عَننَبِ سٌقٌنِ.
3.
«حَشَنكَتّ نَ عِ بّ، تَا مَتَندِلَ سّنِيّنتَرٍ، نَشَن لُمَ مِشِ تْورْ رَ. 
عَ مُ ﭑ شُي سُشُمَ، عَ مُ ﭑ مَ مَرَ سِ رَبَتُمَ، عَ مُ عَ شَشِلِ تِمَ عَلَتَلَ رَ، عَ مُ مَكْرّشِ عَ مَرِفِ عَلَ رَ. 
عَ شَ كُنتِفِيٍ لُمَ نّ عَلْ يّتّ نَشٍيٍ عٍ شُي رَ مِنِمَ حَمَ تَفِ، عَ شَ كِيتِسَمَيٍ لُشِ عَلْ وُلَءِ بَرٍ نَشٍيٍ سُبٍ دٌنمَ كٍرٍن نَ. 
عَ شَ نَمِحْنمّيٍ قِندِشِ يّتّ عِفبٌييٍ نُن يَنقَنتٍيٍ نَن نَ، عَ شَ سّرّشّدُبّيٍ بَرَ قٍ سّنِيّنشِيٍ نْشْ، عَ بَرَ عَلَ شَ سّرِيّ مَتَندِ. 
كْنْ عَلَ نَن تِنشِن نَ مِشِيٍ يَ مَ. عَ مُ مِشِ مَدَشُمَ، لْشْ يٌ لْشْ عَ شَ نْندِ يَنبَمَ. عَ تَن مُ لَنلَنتٍيَ كَنَمَ، كْنْ تِنشِنتَرٍ مُ يَافِ كٌلٌن.» 
«ﭑ بَرَ سِيٍ حَشَنكَتَ، ﭑ بَرَ عٍ شَ يِرٍ مَكَنتَشِيٍ رَبِرَ، ﭑ بَرَ عٍ شَ كِرَيٍ كَنَ. مِشِ يٌ مُ نَ عٍ شَ تَايٍ كُي سْنْن، عٍ بِرِن شُن نَكَنَشِ. 
ﭑ نُ بَرَ عَ قَلَ عٍ بّ، ‹شَ وٌ فَاشُ ﭑ يَ رَ، شَ وٌ ﭑ مَ مَرَ سِ سُشُ، وٌ شُن مُ رَكَنَمَ.› كْنْ عٍ فبَتَ قٍ حَاشِ رَبَدٍ. نَ نَن عَ تٌشِ ﭑ بَرَ عٍ حَشَنكَتَ. 
عَلَتَلَ شَ مَسٍنيِ نَن يَ؛ وٌ شَ مَمّ تِ، لْشْي قَمَ عَ لِدٍ ﭑ مَ نَتّ كَمَلِمَ تّمُي نَشّ. ﭑ بَرَ عَ قَلَ وٌ بّ، نَ لْشْي ﭑ سِيٍ حَشَنكَتَمَ نّ ﭑ مَ شْنّ حَاشِ رَ، دُنِحَ بِرِن شَ كَنَ.» 
«ﭑ قَمَ سِيٍ رَ سّنِيّندٍ، عَلَكٌ عٍ شَ عَلَتَلَ شِلِ قَلَ، عٍ بِرِن شَ عَ رَبَتُ لَنيِ كُي. 
كٍلِقٍ يِرٍ مَكُيٍ دَنفِقٍ كُسِ شُرٍيٍ رَ، ﭑ بَتُلَيٍ قَمَ نّ سّرّشّيٍ رَ ﭑ بّ. 
نَ لْشْي وٌ مُ يَافِمَ سْنْن وٌ شَ قٍ رَبَشِيٍ رَ، وٌ قٍ حَاشِ نَشٍيٍ رَبَشِ ﭑ نَ، بَرِ مَ ﭑ يّتّ عِفبٌييٍ بَمَ نّ وٌ يَ مَ، عَلَكٌ يّتّ عِفبٌحَ شَ حْن ﭑ مَ فٍيَ سّنِيّنشِ يِرٍ. 
ﭑ تْورْ مِشِيٍ نُن مِشِ مَفٌرٌشِيٍ لُمَ نّ وٌ يَ مَ، نَشٍيٍ شَشِلِ تِمَ عَلَتَلَ رَ. 
عِسِرَيِلَ دْنشْي مُ قٍ حَاشِ رَبَمَ سْنْن، عٍ مُ وُلٍ قَلَمَ، عٍ مُ مِشِ مَدَشُمَ. عٍ لُمَ نّ عٍ مَلَبُ رَ بْحّسَ كُي، مِشِ يٌ مُ عٍ تْورْ مَ سْنْن.» 
سِيٌن مِشِيٍ، وٌ شَ عَلَ مَتْشْ. عِسِرَيِلَ، وٌ شَ سّيوَ. دَرِ سَلَمُ، وٌ شَ حّلّشِن وٌ بْحّ بِرِن نَ. 
عَلَتَلَ شَ شْنّ بَرَ فبِلٍن وٌ قْشْ رَ، عَ بَرَ وٌ يَشُييٍ رَفبِلٍن عٍ شْنيِ. عِسِرَيِلَ مَنفّ عَلَتَلَ بَرَ لُ وٌ تَفِ. وٌ نَشَ فَاشُ، وٌ مُ تْورْ مَ سْنْن. 
نَ لْشْي عَ عَ قَلَمَ نّ دَرِ سَلَمُ بّ، «سِيٌن مِشِيٍ، وٌ نَشَ فَاشُ، لِمَنِيَ نَشَ بَ وٌ يِ رَ.» 
وٌ مَرِفِ عَلَتَلَ وٌ رَكِسِمَ نَ وٌ يَ مَ. عَ سّيوَ مَ نّ وٌ شَ قٍ رَ، عَ وٌ مَدُندُ عَ شَ شَنُنتٍيَ رَ، عَ حّلّشِن وٌ رَ عَ شُي عِتٍشِ رَ. 
عَلَتَلَ نَشّ، «ﭑ سُننُنيِ بَمَ نّ وٌ شَ سَلِيٍ كُي، ﭑ وٌ بَ وٌ شَ يَافِ شْرْشْي كُي. 
نَ لْشْي ﭑ وٌ يَشُييٍ حَشَنكَتَمَ نّ، ﭑ تْورْ مِشِيٍ رَكِسِ، ﭑ مِشِ كٍرِشِيٍ رَفبِلٍن عٍ شْنيِ. ﭑ عٍ شَ يَافِ حْشْمَ نّ مَتْشْي نُن بِنيّ رَ يِرٍ بِرِن. 
نَ لْشْي ﭑ وٌ رَفبِلٍنمَ نّ وٌ شْنيِ. ﭑ وٌ مَلَنمَ نّ عَلَكٌ وٌ شَ مَتْشْي نُن بِنيّ سْتْ، دُنِحَ حَمَنّ بِرِن كُي. ﭑ وٌ رَفبِلٍنمَ نّ، وٌ قَ نَ تٌدٍ. عَلَتَلَ شَ مَسٍنيِ نَن نَ كِ.»