عَلَتَلَ وَ مَ يّشّي كٌنتٌنيِ فَلِ نَن شْن مَ، شَ نَ مُ عَ رَ، تُرٍ فبٍفبٍ نَشَن مُ حْنمَ؟ عَ لَنمَ ﭑ شَ ﭑ مَ دِ سِنفٍ بَ سّرّشّ رَ ﭑ مَ يُنُبِ سَرٍ رَ؟ ﭑ دِ نَشَن سْتْ، نَ نْمَ قِندِدٍ نَ شَقَرِ سٍ رَ؟ 
عَلَ بَرَ عَدَ مَدِ رَكٌلٌن قٍ رَ نَشَن قَن، عَ وَ مَ عِ شَ نَشَن نَبَ؟ عَ وَ مَ نّ عِ شَ تِنشِن، دُفُتّفّيَ شَ رَقَن عِ مَ، عِ مَن شَ بِرَ عَلَتَلَ قْشْ رَ يّتّ مَفٌرٍ كُي. 
عَلَتَلَ نَ تَاكَيٍ شِلِقٍ. شَشِلِمَ قَمَ نَ تٌدٍ، عَ قَ فَاشُ عَلَ يَ رَ. «وٌ وٌ تُلِ مَتِ عَ شَ كِيتِ رَ، وٌ نَشَ وٌ كٌبٍ سٌ نَ كِيتِسَ رَ. 
نَاقُلِ نَ وٌ شْنيِ وٌ نَشَن سْتْ تِنشِنتَرٍيَ كُي؟ مَنِيَ سٍ كَمَلِتَرٍيٍ نَ وٌ شْنيِ ﭑ نَشٍيٍ شْنشِ؟ 
ﭑ نْمَ دِحّدٍ مَنِيَ سٍ تِنشِنتَرٍيٍ كَنيِ مَ؟ 
تَا بَننَيٍ قِندِشِ قٍ كٌبِ رَبَيٍ نَن نَ، تَاكَيٍ وُلٍ نَن تُن قَلَمَ، عٍ مِشِيٍ مَدَشُ.» 
«نَ كُي ﭑ بَرَ وٌ تْورْ قْلْ، ﭑ شَ وٌ هَلَكِ وٌ شَ يُنُبِيٍ شَ قٍ رَ. 
وٌ وٌ دّفٍمَ نّ، كْنْ وٌ مُ قَمَ لُفَدٍ، وٌ دٌنسٍ رَفَتَمَ نّ، كْنْ عَ مُ لُمَ نَا. نَ بَمَ نّ وٌ يِ رَ سَنتِدّفّمَ رَ. 
وٌ شّ سَمَ نّ، كْنْ وٌ مُ عَ شَبَمَ، وٌ عٌلِوِ بٌفِ بُندُ مَ نّ، كْنْ وٌ مُ عَ تُرٍ دٌنمَ، وٌ وّنِ بٌفِ دُندُ مَ نّ، كْنْ وٌ مُ عَ مِنمَ. 
وٌ بِرَ نّ عٌمِرِ شَ يَامَرِيٍ قْشْ رَ، وٌ عَكَبُ شَ نَامُنيِيٍ قِندِ وٌ فبٍ رَ. ﭑ وٌ سْنتْمَ نَ نَن مَ، ﭑ وٌ شَ حَمَ قِندِ مَ نّ مَيٍلٍ سٍ رَ دُنِحَ يَ شْرِ، ﭑ وٌ لُمَ نّ يَافِ كُي سِيٍ تَفِ.»